کۆردیناسیۆنو کەژەکەی پەی ئا چالاکییە تاریخییەی کە شارو کۆڵنو ئەڵمانیاینە پەی ئازادی ڕابەر ئاپۆی ملۆڕاوە، پەیامش کیاستو ماچۆ: "کاتو ئانەینە ئەرەکۆشای ناکۆتاو گەلەکەیما و گەشمەرڏاما پەی کوردەسانی ئازادی و ڕابەرایەتی ئازادی بیاونمێ بە سەرکۆتەی".
جە چوارچێوەو هەڵمەتەو "ئازادی پەی عەبدوڵا ئۆجەلانی، چارەسەری سیاسی پەی پەرسو کوردی"نە جە شارو کۆڵنو ئەڵمانیاینە چالاکیێوە گەورە کریا، کۆردیناسیۆنو کەژەکەی پەیامێوە نوویسریاش پەی چالاکییە تاریخییەکەی کیانا.
پەیامەکەو کەژەکەی ئینەن:
"گەلو وڵاتپارێزنیما؛ بە هەستو شۆڕشگێڵنیۆ و جەدڵۆ سڵامتا وەنە کەرمێنە. قەول مرەیمێ ئەرەکۆشاو ئازادی بە سەرکەوتەی تاجدار کەرمێنە. دیسانۆ گەرەکمانە پنەتا واچمێنە، سەربەرزۍ و سەرفرازینمێ کە ڕۆڵۍ ئی گەلەینمێ. ڕۆڵۍ ئا گەلەینمێ کە سەر پەی ستەمی مەنامنۆرە، جەنگ کەرۆنەو و زەریف بۆنە، پاگیری سەرو ئازادی مکەرۆنە.
گەلی ئازاما، پلانەو چۆکدای جە سەدەو ٢١ پەی ماڕای ئەرەکۆشای ئازادی گەلەکەیما و تەمامکەردەو قڕکەردەی کوردی مچیارە. ئی پلانێ سەرەتا جە ئیمراڵینە جابەجێکریا. سیستەمو قڕکەردەو ئیمراڵی پێسەو سیستەمو قڕکەردەو گەلو کوردی بە پاگیریۆ ملۆڕاوە. چونکە ڕابەرایەتی نوێنەرایەتی ئەرەمەزیارێوە ئایدۆلۆژی و سیاسی و پاشەڕۆی و بییەو گەلو کوردی مکەرۆ. دۆڵەتو تورکیچ پەی ئانەی گەلو کوردی بە سیاسەتو نکۆڵی_پاکتاو و پەراوێز کەردەی قڕکەرۆنە، سەرەتا هجومش کەرد سەرو ڕابەرایەتی گەلەکەیما. تاریخەنە هەر پاسەش کەردەن، ڕابەرو و سەرمشقو گەلیشا تەسفیە کەردەن.
ڕابەر ئاپۆ پەی ئانەی گەلو کوردی چی چارەنووسیە ڕزگار کەرۆنە، بە بنیاتنیاو ئەرەمەزیارەی ڕابەرایەتی ئازاد کەرەگش پێ گەلو کوردی جە قڕکەردەی ڕزگار کەرۆنە، پەی ئانەیچ مدرامانێ بێ وێنەش وەڵێ وست.
