کۆنسەو ڕاوەبەریی کەنەکەی ئا بێتاوانێشا بەڕێزۆ یادێ کەردێوە، کە هجوومو فڕۆکە جەنگەییەکاو دەوڵەتی ئەرەگیرکەروو تورکینە گەشمەردێ بیێ، شەهیدبوون، داواش جە تەماموو گەلوو کوردی کەردە، هەڵوێستوو وێشا نیشانە بدا و خاوەنداری وەنەو شکۆو وێشا کەرا.
٨وو ئاداری فڕۆکە جەنگییەکاو دەوڵەتوو تورکی دەگاو بابولاشا بۆردومانە کەردە و ئەنجامنە دووێ کەسێ بێتاوانێ کە نامێشا سەعید موبارەک و ئاراس فەرەج بێنێ گەشمەردێ بیێ. ، کۆنسەو ڕاوەبەریی کەنەکەی پێوەس پی ڕوودایۆ ئەرەیاوناێوە نویسیاش وەڵا کەردۆ و هامکاریی پەدەکەیش پەی دەوڵەتی ئەرەگیرکەروو تورکی شەرمەزار کەرد.
ئەرەیاونایەکەو کەنەکەی:
"دەوڵەتی ئەرەگیرکەروو تورکی بە ئەنقەس و زانای بەردەواما جە هجوومەکاش ڕاو فڕۆکەی جەنگییوە پەی سەروو پانیشتوو کوردستانی و کۆکوشی کەرۆ. وەراوەروو ئینەینە حکومەتوو هەرێمی هەڵای بێدەنگا. مەبەسوو دەوڵەتوو تورکی ئانەنە، هەرێمەکەی جە خەڵکی بێتاوانی چۆڵ بکەرۆ. وەڵتەرێ ٢١ شوباتوو ٢٠٢٤ دەڤەروو بادینانینە هجوومش کەرد سەروو خەڵکی بێتاوانی و دووێ هاموەڵاتێش بە نامێ بەشیر عومەر عەلی و عارف تەهای دەگاو گوندی کافیەو سەر بە دینارتەینە گەشمەردێ کەردێ. بە هەمان مەبەس، فڕۆکە جەنگییەکاو دەوڵەتوو تورکی ڕۆو ٨وو ئاداروو ٢٠٢٤ شیلادزێنە هجوومشا کەرد و دووێ هاموەڵاتێ بێتاوانێشا بە نامێ سەعید موبارەکی و ئاراس فەرەجی گەشمەردێ کەردێ، کوڕەکەو سەعید موبارەکی بە نامێ ساڵەح موبارەکیوە بریندار بی. حکومەتوو عێراقی و حکومەتوو هەرێمی و پەدەکە بە بێدەنگییەکەیشا هامکارێنێ جە گەشمەردەکەردەی خەڵکوو پانیشتوو کوردستانینە.
ئێمە پێسە کەنەکەی، بێدەنگی و بێهەڵوێستیی حکومەتوو هەرێمی وەراوەروو هجوومەکاو دەوڵەتی ئەرەگیرکەریوە شەرمەزار کەرمێ و هاموەخت سەرەوەشی جە بنەیانەو گەشمەردا کەرمێ و هومێدوو خاسبیەیۆ پەی بریندارەکاموازمێ.
پێویسا حکومەتوو هەرێمی دمایی بە هامکارییەکا پەی دەوڵەتی ئەرەگیرکەری بارۆ و نەبۆ هامکاروو کۆکوشی و ئەرەگیرکاری.
دەوڵەتوو تورکی بەئاشکرا هەڕەشێ ئۆو گەلوو کوردی کەرۆ و ئامادەکاریی وەرفراوان کەرۆ پەی ئەرەگیرکەردەی پانیشتی و وەرنیشتوو کوردستانی. ئاخۆ حکومەتوو عێراقی و حکومەتوو هەرێمی و پەدەکە ئی پلاناو دەوڵەتی ئەرەگیرکەروو تورکی مەوینا؟ یا گەرەکشا نیا بویناش. یا هامکاریی ئەرەگیرکاری و کۆکوشیی کەرا؟
گەلوو کوردستانی گەلێوە شکۆمەندا و هەرگیز بێ‌شکۆیی قبووڵ مەکەرۆ. داوا جە گەلەکەیما چوار پارچەو کوردستانی کەرمێ، وەراوەروو هجوومەکاو دەوڵەتوو تورکی هەڵوێست نیشانە بدا و بەها و شکۆو وێشا بپارێزنا".
