گلێرگەو ژەنا ئازاڎیی ۋەرکەوتوو کوردسانی (کەژار)، جە ٧و ئایارو ٢٠٢٤ی، جە کەشە ئازاڎەکا ۋەرکەوتوو کوردسانینە. بە ئاماڎەبیەی نوێنەراو گرڎوو بەشەکا کۆنگرەو چوارەمیش بەست.

کۆنگرەو گلێرگەو ژەنا ئازاڎیی ۋەرکەوتوو کوردسانی (کەژار)کە جە ٧و ئایاریوە دەسش پنەکەرد و پەی ماوەو یەرۍ ڕووا درێژەش کێشا و جە ٩و ئایاری بە دروشمەو "سەرکەوتەی ئاخێزوو ژەنۍ، ژیۋای، ئازاڎیی، مسۆگەرکەردەی ئازاڎیی ژەنا و گلێرگەی دیموکراتیکی، دمایش پنە ئاما. ئی کۆنگرە و ئەنجاموو ئا ئەرەکۊشایەی لووان ڕاوە و بریا ڕاوە، پێشکەش بە گەشمەرڎا سەرمەشقی گەشمەرڎۍ ئاریەن ئارێ و گەشمەرڎۍ شیلان بانە و گەشمەرڎۍ ڕووکەنە جە نەتەوەو عەرەبی کە شاهۆنە گەشمەرڎۍ بیۍ کریا. جە میانوو کۆنگرەکەینە بە وردی باس جە شش ڕۆژەڤا سەرەکی کریا. جە ڕۆژەڤی یووەمەنە ئاژەو ڕابەروو گەلا ڕابەر ئاپۆی هۊرسەنگیا. جە ڕۆژەڤی دووەمەنە بە وردی باس جە ئاخێزوو 'ژەنی، ژیۋای، ئازاڎیی' کریا. دماتەر جە بەرنامەو ڕۆژەڤی یەرەمینە باس جە ڕێکوستەی کۆمیتەکا کریا. جە ڕۆژەڤی چوارەمەنە باس جە ئاستوو ۋۍ پارێزنای ژەنا جە ۋەرکەوتوو کوردسانی و ئێرانینە کریا. جە ڕۆژەڤی پەنجەمەنە قەرار و پلانەکۍ پەی ماوەو ٢ ساڵی ئایندەی باسکریۍ. جە ڕۆژەڤی ششەم و دماینەنە هۊرچنیەو دەسەی ڕاوەبەری کە جە ١٥ ڕاوەبەرا پێکمۍ، لوواڕاوە. ئی شش ڕۆژەڤە جە ماوەو ٣ ڕووانە بە ۋەرفراوانی باسشا ۋنەکریا و گفتوگۆیێوە عالشا سەر کریا.

'بە یۊگێرتەی سەرۍ گنمۍ'

پەی دەسپنەکەردەو کۆنگرەی، کوردیناسیۆنوو گلێرگەو ژەنا ئازاڎیی ۋەرکەوتوو کوردسانی (کەژار)، دەنیزە دەریا وتارەو سەرەتاو کۆنگرەیش پێشکەش کەردە. جە سەرەتاو قسەکاشەنە دەسپنەکەردەو کونگرەو ٤ەمیش جە ڕابەروو گەلا ڕابەر ئاپۆی و ئازاڎیوازا و گرڎوو ژەنا و گەلوو کوردی و گەلی ئازاڎیوازی و تەماموو ئەنداماو (کەژار)ی پیرۆز کەرد. جە هەمان وەختەنە گرڎوو گەشمەرڎا ئاخێزوو ئازاڎیی کوردسانیش یاڎۍ ئاردێوە و واتش: "چی سەردەمەو ئیساتێنە کە پۆرەشەرە گوزەر مکەرمۍ و جە دلېڕاسەو ئا هجوومانە کە ئەرەگیرەکۍ سەروو ڕابەریما و گرڎوو مرۆڤایەتی ئەنجامشا مڎا، ڕاوەبەردەی ئی کۆنگرەیە دەرئەنجاموو ڕەنجوو هەڤاڵا گەشمەرڎامانە. پەی ئانەی ئی کۊشیایە بەردەوام بۆ و جە گرڎ وەختۍ بەقوەتتەر بۆ، گیانوو ۋێشا پەی ئازاڎیی بەخشا. پۊکەی جە کەسایەتی گەشمەرڎۍ ئاریەن ئارێ و گەشمەرڎۍ شیلان بانەی و ڕووکەنێنە گرڎوو گەشمەرڎا ڕاو ئازاڎیی مارمێوە یاڎ. سەروو بنەماو ئی کۆنگرەیە، قەولوو بەرزکەردەیۆ کۊشیای و بەدەسئاردەی ئازاڎیی واوەی مکەرمێوە. بێ گومان چیسەولای دماو کۆنگرەو چوارەمیمانە ۋەرا ۋەر بە دەسەڵاتی، باڵادەسی و ڕەگەزپەرەسی بە پاڵپەشتی ژەنا چالاکییەکێما بەقوەتتەرۍ با. ئێمە پی قەراریە کۆنگرەو چوارەمی بەرمۍ ڕاوە."

