هامسەرۊکایەتیی دەسەو ڕاوەبەریی کۊنگرەی نەتەوەیی کوردستان (کەنەکە)ی، بۊنەو هجوومە عاسمانییەکەو سەروو فڕۊکەخانەو کشتوکاڵیی عەربەتێوە پەیامێوەش ئاراستەو سەرکرڎایەتیی یۊبییەی نیشتمانیی کوردستانی (یەنەکە)ی کەرد.

لە پەیامەکەو کەنەکەینە ئامان: "هیزی، (١٨-٠٩-٢٠٢٣) جە سلێمانینە و فڕۊکەخانەو عەربەتێنە هێزەکاو دژەتیرۊری کریۍ ئامانجوو هێزە عاسمانییەکاو دەوڵەتوو تورکی. جە ئەنجاموو هجوومەکەینە ٣ پێشمەرگۍ گەشمەرڎۍ بیۍ و ٣ پێشمەرگۍ تەرێچ بریندارۍ بیۍ. ئا هجوومە بە تەنیا پەی سەروو یۊبییەی نیشتمانیی کوردستانی نییا، بەڵکوم پەی سەروو کوردستانی و گردوو گەلوو کوردین.

ئا هجوومە دژوو سەروەریی هەرێموو کوردستانی و دەوڵەتوو عێراقین. چندین ساڵێن دەوڵەتوو تورکیای سەروەریی هەرێمی و عێراق پاشێل کەرۊ. ئی دۊخە هەمان وەختەنە پاشلکەرڎەی گردوو نۊرم و ڕێسا میاندەوڵەتییەکایچا. هەرپاسە دژوو مافەکاو ئینسانین، ئا هجوومۍ دەوڵەتوو تورکیایە پەی سەروو گەلوو کوردستانی، تاوانوو جەنگی و تاوانوو دژەئینسانیەتینۍ. پێویسا ڕا وەنەو ئاهجووماو دەوڵەتوو تورکیایە گیریۊ و تاوانبارۍ سزا دریا. ئێمە بڕواما پاسنێنە، کە شمە بەوردی ملدۍ شۊنەو دۊخەکەیرە. ئێمە پێسە کۊنگرەی نەتەوەیی کوردستانی بە گرد نۊعێوە ئینایمێتا چەنی و پەشتگیریی سەرکرڎایەتییتا کەرمۍ.

پەی گردوو گەشمەرڎا و بریندارەکاتا هامخەمێتانمۍ و بەتندیش ئا هجووما ڕسوا و شەرمەزارۍ کەرمۍ. جە کەسێتیی گەشمەرڎاو فڕۊکەخانەو عەربەتێنە یادوو گردوو گەشمەرڎاو کوردستانی بە شکۊوە کەرمێوە و سەرەو ڕێزیشا پەی کۊمنمێرە. سەرەوەشی جە سەرکرایەتی، گردوو ئەنداما و لایەنگێراو یۊبییەی نیشتمانی کوردستانی و کەسوکاروو گەشمەرڎا و گردوو گەلوو کوردستانی کەرمۍ. هومێدوو زووتەر خاسبییەیۊیچ پەی بریندارەکا موازمێ".

س.ز