کەنەکە سەرەڕاو مبارەک بایی بۆنەو ساڵرۆو سەرهۊردای گەلوو کوردی جە پانیشتوو کوردسانی داواش جە لەلایەنە سیاسیەکا کەرد، پەی ڕاگێرتەی جە پلان و ئەجینداو دوژمنا و نیایرەو ستراتیجی نەتەوەیی سەروو مێزەو گفتوگۆیۆ کوۍ باوە.
ئارۆ ٣٣ ساڵۍ سەروو سەرهۊرداو گەلوو کوردیرە جە پانیشتوو کوردسانی ویەرۆ پا بۆنۆ کۆنگرەو نەتەوەیی کوردسانی ئەرەیاۋنێوەش وەڵاکەردەنۆ و ئەرەیاۋنانش، "پڕەنسیپەکۍ سەرهۊردای کە ئینۍ بێنۍ یەکڕیزی نیشتمانی هەرمانەش سەر کریۆ تا دمایی بە پەرتەوازەیی سیاسی و مەسڵەحەتی حزبی بۍ و بنەماکاو ئازاڎیی و دیموکراسی هۊرچنیەی پاک وبێگەرد پەیڕەو بکریۆ و حوکمۍ ڕەشید بنیاڎ بنریۆ".
ئەرەیاۋنانیچش: " داوا جە گرڎوو لایەنە سیاسیەکا کوردسانی کەرۆ کە پۍ ڕووبەڕووبیەیۆ ئاڵنگارییەکا و نیایرەو ستراتیجێوە نیشتمانی نەتەوەیی سەروو مێزەو گفتوگۆیۆ کوۍ باوە، کەهەر ئانە متاوۆ ڕا جە ئەجێنداو دوژمنا و ئەرەگیرا کوردسانی گێرۆ و گەلەکەیما و دەسکۊتەکاش بە لێواروو ئارامی بیاونۆ.
دەقوو ئەرەیاۋناکەی:
کۆنگرەو نەتەوەیی کوردسانی ساڵرۆو سەرهۊرداو گەلوو کوردسانی مبارەک کەرۆ.
بۆنەو ٣٣ ساڵەو سەرهۊرداو گەلوو کوردسانی مبارەکبایۍ گەرم ئاڕاسەو تەماموو گەلەکەیما بەگرڎیی و پانیشتوو کوردسانی بە تایبەتی کەرمۍ و سڵام و رێزو وەفای پۍ بنەیانەو گەشمەرڎا دلێشانە گەشمەرڎا سەرهۊردای ١٩٩١ ی کیانمۍ.
مەردموو پانیشتوو کورسانی جە٥/٣/ ١٩٩١ ینە جە سەرهۊردایۍ کەم وێنەنە بە بەشداری تەماموو چین و توێژەکا وجە ماوێوە فرە کەمەنە، دەسەڵاتوو بەعسی فاشیستیشا جە تەماموو خاکوو پانیشتوو کوردسانینە ماڵارە.
بەرهەموو سەرهۊردای هۊرچنیەی پەرلەمانی و ئەرەمەرزناو حکومەتوو هەرێموو کوردسانی بۍ، ئا تەجرووبە جە تەماموو کوردسانینە وەرموو چن ساڵەو گەلەکەیما بۍ.
دماو ٣٣ ساڵا جە ئەنجامدای سەرهۊردای بەمەڵامەتوو مۆدێلی خراپوو حوکمڕانی و پشێوییە حزبیەکاوە و دەسوەردای بەری و زاڵبیەی ئەجێنداکاشا، دەسکۊتەکۍ خەڵکوو کوردسانی کە ۋێش جە بەرهەموو سەرهۊرداینە وینۊوە جە ئیسەنە جە گرڎ وەختۍ زیاتەر،ئینا وەردەم و هەڕەشۍ دلێینەشیەینە.
چا سۊنگۆ ئێمە جە کۊنگرەو نەتەوەیی کوردسانی پەی پارێزنای دەسکۊتەکا سەرهۊردای وگەشەپنەدایشا وڕاسکەردەیۆ غەڵەتەکا ۋیەردەی، داوا کەرمۍ:
- پڕەنسیپەکۍ سەرهۊردای کە ئینۍ بێنۍ یەکڕیزی نیشتمانی هەرمانەش سەر کریۆ تا دمایی بە پەرتەوازەیی سیاسی و مەسڵەحەتی حزبی بۍ و بنەماکاو ئازاڎیی و دیموکراسی هۊرچنیەی پاک وبێگەرد پەیڕەو بکریۆ و حوکمۍ ڕەشید بنیاڎ بنریۆ.
-قۊرتەکۍ مەردمی چارەسەر کریا و متمانەو جەماوەری بە ئەزموونی سیاسی کوردسانی زینڎەکریۆوە، ئا متمانەی کە سەرهۊردایش سەروست.
پی بۊنۆ جارێوەتەر کۊنگرەو نەتەوەیی داوا جە گرڎوو لایەنە سیاسیەکا کوردسانی کەرۆ کە پۍ ڕووبەڕووبیەیۆ ئاڵنگارییەکا و نیایرەو ستراتیجێوە نیشتمانی نەتەوەیی سەروو مێزەو گفتوگۆیۆ کوۍ باوە، کەهەر ئانە متاوۆ ڕا جە ئەجێنداو دوژمنا و ئەرەگیرا کوردسانی گێرۆ و گەلەکەیما و دەسکۊتەکاش بە لێواروو ئارامی بیاونۆ.
جارێوەتەریچ ساڵڕۆو سەرهۊردای جە تەماموو گەلوو کوردسانی مبارەک کەرمۍ.
ڕۆحوو گەشمەرڎەکا شاڎ بۆ.
کۆنگرەو نەتەوەیی کوردسانی
نوێنەرایەتی پانیشتی".