'رابەرایەتی ژیۋای و گلێرگەش زینڎەکەردۆ'

دماو وتارەو سەرەتاو کۆنگرەی جە تەرەفەفوو دەنیز دەریێوە، گفتوگۆ سەروو ڕۆژەڤی یووەمی سەروو ڕۆژەڤوو ئاژەو ڕابەروو گەلا ڕابەر ئاپۆی بۍ. چی گفتوگۆیانە، جە تەرەفوو فرەو نوێنەراوە بە وردی باس جە ئاژەو ڕابەر ئاپۆی کریا. حەرپاسە جە گفتووگۆکانە سەرەنج وزیا سەروو گرنگی فکر و فەلسەفەو ڕابەر ئاپۆی سەبارەت بە ژەنا و گلېرگەو ۋەرکەوتوو کوردسانی. پاسە باسکریا، ٤٥ ساڵۍ مدرامان، پەی گێڵای شۊنەو حەقیقەتی و پێناسەو حەقەتینەو ژیۋایرە، بە مدرامانوو ڕابەری مسۆگەر بی. ڕابەرایەتی ئی مدرامانشە بە یەرەم جە ئەڎابیەی وەسف کەرد. گۆشەگیری ڕەها نەتاواش ۋەروودەم و ڕابەرایەتی ئازاڎینە، گەورەتەرین جەنگی ئایدۆلۆژی و جەنگوو سیستەمینە بۆ بە ۋەربەس. دژوو مۆدێرنیتەی سەرمایەداری و گرڎوو سیستەمەکا، هەڵوێسێوە تاریخیش بەرد ڕاوە و گەورەتەرین 'نا'ش جوابوو دەسەڵاتدارا داوە."

