پارتی چەپی سەوز بە بەشداریی ٨٠٠ نوێنەرا دەسش بە 'کۊنفڕانسی گەورە'ی کەرد. پارتوو چەپی سەوزی کە وەڵۍ کۊنفڕانسەکەینە بە بەشداریی ٣٠ هەزار کەسا کۊبییەیۊکێش چەنی خەڵکی تەمامنۍ بێبی، چی کۊنفڕانسەنە نەخشەڕاو قۊناغی تازەی دیاری کەرۊ.
پارتوو چەپی سەوزی جە چوارچوەو هەرمانەکاو وێڕێکوستەیۊنە 'کۊنفڕانسی گەورە'ش بەست. کۊنفڕانسەکە ناوەندی کولتووریی نازم حیکمەتینە بە دروشموو "ڕێکوستەی ئازاڎییین" دەسش پەنە کەرد.
٨٠٠ نوێنەرۍ کوردستاننە و تورکیاوە بەشدارێنۍ کۊنفڕانسەکەنە و چەنی دەسپەنەکەرڎەی کۊنفڕانسەکەی بەبۍ مرڎای دروشمەکاو "بژیوۊ سەرۊک ئاپۊ"ی و "بژیوۊ مدرامانوو کۊبانێ"ی وچیێوە.
کۊنفڕانسی گەورە ماوەو دووۍ ڕوا خواینۊ و دلێشەنە ئا وەڵێنیازۍ ورسەنگییا، کە کۊبییەیۊکاو خەڵکینە بەرزۍ کریێنێوە و بارەشاوە قەرار مدریۊ.
کۊنفڕانسەکە بە ورچنییەی دەسەو دیوانی و یەک دەیەقە مرڎای پەی گیانی پاکوو گیانبەختکەرڎاو کۊشیای ئازاڎی و دیموکراسی دەسش پەنە کەرد و هامقسەکەراو پارتوو چەپی سەوزی ئیبراهیم ئاکن و چیدەم کلیچگون ئوچارە قسێشا کەرڎۍ.
ئیبراهیم ئاکن بە سڵامکەرڎەی جە سیاسەتمەدارە گیریایا دەسش پەنە کەرد و واتش، " جە کەسایەتیی سەلاحەدین دەمیرتاشی و فیگەن یوکسەکداغینە بەوەشەسیاییوە سڵام جە سەرجەمووهامڕایاما کەروو، کە زیندانەکانە گیریێنۍ، باوڕم هەن کە بە پاڵپەشتیی ئادیشا نەخشەراێوە خاستەرە دەستنیشانە کەرمێ".
ئاکن سەرنجەش پەی سەروو گۊشەگیرکەرڎەی ڕابەروو گەلوو کوردی عەبدوڵڵا ئۊجالانی کێشتە و واتش، مشۊم پەرسەو گۊشەگیری پێسە بابەتێوە، کە تەنیا وەراوەروو کەسێوە کریۊ، ورنەسەنگییۊ.
ئاکن وستیچش ڕووە "بابەتەکە بە سیاسەتوو گۊشەگیرییوە دەسش پەنە کەرڎەن، وەلۍ فاڕیان پەی سیاسەتێوە دژوو مافەکاو ئینسانی، پاشێلکەرڎەی یاسۍ، کرڎەوەی نادیموکراتیک، کە تەماموو وەڵاتەکەیشا تەننان. پەوکای ئەگەر گەرەکمانە چی دەسەڵاتییە رڕزگارما بۊ، پێویسا ئانۍ وەرهەڵێسیی دەسەڵاتی کەرا و ئۊپۊزسیۊنێنۍ هاگادارۍ ئا بابەتەیە با و پێسە سیاسەت کەرا، ئندا بە نەبییەنیایرەی شمە مەتاودۍ چی وەڵاتەنە سیاسەت کەرڎێ".
