کژار پېوەس بە جەنگو ئیسرائیل-ئێرانی جەختش چانەیە کەرڎۆ دەرەنجامو جەنگەکەی ئاژەو ژەنا قورستەر مەکەرۆو واتش: " بەدڵنیاییوە ئی جەنگە، جەنگو ئازادیی گلېرگەی و به تایبەتی ژەنا نییا، هیچکام جە دواکارییەکا گلېرگەی و ژەنا جە بەرنامەو ئیسرائیلی و ئێرانینە نییا."
جەمەو ژەنا ئازادی ۋەرکۊتوو کوردەسانی (کژار) پېوەس بە جەنگو بەینو ئیسرائیل-ئێرانیوە جە ئەرەیاۋنێوە نویسیانە بانگەوازش پۍ یۊگێرتەیی و هامدەنگی ژەنا سەرو ئاستو ڕێکوزیای و پارتەکا کەرڎ و واتش: " داوا جە گرڎ کەس و چینەکا گلېرگەی مەکەرمۍ کە جە جوگرافیاو سیاسی ئێرانینە بە یۊگێرتەیی و پەشتیوانی زیاتەر کۆمیتە و ئەرەمەرزیا جەماوەرییەکا ئەرەمەرزنارە."
دەقو ئەرەیاۋناکەو کژاری پی جۊرەنە:
"جە ششەمین ڕۆو جەنگو ئیسرائیل-ئێرانینە، ئیسرائیل هرووژمېوە ۋەرفراوان و قورسش کەرڎ سەرو مېیانە سەروازییەکا، مېیانو پەخشو دەنگ و رەنگو ئەرەیاۋناو ئێرانی و خەسەخانەکۍ بڕۍ جە شارەکا ئێرانی و کۆمارو ئیسلامیچ تا حەدێوە هرووژمو ۋەرپەرچدایشۆ ئەنجامدان. ئانەی کە ڕۊشنا جەنگەکە درێژە کېشۆ و زەرەری ماڵی و گیانی زیاتەرش چنرە گنۆوە.
ئا جەنگەی ئینا ئارانە دەرەنجامو سیاسەتە وەڵێوەختە دیاریکریاکا سیستەمو سەرمایەدارییا کە هامکات چنی دیزاین کەردەیۆ سەرجەنۆ ۋەرکۊتوو مېیامینی دەسش پنەکەردۆ کە ئیجارەشا حکومەتو ئێرانیش بە ئامانج گێرتەن. هەرپاسە بە دەسپنەکەردەی جەنگو ئیسرائیلی دژ بە ئێرانی گەرەکشانە ڕژیمو ئێڕانی ناچار بە ئەنجامدای فاریای هامکات چنی سیستەمو جەهانی بکەرا، یانی مەرام جە ئەرەنیشتەکا پەی ڕەوایەتیدای بۍ پا هرووژما کە ئیسە دەسشا پنەکەرڎەن.
جە ما بەینو جەنگو دۊڵەت-نەتەوەکانە ژەنی و زاوڵێوە فرۍ کوشیانە و بانۍ بە قوربانی، ئیسەیچ جەنگو ئیسرائیل و ئێرانیچ حیچ جیاوازیێوەش نییا چا چوارچێوەنە، بەڵام نمەبۆ جە یاڎ بکریۆ کە ساڵانە ڕژێمو کۆمارو ئیسلامی بە جابەجێکەردەی سیاسەتو جە قەنارەدای، کوشتەی ژەنا، پەرەدای بە هەژاری، بێهەرمانی و...، دژو گلېرگەی جەنگش ڕاوەبەر کەرڎەن. بە تایبەتی متاومۍ واچمۍ بە ساڵانە جە ما بەینو ڕژێمو کۆمارو ئیسلامی و گلېرگەینە بۆشایێوە گۊرە بە تایبەتی جە ما بەینو ژەنانە ڕووەشدان و چی ئاژەنە ئی بۆشاییە زیاتەر قووڵتەر بیەنۆ.
