ئیسە جە کەش و کوەکێ هەورامانی بە تایبەتی جە زنجیرە کەشەکێ شاهۆی، وەرزو ڕاوێ و نێچریوانیەنە. بە تایبەتی جەی ئی وەرزەنە ڕاوکەرێ پەی ڕاوکەردەی کەڵی و بزە کۆییێ ڕووە منیانە کەش و کوەکان.
پەی ڕاگیری جە ئانەیە، ئەندامێ گروهو کەشەوانی پاوەی چەنڎین هەفتێ مەلانێ پەی شاهۆی و ژیویگەی و کەڵێ و بزێ کوییێ کە ڕوو بە دلێنەشیەیەنێ جە ڕاوکەرەکان مەپارێزنانێ و ڕا بە ڕاوشکاری نمڎانێ.

ئەسعە ئەڵادۆستی، ئەندام جە گروهو کەشەوانی پاوەی کە زیاتەر جە 10 ساڵێن بە شێوازی پیشەیی کەشەوانەن، جە ئی بارەوە بە پەلیانەو سلام پاوە-یش واتەن: "چەنڎن ساڵێن ئەندامێ گروهو کەشەوانی پاوەی وێبەخشانە کار پەی پارێزنای ژیوگەی و ئاژەڵە کوێیەکان مەکەرانێ. هۆکارو ئانەیچە کەم بییەی ئاژەڵە کۆییەکان، چونکە جە ویەردەنە کەڵێ و بزێ و ئاژەڵێ کوییێ فرێ جە کەشێ و کوەکێ هەورامانیەنە بە گردی و شاهۆیەنە بە تایبەتی بیێنێ. بەڵام جە ڕوزگارو ئیسەیەنە بەنوگەو ڕاوێ و نێچیروانی ژمارەشان ڕۆچ بە ڕۆچ ڕوو بە کەمی و دلێنەشیەیەن".

نامبریا دەستنیشانش کەردەن: "چوون یەرێ ساڵێ وەیەردێ، ئێساڵیچ کەشەوانەکێ پاوەی جە چوار گروهێ یەرێ کەسیێنە بە ئی ئەرکەیە هۆرئێستێنێ و هەوڵ مڎانێ ئاژەڵەکان جە دلێنەشیەیەی یەکجاری بپارێزنانە و سەرجەنۊ ژمارەشان چوون ویەردە زیاد بکەرۆنەوە. سەرەڕاو نەبییەی دەرفەتی و پەنەوازیەکان پەی پارێزنای ژیوگەی و سەردای 18 پلێ چێرو سفری، دیسان بە دڵسۆزی هەرمانە پەی پارێزنای ژیوگەی و ئەوەژیونایش مەکەرمێنە. تا ئیسە چەنڎین جارێ داوامان جە ئیدارەو (محیط زیست)ی کەردەن تا هامکاریمان بکەرانێ، بەڵام بێسود بییەن و هیچ وەڵامێوشان نییەن".

سەبارەت بە ئەنجامو کارەکەیشان، کەشەوان ئەسعە ئەڵادۆستی،  واتەنەش: "وەشبەختانە جە یەرێ ساڵێ ویەردێوە کە دەستمان بە ژیوگەپارێزنای شاهۆی کەردەن، ڕاوشکار و ڕاوکەرێ سەدەنە پەنجا کەمشان کەردەن، کە ئینەیچ سەرکەوتەیەن و ڕۆچانە جە کەش و کوەکانو شاهۆی دەیان سەرێ کەڵێ و بزێ مەوینمێ کە ئانەیچە جە ساڵێ ویەردێنە نمونش نەبییەن".

جە دمایەنە ئەڵادۆستی ماچۆنە: "کەشەوان ئەرکشەن ژیوگە، دارێ و درەختێ و گیواوێ و ئاژەڵێ بپارێزنۆنە و ئێمە هەمیشە ئانەمان کەردەن. هامکات دایم کۆڵەپەشتیەکێمان پەڕێنێ بەلوێ و جە وەرزو وێشنە منیێمیشان تا دارستانێ هەورامانی هەمیشە بەسەرسەوزی بمانانێوە".