جەمەو ژەنا کوردسانی (کەژەکە) جە ماڵپەروو ڕسمی ۋێشەنە، پەیامێوەش پۍ ژەنا شۆڕشگێڵنوو ئەفغانستانی (راوا)ی کیاست.

جە پەیامەکەو کەژەکەینە ئامان، سەرەتا جە کەسایەتی شمەنە، ٨و مارسی جە گرڎوو ژەنا ڕەنجدەروو جەهانی و گرڎوو ئا ژەنا کە جە دژوو دەسەڵاڎداری پیای، هەژمونوازیی، ئاینپەرسی و نەژادپەرسی کۊشیانە مبارەک کەرمۍ، بە ڕێز و حورمەتۆ یاڎوو گرڎوو ئا ژەنا کەرمێوە کە گیانوو ۋێشا بەخت کەرد، وەعدما دان کە کۊشیای ئاڎیشا زینڎە ڕاگێرمۍ و وەرمەکاشا بەدی بارمۍ.

ئانەیچشا ئەرەیاۋنا، جە هەر وڵاتێوەنە کۊشیای جە دژوو هێزە ئەرەگیرەکا پیای کریۆ، جە ئەساسەنە کۊشیاین جە دژوو هەمان سیستمی. ۋەروو ئی مەڵامەتیە کۊشیای شمە پێسە کۊشیای ۋێما موینمۍ و جە کۊشیای ۋێمانە درێژە بە ڕاو شمەیچ مڎەیمۍ، جە ئیسەنە ئانەی موینمۍ کە سیستموو پیاسالاریی و سەرمایەداری گرڎ دەورێوە پەی سەروەری ۋێش بە سیاسەتوو قڕکەردەی ئەنجام مڎۆ، هەر ڕووە و جەنگێوە هۊرگیسنۆ و ئینسانەکا جە یاگۍ و وڵاتوو ۋێشانە کەرۆ ئامانج، خاک و سەرچەمەکۍ سەروو زەمینی و چێروو زەمینیشا ئەرەگیرکەردەن، ڕەوایەتی بە مەردەی مڎۆ، هەژاری، کۆچبەری و ئەشکەنجەو مرۆڤەکا. ژەنی و گەل چێروو ئی سیستەمەینە یاوێنۍ بە ئاژێوە کە تواناو هەناسەدایچش نەمەنەن.

جە دمادمایی پەیامەکەیچەنە ئەرەیاۋنانش، گەر سەروو ئاستی هەرێمیی تا ئاستی جەهانیی ۋێما ڕێک وزمۍ و پارێزنای سرووشتی ۋێما وەڵۍ وزمۍ، ئانە حیچ هێزێوە مەتاوۆ شکسما پنەبارۆ ، چی ٨و مارسینە بە جۆش و خرۆشوو ''ژەنی ژیۋای ئازاڎیی''ۆ بەرەو ئاخێزوو ژەنا هەنگامە منیەیمۍ و پێسە واڵۍ شمە ماچمۍ حیچ چێوۍ جە دەس مەڎەیمۍ، ژیۋای ئازاڎیی ۋێما و جەهانی گەورەیما بەدەس مارمۍ''.