دماو وتارەو سەرەتای، کە بە وردی باسش سەر کریا، یووەم ڕۆژەڤ سەروو ئاژەو ڕابەر ئاپۆی بۍ و وچیا: "خاوەنداری جە هەنگامەو 'ئازاڎیی پەی عەبدوڵا ئۆجەلانی، چارەسەری سیاسی پەی پرسوو کوردی'، بەرکەوت کە فکرەو ڕابەرایەتی چنڎە گەردوونی بیەنۆ. تەرسەی گەورۍ زلهێزە هەژموونگەراکا، فکروو فەلسەفەو ڕابەرایەتیا. بەشدار بیەی جە هەڵمەتەکێنە، سەروو ئاستوو ۋەرکەوتوو دلێڕاسەی، پا جۊرەی کە پێویسا، بە لاوازی مەنەنۆ. بە تایبەت جە ۋەرکەوتوو کوردسانی و ئێرانینە فرە لاواز بیەن. خاوەنداری کەردەی جە ڕابەر ئاپۆی، پەی ئێمە پېسە گەلی و ژەنا ۋەرکەوتوو کوردسانی بە بەشداریکەردەی جە هەڵمەتەکێنە و قووڵ بیەیۆما جە فکر و فەلسەفەو ڕابەر ئاپۆینە بەدی مۍ. ڕابەر ئاپۆ، پەی ئانەی بتاومۍ جە چوارچێوەو جەنگوو گەلی شۆڕشگێڵنینە بە ۋەرفراوانی جەنگ و کۊشیای بکەرمۍ، چنی ڕێکوستەی بکەرمۍ و گەشە بکەرمۍ، بە ڕۆشنی گرد چێوێش پەیما ڕۆشن کەردەنۆ. ساڵەو ١٩٩٩ ی گەلوو ۋەرکەوتوو کوردسانی و ئێرانی، حەرپېسە چنی دژوو پیلانگێڵنی سەرهۊردایشا کەرد، ساڵەو ٢٠٢٢ بە سەرهۊردای و دروشمەو 'ژەنی، ژیۋای، ئازاڎیی'، پەشتیوانیشا جە پارادایموو ڕابەر ئاپۆی کەرد. جە چوارچێوەو ئی هەڵمەتێنە، ئازاڎیی جەستەیی ڕابەرایەتی، پێسە ژەناو ۋەرکەوتوو کوردسانی و ئێرانی، بۆ بە ناوەنڎوو گرڎوو چالاکییەکاما. ئێمە پېسە (کەژار)ی بە گرڎوو هێز و ئیرادەیماوە خاوەنداری جە کۊشیای و فەلسەفەو ڕابەر ئاپۆی مکەرمۍ و تا مسۆگەر کەردەی ئازاڎیی جەستەیی ڕابەر ئاپۆی درێژە بە کۊشیای مڎەیمۍ.

'ژەنی، ژیۋای، ئازاڎیی گەورەتەرین ئەرەپڕای بۍ'

هۊرسەنگنای ئاخێزوو 'ژەنی، ژیۋای، ئازاڎیی' جە کۆنگرەنە ڕۆژەڤی دووەمەنە باسش سەر کریا. چی ڕۆژەڤەنە بە شێوێوە فرە گرنگ سەرنج وزیا سەروو مژارە پەیوەندیدارەکا و گفتوگۆش سەر کریا. جە فرەو گفتوگۆکانە ئی هۊرسەنگنایە ئاما وەڵێوە: "ئاخێزوو ژەنۍ، جە ساڵەو ٢٠٢٢، جارێوەتەر ۋەرکەوتوو دلېڕاسەیش کەردۆ بە سەرچەمەو ژیۋای پەی مرۆڤایەتی. کۊشیای و مدرامانوو ساڵانەو ژەنا، ئیساتۍ ئینا ئاستوو شۆڕشینە دژوو سیستموو دەوڵەتوو پیای. شۆڕشوو ژەنا جە ۋەرکەوتوو کوردسانی و ئێرانەنە کۊشیای ژەناش یاۋنا بە بەرزتەرین ئاست. بی بە سەردەمێوە تازە و پرۆسەکە ئیساتۍ یاوان بە قۆناغی دماین. دروشمێوە کە جە چن ڕووێنە گرڎوو جەهانیرە پېسە تۊفانێوە وەڵا بیۆ و پێگەی ئەفسانەیی ۋێش نیشانە دا. بی بە ڕۊشنای و بە گرڎوو جەهانیرە وەڵا بیۆ. میراتی گەورەو ژەنا کوردی، کە ڕەنجێوە فرەش پەی دریان، بە وەڵابیەیۆ 'ژەنی، ژیۋای، ئازاڎیی' یاوا قولەپۊپە و کاریگەریێوە گەورەش سەروو ئاستی دلێینەی و جەهانی وەشکەردەن. ڕابەرایەتیما واتش: "وەخت پەی تاریخی نیا، کەس پەی گلێرگەی نییا". حەرپاسە واتش: "شۆڕش، فاڕیای بەبێ وەخت و شۊنمای ۋیرش چنە مەکریۆوە. کریۆ واچمۍ شۆڕشوو ژەنا گەورەتەرین ئەوەتەقای کۆمەڵایەتیش سەردەموو ۋێشەنە ئارد ئاراوە. شۆڕشوو 'ژەنی، ژیۋای، ئازاڎیی' جارێوەتەر کارێش کەرد جیهان بیاوۆنە کە هیچ کەسێ مەتاوۆ ڕا جە فکروو پەیلوواکا ڕابەر ئاپۆی پەی ئازاڎیی گلێرگەکا بگێرۆ. فەلسەفەی ئاپۆیی جە کەسایەتی ژەنێنە، نەک تەنیا سەروو ئاستی تیۆری، بەڵکم بە بەقوتتەرین و ڕادیکاڵتەرین شێوە ئینا سەردەموو ۋێشەنە و هەرپاسەیچ بەردەوامیش بۆ. پۊکەی ژەنی سەروو ئاستوو جەهانینە بەشداری جە هەڵمەتەو ئازاڎیی جەستەیی پەی ڕابەر ئاپۆی مکەرا.

