جە دژو دەسسەرەرەگێرتەو شارەوانی گۆرە شارو مێردینی، شارەوانی ئێلیحی و شارەوانی خەلفەتی مدرامانو گەلو کوردی بە قەراردایۆ بەردەواما. جەتەمەنو ٧ تا ٧٠ ساڵی پەی خاوەنداری جە ئیراڎەیشا ئینۍ مێڎانەکەنە.

هامسەرۆکو گردی جەمەو مافەکا مرۆڤی (ئیهەدە) حسێن کوچوکباڵابان چا یەرە شارانە کە کودەتاو قەیومی ئەنجام دریان ئەوەکۆڵیایشا کەرڎەن، قسێش پەی ئاژانسو هەواڵو فوراتی (ANF)ی کەردۍ.

کوچوکباڵابان ئانەش وست ڕووە کە بەینو ٥-٧و ئۆکتبەری چن شاندێ پەی ئەوەکۆڵیای سەردای ئا یەرە شارەیشا کەردەبێ و چا بارۆ واتش، "یەرێ قۆناغێن قەیوم پەی شارەوانییەکا منریۆرە و ئیراڎە زەوت مکریۆنە. ئەرەنیشتاو هەڕێمەکەی چانەیە ناڕازێنێ. ناڕەزایشا بە وینیشاندای ئاشتیانەی نیشانە مڎا. جەوەرا وەرو ئانەینە موینمێ کە هێزە ئەمنییەکێ بە هێزێ فرۆ سەرو جاڎەکاوە خەڵکی عەزیەت مکەرا. بەتایبەتی ئێلیحەنە ئا تنوتیژی و ئەشکەنجە وینیا. چڼین سکاڵۍ تۆمارۍ کریێ. جە مێردین، ئێلیح و خەلفەتینە هەڵای بیناکێ شارەوانی تەوقە دریێنۍ. جە گرد مەنتیقێنە تیمە تایبەتەکا پۆلیسی و جەندرمەی بنەشا پنە وزیێنە و هەوڵ مڎا گەلی چەمتەرسن بکەرا".

کوچوکباڵابان ئاماژەش پانەیە کەرد، کە ئێلیحەنە٢٥٠ کەسێ کە ٧٠کەسێشا زاڕۆڵێ بییێنێ  گیریێنۍ و چا ژمارەیە ٢٥ کەسێ کە ١٠شا زاڕۆڵێنێ  زینانەنە مەنێنێوە.

بە پاو ئامارەکا لاو کوچوکباڵابانی جە مێردین ١٥ کەسێ کە ٧شا زاڕۆڵێنێ باڵبەسۍ کریێنۍ، دووێ کەسێ چایشا کە یۆشا زاڕۆڵەن زینانە مەنەنۆ، جە خەلفەتیچنە ١٦ کەسێ گیریۍ، کە ١٠ کەسێشا ئینێ زینانەنە.

هامسەرۆکو گردی ئیهەدەی ئاماژەش پانەیە کەرڎ کە رووەدای و پێشئامایەکێ ئیسەی جە قۆناغو ئی دماییە ئەرەبڕیێ نییەنێ و واتش، "لێوە بانگەوازشا جە عەبدوڵا ئۆجالانی کەرد، لێوە تەرۆ جە ماواو ئاڎینە خەلفەتینە ئا سەرۆک شارەوانیەی بە دەنگو گەلی هۆرچنییابێ، دوور وزیاوە، ئینە بە ماناو ئانەی مێ کە حەز بە ئاشتی نمەکەرا".

کوچوکباڵابان باسش چانەیە کەرد کە ئەرکێ گەورە گنۆ سەرو شانەو ڕێکوزیا مەدەنییەکا و راو گردی دیموکراتیکی و واتش، "جیا جە گرد چێوۍ دۆڵەتو  حکومەت قەبوڵشا کەرد کە کاریگەرترین کاراکتەرو پەرسو کوردی، عەبدوڵا ئۆجەلانا. کەواتە مشۆم ڕابڎریۆ ئۆجالان بتاوۆنە هەم چنی ڕێکوزییاکەیش و هەمیچ چنی ڕێکوزیا مەدەنییەکا دیڎار بکەرۆنە. مشۆم هەلومەرج پەی ئانەی ڕەخسنانە. وەرو ئانەی کوردەکێ ئیتر بێزارۍ بیێ چانەی کە پەرسو کوردی پێسەو ئامرازێ سیاسی بەکاربێنە. مشۆم ئیتر ئانە سەرو هێڵێوە سیاسی راسیۆ ڕاوەبەر بکریۆ. نمەبۆ پەی ئانەیە تەنیا چەمەڕۍ دەسەڵاتی با. چێنە مشۆم رێکوزیا مەدەنیەکێ، راو گردی دیموکراتیکی، رۆشنۋیرۍ، نویسەرێ، ئەرەیاۋنای دەورۍ کارا گێڵنانە. چا روانگۆ هەنگامەی ئازایانە بنریۆ."

هامسەرۆکو گردی ئیهەدە حسێن کوچوکباڵابانی ئانەش وست ڕووە کە سیاسەتو قەیومی وەردەمو ئاشتینە کۆسپا و ئەرەیاوناش، کە تا ئا کردەوە نادیموکراتیۍ بەردەوامێ با کەس نمەتاوۆ باس جە ئاشتیی دلێینەی بکەرۆوە.

کوچوکباڵابانی باسش جانەیەکەرڎ کە شارەوانییەکێ بە بەهانۍ بێ بنەمۍ جە هەرمانەنە لادریێنێ و مشۆم هەرمانەکێشا دریۆوە دەس.

کوچوکباڵابان واتش، " پەرسو کوردینە ئا پرۆسە جە ئاستو قسێنە دەسشپنەکەردەن بە قیمەت و گرنگا؛ مشۆم بنەڕەتەکەس پەڕبکریۆوە، پێسەو هەنگامێ پەی نیازپاکی مشۆم سەرەتا گۆشەگیری سەرو عەبدووڵا ئۆجالانی هۆرگیریۆنە و دەرفەتش پەی بڕەخسیۆ کە بتاوۆنە بنەیانەو، پارێزنەرێ، ڕیکوزیا مەدەنیەکا و پارتە سیاسیەکا بوینۆنە. مشۆم پەرسو بەر کەردەی چنە وییەردەیۍ گردی پەی زینانیا سیاسی جە پەرلەمانەنە تاوتوێ بکریۆ. هەمان کاتەنە ئا مادێ وەڵتەر بە شێوۍ دووەدڵی جە پەیماننامەو وێڕاوەبەرینەی دلێینەو یۆبییەو ئۆروپاینە ئیمزاشا کەردەبێ، چەسپیۆنە و شارەوانییەکێ بە شێوێوە ئازاد، وێڕاوەبەرو تایبەت پێناسە بکریا. هەمان کاتەنە مشۆم پرۆسێوە مردناو جەنگی ئەرەیاویۆنە".