ڕێکوستەی پارتوو یەکسانی و دیموکراسیی گەلا (دەم پارتی) چوارچوەو خەباتوو ورچنیەی ٣١ ئادارینە بیناو پارتەکەینە باگجیلارنە کوێ بێێوە پەی ئامادەکاریی ورچنییەی. هامسەرۆکی گردینوو پارتوو هەرێمە دیموکراتیکەکا (دەبەپە)، کەسکین بایندەر ئامادەو کۆبییەیۆکەی بێ.

کەسکین بایندەر کۆبییەیۆکەینە واتش: "با نەورۆزوو ٢٠٢٤ کەرمێ بە نەورۆزوو ئازادیی ڕابەروو گەلوو کوردی بەڕێز عەبدوڵا ئۆجالانی. پەوکای ماچمێ نەورۆزوو ٢٠٢٤ تورکیانە و کوردستاننە و وەرکەوتوو دلێڕاسەینە بۆ بە ڕیفراندۆموو گەلوو کوردی، پی بۆنەوە نەورۆز جە ئامەد و ئیستنەبوڵنە هومێدوو ئازادیی جەستەیی بەڕێز ئۆجالانی زیاتەر کەرۆ".

بایندەر واتش دەسەڵاتوو ئاکەپە-مەهەپەی و ئەردۆگان گەرەکشانە گەلوو کوردی و کۆشیای ئازادی تەسفیە کەرۆ، بەڵام گەلوو کوردی جەژنەو نەورۆزینە دژوو ئی دەسەڵاتەیە وێش دەپارێزنۆ و مدرامان کەرۆ، پەوکای ٢٠٢٤ جیای تەسفیەو کوردا، بۆ بە ساڵەو ئازادی و سەرکەوتەی.

دمایی بایندەر تیشکەش وستە سەروو گۆشەگیریی گرانوو سەروو ڕابەروو گەلوو کوردی و واتش: "ورگێرتەی ئی گۆشەگیرییە ڕا پەی چارەسەروو پەرسەو کوردی کەرۆوە، نیشانەش مدۆ، کە موخاتەبی سەرەکیی ئی پەرسێ بە سەرمەشقایەتیی ڕابەروو گەلوو کوردی بەڕێز ئۆجالانین و ڕاو ئانەیۆ پەرسەکێ چارەسەرە بۆ.  پەوکای ماچـمێ بە کۆشیایما ئی سیستموو گۆشەگیرییە ورگێرمێ، بێجگە جە ورگێرتەی گۆشەگیری هیچ ڕایێوە تەرە چارەسەرە نییەنە. ڕاو سیاسەتوو جەنگی تایبەتیوە هەوڵێ مدا، بێهومێدێما کەرا. بەڵام هەرچی کەرا گەلوو کوردی داراو هێز و پاگێرتەیرەین پەی ماڕای گۆشەگیری".