'جە کۊشیای یۆترینی ئیلهام هۆرگێرا'

جە درێژەو گفتووگۆکانە، ناڕەزایی و سەرهۊرداو ژەنا و گەلو ۋەرکەوتوو کوردسانی و ئێرانی دژوو ڕژێموو ئەرەگیری ئێرانی باسش سەر کریا: "بە کوشتەی کناچۍ کوردی ژینا ئەمینیۍ، تووڕەیی ساڵانەو ژەنا و گەلا تەقاوە. جە حەقەتینەنە چنی کوشتەو شلێر ڕەسوڵیۍ مەریوانەنە کە ۋێش ڕادەسوو دەسدرێژیکەرێوە نەکەردە، کاروەدای گردیش ۋنەکۊتۆ. کاروەدای گەلوو مەریوانی، ڕاش پەی سەقزی و گرڎوو ۋەرکەوتوو کوردسانی و ئێرانی کەردۆ کە بە کاروەدای گەورە خاوەنداری جە ژینۍ بکەرا. کولتوروو گەلین کە ئیلهام جە یۊترینی هۊرگێرۆ، سووکایەتی قبوڵ مەکەرۆ، کاریگەریش سەروو شار بە شارو کوردسانی و ئێرانی کەرد. بڕیەی قژۍ زەنا و سۊچنای سەرپۊشەکەیشا، جە ئاستێوە بەرزەنە کاروەدایبۍ دژ بە ڕێژێموو ئێرانی. بە سەرمەشقایەتی ژەنا، گرڎوو ئا یاسایا کە ڕژیم بە نامۍ ئایینی و شەریعەتیۆ سەروو پێکئامایەکارە سەپنابێش، کاریگەریشا نەمەن. جە ماوەو ٨ ساڵی ۋییەردەینە ئەرەپڕای جەماوەری ۋەرفراوان دژوو ڕژێمی لوواڕاوە، بەڵام بە شێوێوە دڕندانە سەرکوت کریا. هەزاران کەسۍ گیریێ و کوشیۍ. بەڵام ئی سەرهۊردایە جە گرڎوو سەرهۊرداکا تەری جیاواز بۍ. ئەوەڵجاربۍ گرڎوو نەتەوە، ئایینەکا، ژەنا، گەنجا و چین و توێژەکا بەشدارۍ شۆڕش و سەرهۊردای با. چی ساڵا دماییەینە ناڕازیەتیەکۍ ئەڎایا، مامۆسایا، کرێکارا و ژەنا پەرەشا سانان. پېسە ڕۆحێوە سەرهۊردەر گلێرگەش بە زینڎەیی ئاستۆ، ئینەیچ ڕاش دا کە تواناو ژەنۍ سەرهۆربڎۆ و مدرامان دژوو ڕەگەزپەرسی و دەسەڵاتداری زیاتەر بۆ.

 حەرپاسە جە درێژەو هۊرسەنگنایەکانە باس چانەی کریا خاوەنداری جە هەڵمەتەو 'بە ژەنی، ژیۋای، ئازاڎیی، بەرەو شۆڕشوو ژەنا'، خاوەنداریا جە ئیراده و بیەو ژەنا . پۊکاتی پێویسا ئێمە پېسە ژەنا چی هەڵمەتێنە جە ئاستێوە بەرزتەرەنە دەوری کارا بوینمۍ. ئاخێزوو 'ژەنی، ژیۋای، ئازاڎیی' دمایش نامان و دمایش نمۍ. ئێمە جە ساڵەی تازێنە، جە ئاستێوە بەرزتەرەنە، حۊڵەکاما پەی سەروستەی ئی ئاخێزیە بەقوەتتەر مکەرمۍ."

