کۆمسیۆنوو ژەنا کەنەکەی بۊنەو ٨و مارسیوە ڕۊو جەهانی ژەنا رەنجدەری و کۊششکاریۆ پەیامێوەش وەڵاکەردۆ و چنەشەنە ئەرەیاۋنانش، کوردسان بە کۊشیای ژەنا ئازاڎیی، ئازاڎ بۆ و حیچ هێزێوە مەتاوۆ ڕا چانەی گێرۆ.
کۆمسیۆنوو ژەناو کەنەکەی، بۆنەو ڕۊو جەهانی ژەناوە ئەرەیاۋناش، كوشتەی ژەنا سەروو ئاستوو دنیۍ و دلێینەی ئینا بەرزۆبیەینە، ئارۊنە کوردسان بیەن بە ناوەنڎوو تنووتیژیی و تاڵانی، جە ۋەران ۋەرەنە ژەنی و گەلەکەما خەباتێوە ناوازە پۍ دیموکراسیی، ئاشتیی و یەکسانی کەرا، حیچ هێزێوە دماکۊتە مەتاوۆ کوردسانێوە ئازاڎ، کە بە ئیراڎەو ژەنۍ وەشبیەن دلێنە بەرۆ.
حەرپاسە جە ئەرەیاۋناکەو کۆمسیۆنوو ژەنا کەنەکەینە ئامان، کە ئاژەو ژەنا چی وەختەو ئارۊیمانە پێسەنە وەڵۍ جه‌نگوو جەهانی یووەمی، كه كلارا زه‌تكینە مێڎانەنە بۍ، ته‌نانه‌ڎ چا وەختیچەنە ژەنی ملكه‌چۍ سته‌می نەبێنۍ و هۊرستۍ سه‌روو پەیا، چا وەختەیچەنە زانێنۍ، كه جە ڕاو ڕێکوستەبیەیۆ و مدرامانیوە متاوا ئه‌نجام به‌ده‌س بارا، چونکی ژەنەی ئێژا و سوسیالیستە كلارا زه‌تكینە جە ساڵەو ١٩١١ ڕۊو ٨و ئاداریش پێسە ڕۊو جەهانی ژەنا ڕه‌نجده‌ری و ۋێڕاگری ئشناسا.
باسیچشا چانەی کەردەن، ئارۊنە كوردسان پێسە سه‌رده‌موو جەنگی جەهانی یووەمی، بیەن بە ناوه‌نڎوو تنووتیژیی، تاڵانیی، ئەرەگیری و ئیستغلالكەردەی، گەرەکشانە به جەنگ و كۆچپنەکەردەی و فاڕای دیموگرافی و تاونایۆ (ئاسمیله‌كەردەی) گه‌لوو كوردی دلێنەبەرا، جە ۋەرا ۋەرەنە ژەنی و گەلەکەما خەباتێوە ناوازە کەرا پۍ ئانەی جە سەڎەو ٢١ ینە کوردسان بۆ بە وڵاتوو دیموکراسیی، یەکسانیی، دۆسایەتیی، ئازاڎیی، ئاشتیی و داڎپه‌روه‌ریی، کوردسان کە بە دەس و ئیراڎەو ژەنا ڕازیانۆ، ئارۆ هومێڎ بە مرۆڤایەتی بەخشۆ.
جە دمادمایی ئەرەیاۋناکەینە ئامان کە: حیچ هێزێوە دماکۊتە، چ مەحاڵی بۆ، یا جەهانی یاخوڎ نیشتیمانی، مەتاوۆ کوردسانێوە ئازاڎ، كه به ئیراڎەو ژەنەو کوردی وەش بیەن دلێنەبەرا، پا بۊنۆ ٨و ئاداروو ٢٠٢٤ جارێوەتەر گرڎوو گەشمەرڎا شۆڕشگێڵنوو کوردسانی بە تایبەتی ژەنا شۆڕشگێڵنی و ژەنا ئینتەرناسیۆنالی جەهانی کە میراتێوە تاریخیشا پۍ جیا ئاستێنمۍ به‌رز ڕاگێرمۍ و یاڎشا مارمێوە.
