ئەرتوگرول کورکچو باسش چانەیە کەرد، قەرارەکەو پەکەکەی هیواش پەی چارەسەریی گۊرەتەر کەرد و سەبارەت بە گفتوگۆکا جە بارەو دەستووریۆ ئەرەیاۋناش، پەنەوازا سەرەتا قەرارەکۍ ئەنجوومەنو ئۊروپای جابەجێ بکریا.
سەرۆکو فەخری هەدەپەی ئەرتوگول کوکچو سەبارەت بە گفتوگۆکا جە بارەو دەستوورو تورکیایۆ پەی ئاژانسوو هەواڵوو فوڕاتی (ANF) قسېش کەرڎۍ.
ئەرتوگول کورکچو ئاماژەش پانەی کەرڎ، حیچ مەڵامەتێوە نیا کە کورد، دیموکرات، سۆسیالیست، چینی چێردەس و نوێنەرا گەلی جە بارەو 'دەستوور'یوە چەمەڕایی گۊرەشا بۆ و باسش چانەی کەرڎ کە چا هامسەنگییە سیاسییەو ئیساتێنە و بە بیەو ئا 'سیاونویسی'ـەو ئیساتۍ پەڕلەمانو تورکیای ئا خیاڵاتۍ تەنیا ۋۍ هۊرخەڵەتناین.
کورکچو ئەرەیاۋناش، پەڕلەمان بەبێ فاڕای دەستووریچ هەر سەبای متاوۆ جەمې یاسۍ بەربکەرۆ، جەمۍ کێشۍ چارەسەر بکەرۆ و واتش، "گرڎو ئەگەرەکا سەرو ئایندەو تورکیای و کوردەسانی متاوا بە قووڵی و ۋەرفراوانی قسېشا سەر بکریۆ؛ ڕۆژەڤی کۆمەڵایەتی ڕۊشن بکریۆوە."
'ئەر گەرەکتانە دەستوورێ بنیەیدێرە، سەرەتا بەپاو قەرارەکا ئەنجوومەنو ئۊروپای مامەڵە بکەرا'
ئەر سەبارەت پا هەرمانا کە هەر سەبای متاویا ئەنجام بڎریا هەوڵ نمەڎریۆ، چانیشا ئازاڎکەردەی زینانیا نەوەشی، هەنگامە نمەنریۆ پەی هەموارکەردەیۆ و چاکسازی، جە ئاژێوە چامنەنە پێشنیارو 'دەستووری مەدەنی' پا مەعنې مۍ کە خاوەنا ئا پێشنیارەیە نیەتو چارەسەریشا نییا، تەنیا گەرەکشانە دەستوور جە چوارچێوەو ڕاپرسییەکا تایبەت بە هۊرچنیەکا سەرۆککۆمارینە ڕێک وزا.
ئایا بەڕاسی گەرەکتانە دەستوورێوە 'مەدەنی' بنیەیدێرە؟ بەیدۍ ڕووە جە بڕیارەکا ئەنجوومەنو ئۊروپای بکەردۍ و ئا قەولۍ دێنێتا جابەجێشا بکەردۍ: فاڕیا یاساییەکۍ جە بەرژەوەندی ئازادیی ڕابەربڕیەی و هەرمانەی ڕێکوزیایی، هەموارکەردەیۆ هەرمانەکا تایبەت بە زینانیا و مسۆگەرکەردەی مافە کلتوورییەکا کوردی. قەرارەکا دادگای دەستووریی ئەۊروپای جابەجێ بکەردۍ.
چا چوارچێوەنە زەحمەت نییا چانەی بیاومېنە کە پەی چی پێشنیارو 'پەیمانی کۆمەڵایەتی'ـی کە ئۆجالان پەی چارەسەری کێشەو کوردی پێشکەشش کەردەن و پێشنیارەکاو پارتو دیموکراتی 'دەپ'ی پەی فاڕیای جە دەستوورەنە کە تا ئیساتۍ ئەنجام دریێنۍ و ئینۍ ئەرشیفو یاسا و بڕیارەکا پەڕلەمانینە، پەشتگۊش وزیۆ. بەڵام پېسە واتم، ئەر ئی 'کۆمسیۆن'ـە بە ئامانجی جیاوازیچۆ ئەرەمەرزیۆ، باوەڕیم پاسەن ئا نوێنەرۍ ئێمە کیاستێنێما پەی کۆمسیۆنەکەی داواکارییەکا گەلی بارانە ۋەرو باسی، جە سەرەتانە ئاستەنگییەکا ۋەردەمو ئازادیی ڕابەربڕیەی لابەرا."