'چنی یۆترینی پێکبەیمۍ'

جە ڕۊی یەرەمەنە ئاژەو کەژاری یۆ بە یۆ مردایش سەر کریا. سەروو لوجنەکا گفتوگۆکریا. جە هەمان وەختەنە گفتوگۆکریا سەروو ئانەی ئارۊنە و جە ئاینڎەنە جە چ ئاستێوەنە خەبات بریۆ ڕاوە. جە هەمانوەختەنە پەی ئەرەمەرزنای کۆمیتەکا (گەشمەرڎە، زینڎان، ئیکۆلۆژی، ژیۋگە پارێزنی) قەراردریا. جە هەمان وەختەنە پەی کۆمیتەکاو ئیساتۍ (کەژار)ی جە ئاستوو هەرمانکەردەی و خەباتینە قەراری تازە جە کۆنگرەنە دریا. حەرپاسە جە هەر یاگێنە کە ژەناو ۋەرکەوتوو کوردسانی و ئێرانیش چنەنۍ، سەروو بەڕیکوستەکەردەیشا گفتوگۆکریا. بەتایبەت سەروو بە ڕێکوستەبیەو ژەنا جە ئەوروپانە گفتوگۆکریا و قەراری تازە چا بارۆ دریا. گفتوگۆکۍ چی بوارەنە پی جۆرە بێنۍ: "چی قۆناغێنە گرڎوو هێزەکا ۋێشا بەڕێکوستەی بکەرا و جە چوارچێوەو جەنگوو گەلی شۆڕشگێڵنینە ۋێش ئاماڎە بکەرۆ، متاوۆ سەرکەوتەی بەدەس بارۆ. ڕابەر ئاپۆ ١٠ ساڵۍ چێوەڵتەر دەسنیشانش کەرد و واتش ' ئێران پەی ماوێوە فرەی پی جۆرە بەردەوام مەبۆ، فاڕیای مێنە کایۆ، پۊکای پێویسا عال ئاماڎۍ با و هیزوو پارێزنای بیاونا بە ئاستێوە بەرز' جە بوارو تاریخی و جە ژیۋای ئیساتێمانە ئێمەس هوشیارۍ کەردیمۍ. پێویسا پېسە ژەنۍ و گەلا ۋەرکەوتوو کوردسانی ۋێما پەی فاڕیای ئاماڎەبکەرمۍ. پېسە جمیەروو ژەنۍ جە ۋەرکەوتەنە، بە ڕێکوستەکەردەی هێزوو پارێزنای ژەنۍ (هەپەژە)، سەرەنجوو ژەنا وزمۍ سەروو کۊسیای چەکداری. گرنگی هێزوو پارێزنای ژەنۍ، جە وەختێوە چانەنە پەی گرڎ کەسێ پێویسا. پەی ئینەیچ پێویسا پرۆژەی سەرەکییما بەڕیکوستەکەردەی و گەورەکەردەی هێزوو پارێزناو ژەنۍ بۆ. پێویسا ڕێکوستەکەردەی جەنگوو گەلی شۆڕشگێڵنی بە سەرمەشقایەتی ژەنا ئەنجام بڎریۆ، پێویستە پېسە ژەنا ۋەرکەوتوو کوردسانی و ئێرانی بەشێوێوە گەورەتەر ڕابەری ئی ئایدیایە بکەرمۍ. سەروو بنەماو زانستوو ژنۆلۆژی هیچ ژەنێوە بێ پارێزنای و بێ ڕێکوستەی نەمەنۆوە. بە زانستوو ژنۆلۆژییوە متاومۍ پېوەرە ئاستوو پەرەوەردەی و زانستی شۆڕشی قوڵتەر بکەرمۍ. چا ڕوانگۆ متاومۍ بە دەرفەتەتەکا ئیسەیما جە وەخت و شۊنەو ۋێشەنە بەکاربارمۍ."