ڕابەر ئاپۆ پی مدرامانەیە شکستش با هێزە پیلانگێڵنایە ئارد کە قەرار بێ تەسفیەکەردەو تەڤگەرەکەیما و گەلەکەیما دا، بە پارادایمو نەتەوێوە دیموکراتیکی و کۆنفیدرالیزمو دیموکراتیکی گەلو کوردیش کەرد بە هێزێوە ستراتیژی جە وەرکەوتو ناوینینە. پەنەوازا فرە خاس جانەیە یاومێنە کە ڕابەر ئاپۆ جەنین دژو سیستەمو قڕکەردەو ئیمراڵی مدرامانش کەرد و ئا گەلەی جە چنگو قڕکەردەینە پێ کەردش بە هێزێ شکست نەکەوتەی. بەمەڵامەتو ئی مدرامانەی ڕابەر ئاپۆ، ڕژێمو فاشیستو دۆڵەتو تورکی جە ماوەو ٨ ساڵا ویەردەینە بەردەوام پێ جە سەپناو گۆشەگیریی تن سەرو ڕابەرایەتیما. دۆڵەتو تورکی گەرەکشا گەلەکەیما بێ ڕابەر پاسۆوە و بە بێ ستاتۆیی گەلەکەیما بەردەوامی پنە دۆنە. چێوە جارێ تەر ئەرەیاونمێش، پێسەو ژەنی و گەلی نزیکێنمێ چا ڕووەیە کە سیستەمو قڕکەردەی ئیمراڵی ماڕمێنە. دیسان ئەرەیاونمێش، جە کەسێتی ڕابەر ئاپۆینە، ئی جارە ڕابەرایەتی گەلو کوردی ئەنجام دیاری کەرۆنەو و سەرکنۆ.
گەلی ئازاما؛ جەسایەو بەشداربیەیشا جە هەڵمەتەو "ئازادی پەی ڕابەر ئاپۆی، ستاتۆ پەی کوردسانی" جەسایەو ئەرەکۆشای و مدرامانو قارەمانانەو گەریلای، دیدار چەنی ڕابەر ئاپۆی ئەنجامدریا و زانیاریما دەربارەو تەندرووستی ڕابەر ئاپۆ ورگێرت. پێسەو تەڤگەرو ئازادیی ژەنا و گەلی سڵامو ڕابەر ئاپۆیما. پنەیاوا. دووپاتش مکەرمێوە، بەشێوێوە سەرکەوتە جواب و ئی سڵامەیە مرەیمێوە و ئا سڵامەی کەرمێ پاساوەو دیداری جەنی ڕابەرو ئازادی.
سڵامو ڕابەرایەتی بانگەشەو سەرکەوتەو ئەرەکۆشای ئازادیی ژەنا قەوەتەر مکەرۆ، بێگومان سڵامو ڕابەرایەتی مۆراڵ و ئیرادەو ئەرەکۆشایش زیاتەر کەردەن. بەڵام ویرما نەشۆ، ڕابەر ئاپۆ واتش: "گۆشەگیری بەردەواما"، پەنەوازا زانمێنە کە گۆشەگیری بە دیدارو بنەیانەی دمایش پنە نامان و سیستەمو قڕکەردەی بەردەواما. ڕژێمو فاشیستو تورکی، پەی ئانەی ئەرەکۆشای دژو گۆشەگیری لاواز کەرۆ و بەئاسانی مەڵامەتێ تازا پەی هجومو قڕکەردەی بیزۆوە، جەنگی تایبەت مکەرۆنە. جە پرۆسەو سەرجەنۆی دیزاینکەردەیۆ وەرکەوتو ناوینی، ڕاگیری کەردەی جە پێکئاردەو ستاتۆو گەلو کوردی، سیاسەتو سەرەکی دۆڵەتو تورکین چی قۆناغەنە. کاتێک دۆڵەتو تورکی زاناش بە سەروازێ مەتاو ئی سیاسەتەیە بە ئەنجام یاونۆنە، پەناش بەردە وەر جەنگی تایبەتی. ئامانجو دۆڵەتی ئانەن، گەلو کوردی چەنی گەلا هەرێمەکەی گنا ناکۆکییۆ و جەنگ کەرا و بۆنە لایەنێ جەنگی. بە واتەی پێسەو پرۆسەو چارەسەریچ ئەرەکۆشای لاواز کەرۆنە و جە لە ئەرەکۆشای دور وزۆوە. جگە جە فێڵێ قێزەونەی تازێ، نەشتەرگەری ویربەردەیۆ و مەشک شۆردەیۆ، حیچ وەڵکەوتێوە نییا ئارانە، ئانەی گەرەکشانە چەمکو ڕاسکەردەیۆن. جە ڕاو دەس سەرەگیرتەیرەو شارەوانییەکاوە نیشانەشادا کە ئیرادەو گەلی قبووڵ مەکەرا و درێژە بە سیاسەتو قڕکەردەی مرانە.
