کۆنگرەو ستاری بە ئەرەیاوناێوە ٨ ئاداری ڕۆو جیهانیی ژەنە کرێکاراش مەبارەک کەرد و واتش: "دڵوو شۆڕشوو ژەنەو وەرنیشتیوە ئی نامەیە پەی گردوو ژەنە مدرامانکەرا کیانمێ".
کۆنگرەو ستاری بە بۆنەو ٨ ئاداری ڕۆو جیهانیی ژەنە کرێکاراوە ئەرەیاوناێوەش وەڵا کەردۆ.
کۆنگرەو ستاری تیشکیش وستە سەروو گرنگیی ٨ ئاداری و واتش: "بە بۆنەو ٨ ئاداریوە ئەوەڵ سڵام جە گردوو ژەنە مدرامانکەرا کەرمێ کە چی ڕووەنە کە ژەناو جیهانی مجیارە مەیدانەکا، ئەنجاموو دەسکەوتوو کۆشیای شۆڕشگێڵنیی ژەنان. ئینە میراتێوە تاریخیین، کە بە فیداکاریی گەورەو ژەنا یاوان ئارۆ و جە کۆشیای ئێمەنە زیندەن".
کۆنگرەو ستاری جە کەسێتیی کلارا زێتکین و ڕۆزا لۆکسەمبۆرگ و ئەلیکساندەر کۆڵۆنتای و لەیلا قاسم و ساکینە جانسز و شیرین عەلەم هۆلی و مینا کیشوار و بێرتا کاسیرسێ و گردوو ژەنە گەشمەرڎە کۆشەرەکانە یاد کەرۆوە. واوەی سڵام پەی گردوو ژەنە کۆشەر و شۆڕشگێڵنەکاو جیهانی مکیانۆ.
کۆنگرەو ستاری ئەوەخوایش کەرۆوە، کە جەنگ و تندوتیژی جیهانەنە وەروەڵان، ئینەیچ بەرش وزۆ کە مدرامان و کۆشیای ژەنا دژوو مۆدێرینیتەی سەرمایەداری و تاتەسالاری چندە گرنگا، جە حاسوو جیهانینە و بەتایبەت وەرکەوتوو دلێڕاسینە هێزە ڕاسلوێ و فاشیستەکێ قەوەتێ بێنێ، ئی جەنگ و وەڵێئامایێ بەرەنجاموو زیهنیەتوو تاتەسالاری و پیاسالارینێ، کە وەڵێ گرد لاێنە دژوو ژەنێ و کۆشیای ئازاڎیی کریا.
کۆنگرەو ستاری تیشکە وزۆ سەروو بەئامانجگێرتەی ژەنە سەرمەشقاو کوردی لاو دەوڵەتی ئەرەگیرکەروو تورکیوە، پاسەیچ ئاماژە کەرۆ بە جەنگێوە تایبەتی بە ئامانجوو لاوازکەرڎەی کۆشیای ژەنا جە ڕاو بەتاڵکەرڎەیۆ دلێنەیشاوە، ماچۆ: "بەتایبەت پلێ پێسەو سیاسەتوو بەروو فێمنیستی یا درووشموو ژەنی، ژیوای، ئازاڎی کە لاو سیاسەتمەدارە ڕاستلوایەکاوە وچیۆوە، بەڵام دلێنە و مانا و ڕیشەی هەقەتینوو درووشمەکەی پەشتگۆش وزیۆ و تاوانبار کریۆ و هەوڵێ دریا کۆشیای چند ساڵەو ژەنا بەتاڵ کەراوە".
کۆنگرەو ستاری جەخت کەرۆوە سەرەڕاو گردوو ئینیشا مدرامانوو ژەنا نەمردنیا، ماچۆ: "باوڕما پاسەن ژەنی ئا هێزەنێ، کە متاوا نەتەوەپەرسی و فاشیزم و تاتەسالاری و کۆڵۆنیاڵیزم و گرد جۆرە ستەمێوە ماڕا. پەوکای پێویسا پێسە ژەنا ستراتیژێوە هامبەشما بۆ و دژوو جەنگوو ئیمپریالیزمی جیهانی، کۆشیاێوە ئازاڎی جیهانی سەروو پایا وزا. مشۆم خەباتوو گردوو هێزە دژە سیستمەکا و ئا تەڤگەرە جڤاکییا بە سەرمەشقایەتیی ژەنا ملا وەڵێوە و جیاواز جە یۆترینی نەوینیا. مشۆم هێزەکێ پێوە مجیارە و پێسە تافێوە با بە قوەو فاڕای جیهان. سەدەو ٢١ بۆ بە سەدەو ئازاڎیی ژەنێ، متاومێ جە ڕاو ئەرەمەرزنای فیدراڵیزمی دیموکراتیکوو جیهانیی ژەناوە ئینەیە بارمێ دی، چونکوم پێوە قەوەتێنمێ".
کۆنگرەو ستاری تیشکە وزۆ سەروو شۆڕشوو وەرنیشتی و ماچۆ: "پێسە تەڤگەروو ژەناو وەرنیشتی، ئا یاگێ ١٢ ساڵێ چێوەڵتەر شۆڕشوو ژەناما دلێنە دەس پەنە کەرد، تا ئیساتێ گرد ڕوێ ئەزموون کریۆ و پارێزنیۆ، ئی پەیامە پەی گردوو ژەنە مدرامانکەراو جیهانی کیانمێ".
کۆنگرەو ستاری پەشتیوانیی وێش پەی گردوو ژەنە مدرامانکەراو جیهانی و وەرکەوتوو دلێڕاسەی کیانۆ و ماچۆ: "پەشتگیریی ئا ژەنا کەرمێ کە دژوو سیاسەتوو ڕاسڕەوانە و فاشیزمی و چەوسنەروو دلێ جەرگەو سەرمایەداری کۆشیا".
کۆنگرەو ستاری بانگەوازوو گەورەکەرڎەی کۆشیایش کەرد و واتش: "داوا جە گردوو ژەنا کەرمێ با بە یۆ و کۆشیای هامبەش قەوەت کەرا و ٨ ئاداری فاڕا پەی شۆڕشی جیهانیی ژەنا. ژەنی ژیوای ئازاڎی".
