جە مېڎانو کەشو جودی و سەرو حەر بستێوە خاکو کورڎستانیۊ رۋانە شەربەتەو شکسی و مەڕیای دەرخواردو دوژمنا گەلوو کورڎی دریۊ. ۋەڵتەریچ سوپاو تورکی ئەرەگیری چی مېڎانەنە شەربەتەو شکسیش سەرو دەسو گەریلاکا ئازاڎیی کورڎسانیۊ نۊشکەرڎەن .
دەوڵەتو تورکی کۆلۆنیالیستی جە ئیسەنە ئینا لوتکە فاشیزمی و نەژاڎپەرستینە. گەریلاکۍ ئازاڎیی کورڎسانی پېشا بیېنۍ بە مۆتەکە و هەناسەشا چنەبڕیېنۍ. پۊکەی بیەو کورڎی و پەرەئەسای فکر و فەلسەفەو سەرۆک ئاپۆی بە دلېنەشیەو ۋېشا منیارە. ۋەرو ئی مەڵامەتیچە بە گرڎ شێۋېوە هجومی بۍ ئەخلاقانە روبەروو حەر بیېوە بۊوە کە باوو کورڎی و کورڎسانیوە.
توڕەیی و قین و کینەو دلۍ دڵو ئەردۆغانی چەمېش تاریک کەرڎەن و پەردەو حەیېش سەرو میاچەمایشەرە دڕیەن. ئەوەمەنڎەکۍ دەوڵەتو عوسمانی جە ساڵەو ٢٠٢٢ بە خەیالپەرستیېوە بێڕادە هجومشا کەرڎ سەرو هەرێمو گەشمەرڎە دەلیلو زاگرۆسی جە ۋەرنیشتوو زاپی. گەریلاکۍ کورڎسانی گورزەی قورسەشا جە سوپاو ئەرەگیری تورکی شانان. خۊنکارەکۍ ڕابەر ئاپۆی بە ئیراڎېوە پۆڵایینۊ جە ۋەران ۋەر بە هجومەکا سوپاو تورکی مرڎېنېوە، بە پاو شێوازو جەنگی سەردەمی تازەی، بە تاکتیکو ۋېشا تەکنەلۆجیا و مۆدێرنو سوپاو تورکیایشا پووچ کەرڎۊ.
دەوڵەتو فاشیستی تۆرکی پۍ شارتەیۊ شکسەکا ۋېش جە جەنگەنە و شارتەیۊ کوشیاکاش هەرمانۍ فرە قیزەونېش کەرڎۍ. حیچ بەرئاوەرۍ جە فیلمیچەنە مەتاۋۊ پا بۍ ویژدانیۊ پاسە جە بەشێوە فیلمەکەیشەنە ئاێر جە جەنازېوە ۋەربڎۊ. تورکی ئەرەگیر، پۍ ئانەی نیشانەش بڎۊ کە سەرو پەیاوە ۋېش راگرتەن و سەرو دەسەڵاتو ۋېش ۋەردەواما، حیچ بەهېوە ئەخلاقی و مرۆیش پۍ ۋېش ناستەنۊ. ئەرەگیرەکۍ بە شێۋېوە دڕنڎانە ئاێر جە جەنازەو سەروازەکاشا ۋەردېنۍ و سەرو کەشەکاوە هۊرشا دېنۍ دلۍ چاڵاییە قووڵەکا و دماتەر بە فڕۆکە بۊمبوارانشا کەرېنۍ. جە ڕاسیچەنە ئا سەروازۍ کە ئارڎېبېنێشا پۍ ئا مەنتیقەیە، جە هێزە تایبەتەکاشا بېنۍ.
سەرەڕاو گرڎو ئا کردەوا، ئەرەگیر نەتاۋاش شکسو ۋېش جە ۋەران ۋەر بە کۊشیای گەریلاینە پەردەپۆش کەرۊ. ئیجارە جە قینەو ئا چېرکۊتەینە دەسش کەرڎ بە بەکارئارڎەی تەقەمەنی قەڎەغەی و چەکی کیمیاۋیی. سەڎان جارۍ پی چەکا کە گوایە جە ئاستی میان دەوڵەتینە قەڎەغەکریېنۍ، سوپاو تورکی هجومش کەرڎ سەرو بەرە و سەنگەرەکا گەریلاکا ئازاڎیی.
دوژمنوو کوردی، بە وەرموو ئەرەگیریوە، چێروو دیواروو قەڵاو ئیرادەو گەریلاینە مەڕیا و بی بە هەزار پارچێوە. بە ئێشوو ئا گورزاوە کە ڕاو گەریلاکاو کورڎسانیوە وارڎێشا، ناچارۍ بیۍ دەیان جەنازۍ سەروازەکاشا سەروو زەمینیوە جیا بازا و بە سکۊرسکییەکا بەرەو تورکیا وربەیا.
دوای شکستەکەو ساڵۍ وەڵێنۍ، بە ڕوخسارێوە بە شەرم شۊریاوەوە، شەوەو ٢٠ تەمووزی، دەوڵەتوو تورکی ئەرەگیری گەرەکشا جارێوە تەر هجووم کەرۊ سەروو هەمان یاگۍ. چونکوم دەوڵەتوو تورکی بەرڎەوام ئی ڕاسیێشە ویڕی مەشاوە و گەرەکش نیا باوڕشا پەنە کەرۊ، بەرڎەوام وێش خەڵەتنۊ و بە ئامانجوو وێش، کە دماییئارڎەین بە جمیەری ئاپۊیی.