'ڕا نەڎەیمۍ'

جە بەردەوامی گفتووگۆکانە، سەرنج وزیا سەروو زیندانیا ژەنا سیاسی و سیاسەتوو جە قەنارەدای ڕژێمی و ئینە وچیا: " بە زیندانیکەردەی و جە قەنارەدای گەرەکشانە ئیرادەما جە بنە بارا. ڕژێموو ئێرانی دلۍ گرڎوو ڕژێمە ئەرەگیرەکانە ئاستێوە بەرزوو ئی سیاسەتەیە ڕاوەبەر مکەرۆ. بەسەدان ژەنی کە پەی ئازاڎیی کۊشیانە جە ئیساتێنە ئینۍ زینڎانەکا ڕژێمینە، جە نمونەو زەینەب جەلیلانۍ هامخەباتێما. کە ماوەو ١٦ ساڵان ۋەرا ۋەر بە گرڎ جۆرە تنووتیژیێوە ڕژێمی جە زینڎانەنە مدرامان مکەرۆ و چنڎین ژەنە زیندانیۍ تەرۍ سەروو ڕاو خەباتینە سیاسەتی فاشیستی ڕژێمیشا پوچ کەردۆ و زینڎانشا فاڕا پەی مێڎانوو ۋۍ پەرەوەردەکەردەی. پۊکەی جە ۋەرا ۋەروو جە قەنارەداینە هێزوو ۋێما بە یۊگێرتەیی بە بەقوتتەر بکەرمۍ و ئی سیاسەتەیە مردنمۍ. پېسە کەژاری چی پرۆژە تازەنە کە ئینا ۋەروو دەمیمانە، بە خەباتوو بەڕێکوستەکەردەی ژەنا زیندانی، گرڎ ژەنێوە پەرەوەردە و بەڕێکوستەی بکەرمۍ. پی ئایدیاوە خەباتما بەرمۍ ڕاوە."

'ئەندێشەو ژەنۍ، ژیۋای، ئازاڎیی مکەرمۍ بە ۋەننگەو ژیۋای'

ۋێپارێزنای ژەنۍ جە ۋەرکەوتوو کوردسانی و ئێرانینە ئینا چ ئاستێوەنە و پێویسا جە چ ئاستێوەنە پێکبۍ، جە ڕۊو چوارەموو گۆنگرەکەینە باس و خواسش سەر کریا و گفتوگۆی ڕۊشنش سەر کریا، جە بواروو ۋێپارێزنایۆ جە ۋەرا ۋەروو گرڎ هجومێوەنە کە جە ۋەرا ۋەروو ژەنانە ئەنجام مڎریۆ، ژەنی پەنەوازیۍ فرەشا بە ۋێپارێزنای هەن. ئینەیچ جە ئاخێزوو "ژەنی، ژیۋای، ئازاڎیینە" فرە بەڕۆشنی بەرکۆت. جە بارەو ئی پرۆژەیۆ گفتوگۆی گرنگ ئەنجام دریا. بەشێوێوە کوڵ و پوخت چوارچێوەو گفتوگۆکا پی جۊرە بۍ: "جە ۋەرا ۋەروو ئا هجووما ڕژێمی ڕەگەز پەرس و قڕکەروو ئێرانینە، کە ۋەرا ۋەر بە ژەنا ئەنجام مڎریا، پیویسا ژەنی جە بواروو ۋێشەنە ۋێش بەڕێکوستەی بکەرۆ و پەنەوازشا بە یۆگێرتەی و و ۋێپارێزنای هەن. پێویسا ژەنی جە گرڎ بوارێنە جە ۋەرا ۋەروو هجوومەکانە ۋێش پارێزنۆ، پەی ئانەی بتاوۆ خاوەنداری جە کۊشیای، بیەی و ئشناسنامەو ۋێش بکەرۆ. وە جە بواری دەرونی و جەستەیچەنە پێویسا زەنی یۊترینی فێرو ۋێپارێزنای بکەرا. جە ئاخێزوو "ژەنی، ژیۋای، ئازاڎیی"نە پېسە ژەنۍ ئینەما بە ڕۆشنی وینا. پېسە ژەنۍ بە قۆناغ و هجوومی دژوارەنە ۋیەرمۍ.  ۋەرووئانەی گەر ۋێما نەپارێزنمۍ، ئانە مەتاومۍ خاوەنداری جە بیەی و ئیرادەیما بکەرمۍ. پەی ئانەی بیاومۍ پینەیچ پێویسا جە دەوروو فەلسەفەو "ژەنۍ، ژیۋای، ئازاڎیی"نە کوۍ بیمۍ. ۋەروو ئانەی ڕابەر ئاپۆ بەشێوێوە بەقوەت فێروو ۋێپارێزنایما مکەرۆ. پێویسا پېسە ژەنا ۋەرکەوتوو کوردسانی و ئێرانی فەلسەفەو ژەنۍ، ژیۋای، ئازاڎیی" بکەرمۍ بە ۋەننگەو ۋێپارێزنای و ۋۍ بیەی و ژیۋای"