سەرەڕاو پشتگیری میانەتەوەیی و هەرێمی، سەرەڕاو تەکنەلۆژیاکا کە شانازیش پۆوە کەرا، سەرەڕاو چەکی کیمیایی و گرد جۆرێ هجومێ قڕکەردەی، جە وەرانوەرو ئەرەکۆشای تەڤگەرو ئازادیی کوردستانی بێچارە مەنێنێوە. تەنانەت جە خاڵەو مەڕیات و دۆڕیاینە. پاسە دیارا یاوانە کە شکست مارا، پۆکەی ڕووە جە فێڵێ و تەڵەکەی مکەرە.
تاکە ڕاو دلێنە بەردەی ڕادەس بییەی، ماڕاو گۆشەگیری ئیمراڵی و بەدیئاردەی هەلومەرجو خەباتو ئازادی ڕابەرایەتیا. جگە جانەیە پرۆسەو چارەسەری و ئەرەکۆشای مەبۆ. تاکە موخاتەبو چارەسەری سەرو نامێ کوردی، ڕابەر ئاپۆن. مدرامانو گەلەکەیما و هەڵمەتەو ئازادی، موخاتەبش دەستنیشان کەرد. ئازادی گەلو کوردی بە گەرەکەردەو ئەرەکۆشای و بەرزکەردەیۆ مدرامانی مێدی. شمە هامڕێو ڕابە ئاپۆیندێ، ئار چەنی شمە هەنگامێش نیێو و چەنی شمەیچ دەسش بە ژیوێوە تازەی کەرد. ئینە ماناو بەدەسئاردەی ئیرادێوە پۆڵایینیا، ماناو هۆشیاری حەقیقەتی و بەدەسئاردەو ئازادییا. باوەڕما پاسەن بە ئیرادەدای و بە ڕاسی ئازادی وێتا ئەرەکۆشای دژو گۆشەگیری و چەمکو تەسفیە بە سەرکەوتەی بەراڕاوە.
پێسەو تەڤگەرو ئازادیی ژەنا کوردستانی (کەژەکە) دووپاتش مکەرمێوە بێجگە جە مسۆگەرکەردەو ئازادی جەسەیی ڕابەری حیچ قەرارو و نزیکایەتی و هەڵوێسێ قبووڵ مەکەرۆ.
ئێمە واچمێنە کاتو ئانەین ئی ڕاپیما ئازادییە بە ماڕاو گۆشەگیری ئیمراڵی و دیدارو ڕابەرایەتی ئازادت تاجدار کەرمێنە.
کاتو ئانەینە ئی ڕاپیمایە بە بەدیئاردەی حەسرەتو هەزاران ساڵەو گەلەکەیما جە وەرنیشتی و سەرنیشت و وەرکەوت و بانیشتی یاونمێنە ئامانج.
کاتو ئانەین ئەرەکۆشای ناکۆتاو گەلەکەیما و گەشمەرداما پەی کوردەسانی ئازادی و ڕابەرایەتی ئازادی بیاونمێ بە سەرکەوتەی.
پۆکەی تاریخ جە گرد کاتێ زیاتەر ، ئەرەکۆشای و خەبات و ڕێکوزیای و چالاکی و جە ئێمە وازۆنە. بە وەشەویسی و دڵسۆزییۆ جە کانگاو دڵیۆ سڵامتا ۋونە مکەرمێنە، باوەڕیما چانەن کە ئا بەهاو بییەی و ئەرەکۆشایە تا ئیسە بە فیداکاریێوە گەورۆ بەردەنتا ڕاوە، فراوانتەرش مکەردۍ.
بژیوۆ ڕابەر ئاپۆ
بژیوۆ ئەرەکۆشای ئازادی گەلو کوردی
ژەنی ژیوای ئازادی
گەشمەرڏۍ مەمرا".