پێسە سەرۊ واتم، قینی و نەژادپەرسی دڵوو ئەرڎۊغانی چەمێش کۊر کەرڎەن، مەوینۊ و مەیاوۊنە، کە بناغەو تەڤگەری ئازاڎیی کورڎسانی بە ویر و ئەندێشەو ڕابەر ئاپۊی و بە قەراری گەورەو گەشمەرڎا بە گەلووکوردی و خاکی مەبارەکوو کورڎسانی و بە قەسەم پەی ژیوێوە ئازاڎی، جە وەڵاتێوە ئازاڎەنە نریانرە. مەیاوانە مجیای هەردڵۊپێوە جە ونەو گەشمەرڎێوە وەرڎەموو ئا ڕێبازەینە بناغەکەی پتەوتەر کەرۊ.
٢٠ تەمووزیوە گەریلاکاو کورڎسانی جارێوە تەر بە چالاکی و ئیرادەو وێشا جە مەیدانوو مدرامانوو کەشوو جودینە دەوڵەتوو تورکی ئەرەگیری میاونانە، وەلۍ بە پاڵۍ و فڕۊکە تازەکاو ئەرڎۊغانی کە جە دماین کۊبییەیۊ ناتۊینە دەسش کەوتۍ، وێش ویر شیۊو بۍ ئانەی راسییەکا وینۊ، بە دروۍ و دیماگۊژیۍ پووچۍ، سەدان سەروازێش خەڵەتنۍ و جارێوە تەر کیانێشۊ پەی مەیدانەکەی.
دەوڵەتوو تورکی ئەرەگیری، وەرووئانەی جە جەنگی نادادپەروەرانەنە دژ بە گەریلاکاو ئازاڎیی کورڎسانینە بەرۊشۊ، هیچ چێوێوە مەوینۊ و چێس بۍ ڕاش کوشۊش و تاڵانش کەرۊ. هەزاران دۊنمۍ دارستانەکاو کوردسانیش ئاویر وەرڎێنێنە و دارەکا بڕۊوە. ئارۊ جە کەشوو جودینە، هامشانوو گەریلای، سروشت هەقەو وێش جە ئەرەگیرا کەرڎۊ، گەرمیوە پێسە تینەو جەحەننەمی ملۊ گژۍ ئەرەگیرارە، ئا سەروازۍ کە جە گوللۍ گەریلایا نەجاتشا بۍ، سروشت سزاشا مدۊ و بەرزیی پلەو گەرمی و بێئاوی، دماییشا پەنە مارۊ پێسە ئەرڎەم کاڤلاکی.
یەکینەکاو ژەنە ئازاڎا یەژا ستار جە کەسایەتیی ئەرەگیراو دەوڵەتوو تورکینە هەقە جە ئەقڵیەتوو پێنج هەزار ساڵەو ڕەگەزپەرسیی کەراوە. هێزەکاو یەژا ستاری، سەروو بنەماو پرەنسیپەکاو ئایدۊلۊژیای ڕزگاریوازی ژەنا، بە گیانی نیشتمانپەروەرییوە بە کاریگەرتەرین نۊع چی جەنگەنە دەوروو وێشا گێڵنا.
پاسە دیارا هیچ کەسێوە دەوروبەروو ئەرڎۊغانینە نییا، کە بتاوۊ لەیەکدایۊیۍ ماتماتیکی و بیرکارییانەی خاس کەرۊ. ئینە چندەمین جارا کە حیسابات و لەیەکدایۊکێش چەنی بازاڕی و مەیدانی یۊی مەگێراوە. دوژمنی ڕەگەزپەرس و ئەرەگیر بە خەیاڵیوە ئەرەگیرکاری و ڕەگەزپەرسیوە ڕووە کەرا دەکەنە مەیدانەکاو گەریلای، وەلۍ بە ڕۊحوو مدرامانی و ئیرادەی ئاپۊییوە، کە وەراوەرشاوە مدرا، سەرەشا سڕ مەنۊ و و پەنجۍ پەشیمانیی گەزا.
جە مەیدانوو کەشوو جودی و هەربستێوە خاکوو کورڎسانینە بەرڎەوام گەریلاکاو ئازاڎیی تاڵاوەو شکسی و بنەکەوتەی دەرواردوو ئەرەگیرا مدا. هەرچندە سوپای ئەرەگیرەو تورکوەڵتەرۍ تاڵاوەو بنەکەوتەیش چی مەنتێقەنە بە دەسوو گەریلاکاو ئازاڎیی کورڎسانی وارڎێنۊ. گریلاکاو ئازاڎیی کورڎسانی، بە ڕۊحوو گەشمەرڎە زیلانۍ و عگیدەکا، ئی پەیامە پەی دەوڵەتوو تورکی و هەم پەی دۊسا و هامسۊزاو کوردی کیانمۍ، کە هەرگیز ڕا مەدەیمۍ ئەرەگیرۍ سەروو خاکوو کورڎسانیوە بنۍ وزا. پەی ڕزگارکەرڎەی کورڎسانی جە کۊلۊنیالیزمی و ئازاڎیی جەسەیی ڕابەر ئاپۊی، ئانە کە گنۊ سەروو شانیما پەوپەڕوو گیانبازییوە کەرمێش.
هـ . ش / س . ز