وەراوەروو سیاسەتی دووە جەمسەرینە، ڕای یەرەمە هەنە
ئاکن ئاماژەش پانەیچە کەرد بەوەشکرد، کە وەڵاتەکەنە هەوڵۍ دریا سیاسەت بەینوو دووۍ جەمسەرانە قەتیس کریۊ و ئانەش وست ڕووە، کە وەرگێریکەرڎەی جە دەسەڵاتداری ئایینپەرسی نەتەوەپەرسی و دیکتاتۊری بە خوڵقنای یاگەداری و ئاڵترناتیڤی تازەی بۊ، تا هومێد بە گلێرگەی بەخشیۊ و ئا بەدیلە تازە ڕای یەرەمەنە، کە بونیادنیای ئایندێوە هامبەشین پەی سەرجەموو چەوسیاوەکا. تەنیا چا ڕێوە متاویۊ وەرهەڵێسوو ئی دەسەڵاتەیە کریۊ.
مەژگوو دەوڵەتی کێشەو کوردی مەوانۊوە
هامقسەکەرەو پارتوو چەپی سەوزی چیدەم کلیچگون ئوچارە باسوو ئانەیشە کەرد، کە ئادۍ دەوروو جەوهەروو پاڕادیگما و پەشتیوانی و پاڵپەشتیی هەدەپەینە کوۍ بیێوە و واتش"ئاکەپە نەتاواش پاڕادیگماو هەدەپەی دلێنە بەرۊ، ڕانیشاندەروو کۊشیای پارتوو چەپی سەوزی پاڕادیگماو هەدەپەین کە ڕەنجما دان پەیش".
چیدەم کلیچگون ئوچارە واتش، کە تورکیانە کێشەی بنجینەیی کێشەو کوردین، وەلۍ مەژگوو دەوڵەتی ئانەیە مەوانۊوە و نکۊڵییش چەنە کەرۊ و واتش، "کێشەو کوردی، کێشەو نکۊڵی و سڕیەیۊن. ئەگەر ئینسان گەرەکشا جە حاسوو ئارۊو کێشەکەی بیاوۊنە، تەنیا سەرنجە بدەیدۍ سەروو ڕووەدایەکاو یەک حەفتە یان ١٠ ڕۊی وەڵینی، کە ڕووەشا دێنە. جەنازەو ڕۊڵەکاو گەلەکەیما دلۍ دلۍ سندۊقینە دریێنۍ بە بنەیانەکاشا. ئاکەپە و مەهەپە سەرکێشیی دەوڵەتی کەرا، سیاسەتووجەنگی نائەخلاقی کەرا. جلوبەرگی سۊچییاو حەزنی ئینانۍ، کە کناچۍ ئەدا تایبەتۍ بۍ، جەنازەکە ٧ ڕوۍ سەروو جادەیۊ ئازییاوە، چند ڕوۍ وەڵتەر دلۍ کیشێوەنە دریاوە بە بنەیانەکەیش. مشۊم ئینسان ئانەیە واچۊ؛ باسی بنەڕەتی و هەقەتین مشۊم ئانە بۊ. تا ئانە نەمەڕیۊ، نە گەلوو کوردی متاوۊ بەرەو ئامانجەکەیش بلۊ، نە گەلاو تورکیای متاوا".
چیدەم کلیچگون ئوچارە بەشێوە تەروو قسەکاشنە بارەو پاشێلکارییەکاوە زیندانەکانە واتش، "ساڵەو ٢٠٢٢ زیندانەکانە ٨١ کەسۍ مەرڎێنۍ، ٥٦١ زیندانیۍ، کە نەوەشۍ درێژخواینێنۍ و قورسیان هەیە و زیادتەر جە هەزار و ٥٠٠ زیندانییایچ نەوەشێنی".
گۊشەگیرییچ یۊن جە پەرسە گەرمەکا
چیدەم کلیچگون ئوچارە واتیچش، "وەختۍ ئینسان باسوو کێشەو کوردی کەرۊ، بێگومان یۊ جە ناموونیشانە سەرەکی و گرنگەکا گۊشەگیریین. پەرسەو کوردی پەرسۍ 'ئەمنی'یە نییەنە. پەرسەو کوردی پەرسەو دیموکراسی، ئازاڎی و قەوارەینە.
چیدەم کلیچگون ئوچارە دەسنیشانش کەرد، کە فشار و زۊرڎاری چندە دژوارۍ با ئێمە بێت پەی دماییئارڎەی بە گۊشەگیری درێژە بە کۊشیایما مدەیمۍ.
کۊنفڕانسەکە بە واتەواچوو نوێنەرا بارەو سەرڎەمی تازەیۊ بەرڎەواما.
س.ز
