کتێبە شێعروو « "پ" پێسەو پەنابەری»، تازەتەرین بەرهەمی شێعریو فەرشید ڕۆستەمین کە جە چاپەمەنیو گوتارینە وەڵا کریۆوە. ئی کتێبە کە 56لاپەلێن، یەک شێعرەی درێژە گێرۆ وێ کە هەوڵ مد٘ۆ ئەزموون و دۆخەو پەنابەری و کۆچ‌کەردەی گێڵنۆوە. هەرپاسە ئینە یەکەم جارا کە ڕەوتوو شێعرێ تازێ هەورامیێ ئەزموونێوە پێسەو شێعرێ درێژێ، پی شێوازە گێرۆ وێ. کریۆ وچیۆ ئی شێعرێ دوێ تابلۆوێنە؛ٚ تابلۆو یەکەمینە هەوڵ دریان سەرنجە سەروو لایەنە شاریاوەکاو چەمکوو کۆچی دریۆ و ئی بابەتا نیشانە بد٘ۆ. تابلۆو دووەمی تێمێوە کۆمەڵایەتی_سیاسیەش هەنە و بەحسوو بڕێ کارەسات و ڕووداواش کەردەن کە سووژەو پەنابەری درێژەو ئی سەفەریشنە تا یاوای بە کەونارای تووششا مێ. پەنەوازا وچیۆ کە شاعێر چی شێعرێنە، پێچەوانەو شێعرە وەڵینەکاش، جە زوانێوە ئاسایی‌تەری بەهرەش گێرتەن. بڕیار پاسەن چی ماوەنە کۆڕێوە پەردەلادای و ڕەخنە و هورسەنگنای گیریۆ پەی ئی کتێبی. هەرپاسە فایلی دەنگیو گردوو شێعرەکێ بە دەنگوو شاعێری، هەر چێگە، یانەو کتێبخانەو کوردینە وەڵا بۆوە.

 

یاگێ واتەینە وەڵتەر فەرشید ڕۆستەمی دوێ کتێبە شێعرێ هەورامیێش چاپ و وەڵا کەردێنێوە: « شپرز یانی من دنیا ئەفغانستان » ساڵەو 97ی چاپەمەنیو گوتارینە و « مەرد٘ەی جارێ، نویستەی هەمیشەی » ساڵوو 1401ی جە وەڵاوگەو 49کتێبی جە وەڵاتوو سوێدینە. هەرپاسە کتێبوو «وطنی برای زخم و تنی برای عشق» کە ئانتۆلۆژیێ جە شاعێرە تازەنویسەکاو هەورامانین، بە هورچنیەی و تەرجومەو ڕۆستەمی، ساڵوو 99ی تاراننە وەڵا بیەنەو.

 

فەرشید شاعیرێوە هەورامیی هەورامانوو تەختین و چالاکانە دەسش دان ئەدەبی و نەوگەرایانە منویسوو بە هەر یەرە زوانی هەورامی، فارسی، سۆرانی منویسۆ و هەرمانەو ورگێڵنای و ڕەخنەی ئەدەبییچ کەرۆ، چن ساڵێ چیوەڵتەر پانیشتوو کوردسانینە و سڵێمانینە خەڵاتی یەرەموو ڤیستیڤاڵوو گەلاوێژیش پەی شیعرێ بەرد.

پاژێوە جە شێعرەکێ:

حەز کەرێنێ جیا ساکی و سەد دۆڵارا

جیاتی پاور بانکی و هەرسەکاو داموو خواحافێزی

حەز کەرێنێ یاگێو گۆرانیاو دلێ مۆبایلەکەیم

قسێو تۆم پەنە بیێ

حەرفێ، حەسرەتێ

سەرئێشێت گێرتێم گەرد٘ەن

سەروو مەرزەکانە

تەرسوو سەروازە خوانەژناسەکانە شارتێمەو

جیاتی دەسام، دەسێت

جیاتی کولیێم با وەیلانیت

جیاتی باڵێم پەپوولەییت

دەسێم مەڕیا

با جیاتی ئی شێعرێچە

ئاخێت کێشتێم بە کۆڵ و زۆر شۆنوو وێمرە

هۆ شێوە وەش

خاڵخەنەین گیان!

هەرچی عوسمانەی واتەبۆ و

ئانە ئەد٘ات بێشکێنە پەیت

یا ئا وەختە یەکەمجار بیمارەساننە تاتەیت دیێنی

من وەشیەکات، تازیەکات

کۆیسان و گەرمیانت وێم

خەنە هێندیێ پەی زەماوننێت

نەژیوانم بۆ ئەر دروێ دەو

من گرد٘وو ئا وەختا و شێعرا

گرد٘وو ئا بەشەر و گیواوا

یاگێ وەیوڵەکات و سوخمە کۆنەکات

ئا گۆرانی واچا گۆششا گێری

بە هەورامی

بە گرد٘وو ئا زوانا نەمەنێنێ

ئانێ یۆنسکۆی واتەن فۆتیا

بە زوانوو کەڕا، لاڵا

جیاتی گردوو تەلەفزیۆنا، مۆبایلەکا

بە زوانی گرد٘وو فاڵۆوێرەکاتەو ماچوو:

بێتاقەتتنا و

کۆچ ئیسە، ئی نیمەشەوە؛

هەرچێ هەن، ئی حاڵە نیا.

 

س.ز