وێرەگاو هیزی، بڕۍ کەسایەتیۍ جە سەنتەروو ڕۊشنویریی شاروو کەرکووکینە، ڕەخنەشا جە هەردووە حزبە کوردییە دەسەڵاتدارەکاو پانیشتوو کوردستانی گێرت، کە بەرژەوندیی نەتەوەیی گەلەکەیشا کەرڎەن قوربانیی بەرژەوەندیی حزبی و داواشا کەرڎە، کە یۊبییەی کورڎا شارەکەنە وەش کریۊ و کورد کەرکووکنە یەکڕیز و یەکلیست بۊ".

ئا کەسایەتیۍ کە پێکئامێبێنۍ جە رۊشنویرا، چالاکە سیاسی و مەدەنییا، سەرۊکوو عەشیرەتی و نوێنەروو لایەنە سیاسییەکا دلێشانە تەڤگەروو ئازادیی گلێرگەو کوردستانی، ئەوەڵۊ کۊبییەیۊێشا کەرد و دلێشنە ڕەخنەشا جە هەردووە حزبەکاو دەسەڵاتی پانیشتوو کوردستانی پەدەکە و یەنەکەی گێرت.

ئا کەسایەتییاو شاروو کەرکووکی جەختشا کەرڎۊ، پەی یەکلیستی هیچ هەنگامۍ کرڎەیۍ ئەرێنیۍ نەنریێنۍ، پاش کۊبییەیۊکەیچ کۊنگرێوە ڕۊنامەوانینە، داواشا کەرڎە زووتەرین وەختنە، یەکلیستی پارێزگاو کەرکووکی و مەنتێقە کوردستانییەکاو بەروو هەرێموو کوردستانینە بۍ ئاراوە.

لاو وێشۊ محەمەد مەلا کەریم، کەسایەتیی ڕۊشنویروو شاروو کەرکووکی، بە نامۍ ئامادەبییاوە بەیاننامێوەش واناوە، کە دلێشنە ئامابێ: "لاو گرد لاێوە ڕۊشنا ناتەبایی و نەبییەی نەخشەڕاێوە ڕۊشنۍ لاو هێزە سیاسییەکاوە، دۊخوو هەرێموو کوردستانیش تووشوو چەقبەستەیی سیاسیی کەرڎەن و وستەنش سەروو ڕاو هات و نەهاتی، ئانەیچ بییەن بایسوو زیادتەرخراپبییەی دۊخوو کەرکووکی و مەنتێقە کوردستانییەکاو بەروو ئیدارەو هەرێمی، پڕۊسەو تەعریبی و پەرسەو زەمینوزاروو کوردی و تورکمانی، بەسەروازیکەرڎەی مەنتێقەکەی تەرسۍ گەورێنە سەروو دماڕۊو مەنتێقەکەی".

ئا کەسایەتیۍ هەرپاسە داواکاریێوەشا ئاڕاستەو حزبە کوردستانییەکا کەرد و واتشا: "ئێمە کۊمەڵێوە جە خەموەراو کەرکووکی و ئەنجوومەنوو کورڎاو کەرکووکی، پەی کەمکەرڎەیۊ تەرسەکا، ڕووەو دەمیما کەرمۍ گردوو حزبەکا و جە مەنتێقەکاو بەروو هەرێمینە وەڵێنیازوو یەکوتاری و یەکلیستی کەرمۍ، هەتا پێوە هەرمانە و وەرپەرسبییەی گێرا گەرڎەن و هامبەشۍ قەراری با. هاموەخت داوا جە کوردستانییا کەرمێکە بەشداریی دەنگدای کەرا، گەرەکمانە چەنی ناوەندوو قەراروو حزبەکا بنیشمێرە و سەروو پڕۊژێوە هامبەشی واتەواچ کەرمۍ، پای ئا مەبەستەیە داوا جە گردوو حزب و لایەنەکا کەرمۍ پێوە کەرکووکنە کوۍ باوە".

س.ز