بەدڵنیاییوە ئی جەنگە، جەنگو ئازادیی گلېرگەی و به تایبەتی ژەنا نییا و هیچکام چی دواکاریا گلېرگەی و به تایبەتی ژەنا جە بەرنامەو ئیسرائیل و ئێرانینە نییا. بەکارئاوردەی دروشمۊو "ژەنی، ژیۋای، ئازادی" جە لایەنو نوێنەرا دۊڵەت نەتەوەکاوە قەد نمەتاوۆ مزانی ئازادی و ڕوانێوە زەریفی بۆ پەی گلېرگەی، بەتایبەتی ژەنا. ئاڎیچ جە کاتێنە حیچ ئەنەیاوای و گرنگیێوە بە ئەوەکۊشای حەقەتینەو ژەنا نمەڎا. هەرپاسە پەنەوازا وچیۆ کە "ژەنی، ژیۋای، ئازادی" نە دروشمێوەنە پەی هاندای و کێشتەی رای گرڎیی ئێرانی، بەتایبەتی ژەنا، بەڵکم ئینە ئەزموونو ژیۋای ژەنا و جەمە پیێوە کۊششکاریا کە جە ماوەو یەرە ساڵی ۋېیەردەینە، پەی پارېزنای شوناس و بیەو ۋێشا، بە رۆحێوە فیداکارانۆ جاڎەکێشا کەردۍ بە مېڎانوو ئەوەکۊشای.
ئەوەکۊشایە دیموکراتیکەکۍ بە سەرمەشقایەتی ژەنا نیشانەش دان کە داواکارییەکێشا هامکات چنی بەدیئاوردەی ژیۋایۍ ئازادی پەی گرڎو چینەکا گلېرگەو ئێرانی ڕووە مڎۆ و بەدەسئاوردەی ئا داواکارییا تەنیا جە ڕاو دمایئاردەیا بە سیاسەتو مېیانگەرایی، ئایینی، رەگەزپەرەسی و نەتەوەپەرەسیوە بەدی مۍ. جەنگو دۊڵەت نەتەوەکا و سیستەمو سەرمایەداریی جەهانی، هەمان هۊرچنیەو بەینو خراپی و خراپتەریا کە هەردووەلا سەرو ژەنارە سەپنانەش، حەرچڼە ژەنی تەنیا بە ۋەرەنگاربیەیۆ و ڕاگێرتەی چا ئاوەزیەتەیە دەسشا بە ئەوەکۊشای نەکەرڎەن، بەڵکم ئاڵاهۊرگیرۍ و سەرمەشقۍ ئەرەمەرزنای ئازادی و دیموکراسینۍ جە ئێران، ناوچەکە و ۋەرکۊتوو مېیامینیچەنە. شۆڕشو "ژەنی، ژیۋای، ئازادی" نموونێوە ڕۊشنو ئەوەکۊشای و سەرمەشقایەتی ژەنان پەی دیموکراتیزەکەردەی گلېرگەی.
کژار پەی بەدەسئاوردەی ئازادی پەی گلېرگەی و بەتایبەت ژەنا، گرنگی زیاتەر بە ڕێکوزیایی زیاتەری گلېرگەی و بەتایبەت ژەنا مڎۆ و جەخت چانەی مەکەرۊوە کە جە ما بەینو جەنگو دەسەڵاتداری سیستەمو پیاسالارینە، بە دڵنیاییوە حیچ هیوایۍ پەی ئازادی و یەکسانی بیەیش نییا، پۊکەی داوا جە گرڎ کەس و چینەکا گلېرگەی مەکەرۆ کە جە جوگرافیای سیاسی ئێرانینە بە یۊگێرتەیی و پەشتیوانی زیاتەر کۆمیتە و ئەرەمەرزیا جەماوەرییەکا ئەرەمەرزنانە. هەرپاسە داوا جە گرڎو ژەنا دلۍ پارت و ڕێکوزیا ئازادیوازەکا مەکەرۆ، بە هامکاری زیاتەر بانۍ بە هامدەنگې ژەنا ئێرانی. سەرو ئی بنەمایۍ جیا جە جبەرو پارتەکا، جە کوردەسان و ئێرانەنە ڕێکوزیا جەماوەرییەکۍ جە ئێرانەنە بە گرڎیی هەنگامېوە بنەڕەتیێنۍ پەی وەرقەرار کەردەی دیموکراسی، چونکی بەبێ ژەنا نمەتاومۍ باس جە ئایندێوە ئازادی و یەکسانی پەی گەلاو ئێرانی بکەرمۍ."