جە ڕۊو پەنجەمینە قەرار و پلانسازی پەی ٢ ساڵا بەرکریا. قەرار و پلانسازییەکۍ پی جۊرەنۍ:

١-کۊشیای پەی ئازاڎیی جەستەی ڕابەر ئاپۆی سەرچەمەو گرڎ کۊشیایێما بۆ.

٢-کۊشیای هامبەش جە چوارچێوەو سیستموو هامبەش و ژەنانە ئامانجی سەرەکی کەرکەردەی بۆ.

٣-جە بوارو ۋێپارێزناینە زیاتەر ۋێما بەقوەت و پەروەردە بکەرمۍ.

٤- YJCRسەروو بنەماو ۋۍ ڕێکوستەی و ۋێپارێزنای، بیاونمۍ بە گرڎوو ژەنە گەنجا ۋەرکەوتوو کوردسانی و ئێرانی.

جە ڕۊو ششەم و ئاخرینە پەی تازەکەردەیۆ دەسەی ڕاوەبەری گلێرگەو ژەنا ئازاڎیی ۋەرکەوتوو کوردسانی (کەژار) هۊرچنیەی ئەنجام دریا و ١٥ ئەندامۍ دەسەی ڕاوەبەری کەژاری هۊرچنیۍ.

جە دمادمایینە هامسەرۆکەو کەژاری زیلان ڤەژینە قسۍ ئاخرەش کەردە و واتش: "ئی کۆنگرەما بە یاڎکەردەیۆ گەشمەرڎا دەسپنەکەرد و هەتا دمایی بەردەوام بی. بە گرد حەز  و خەباتێوەما حۊڵ بڎەیمۍ خاوەنداری جە ڕەنجوو گەشمەرڎا بکەرمۍ. ئی خەباتە چی قۆناغە فرە هەستیارێنە بە ئەنجام بیاونمۍ. جە ۋەرکەوتوو کوردسانی و ئێرانیچەنە بەشێوێوە عالتەر خاوەنداری چی خەباتیە بکەرمۍ. پەی ئانەی بتاومۍ ئی ئەرکەیە بەتەمامی بەرمۍ ڕاوە پێوسا فرە بەعالی خاوەنداری جە ۋێڕاوەبەریما بکەرمۍ. چی گۆنگرەنە گفتوگۆ سەروو مژارە گرنگەکا کریا و شۊنەو چارەسەریرە گێڵایمۍ پەی گرڎوو ئا زەحمەتییا چی قۆناغێنە ڕووبەڕوو ژەنا بیەنۆ. ئاخرەکەش تاجداری بۆ. چی ڕووانگۆ داوا جە گرڎوو ژەنا ۋەرکەوتوو کوردسانی و ئێرانی، جە هەمان وەختەنە جە تەماموو ژەنا جەهانی مکەرمۍ،  بتاومۍ سەروو خەتەو ئازاڎیی و دیموکراسی بە فکر و فەلسەفەو ڕاپەر ئاپۆی، چێروو چەترەو کەژارینە ئەرەکۊشمۍ."

جە دماینە کۆنگرە بە دروشمەکاو 'بژیۋۆ سەرۆک ئاپۆ'، 'بێ سەرۆکی ژیۋای مەبۆ' و 'ژەنی، ژیۋای، ئازاڎیی' بە گێڵنای زماۋنۍ دمایش پنە ئاما.