کۆردیناسیۆنوو کەژەکەی سڵامش ئاراسەو ئا ژەنا کەرد کە جە مبارەکباییەکا ٨و مارسینە دەورشا گێڵنان و ئەرەیاۋناش، "تەنیا ڕاو مردنای سەردەموو وەحشیگەرایی مۆدێرنی، رێکوستەکەردەی ئاخێزوو ژەنان سەروو بنەماو فەلسەفەو 'ژەنۍ، ژیۋای، ئازاڎیی".
ئەرەیاۋناکەو کۆردیناسیۆنوو کەژەکەی، کە سەروو ماڵپەڕوو ڕسمی ۋێشاوە وەڵا کریانۆ پی جۆرەنە:
"سڵام جە زەنا کۊششکاری کەرا کە بە دەنگ، وتار، هۊرپڕای و هەلهەلەکاشا مێڎانەکێشا پەڕۍ کەردێوە، جە دژوو کردەوە وەحشیگەرایی و دڕندەییەکا سیستموو پیای ۋێڕاگری کەرا، ۋنەپەرسایۆ جە سیستموو پیای-دەوڵەتی ستەمکاری کەرا. مبارەک بایی جە گرڎوو ئا ژەنا کەرمۍ کە جە مەراسیمەکا ڕۊو جەهانی ژەنا رەنجدەروو ساڵەو ٢٠٢٤ رەنج و دەورشا بۍ.
ئا ژەنۍ کە چێروو فشاری رەگەزپەرسی کۆمەڵایەتینە ٢٤ سەعاتەو ڕۊی قەیران، کۊکوشی و ستەم موینا، ئێساڵ جە ٨و مارسینە جارێوەتەر بە ئازایەتی، بە قەرارداریوە واتشا 'من هەنا' و راسی کۊشیایۍ رادیکاڵشا خوڵقنا.ژەنی ۋەرا ۋەروو سیاسەتوو کۆلۆنیالیستی، قڕکەردەی، گێچەڵۍ و دەسدرێژی مردێوە، کە جە کایەکاو ژیۋاینە و جە گرڎ ساتێوەنە سەپیانە. ژەنی جە گردوو چالاکیەکانە بە دەنگێوە بەرز ناڕەزایەتی ۋێشا جە دژوو رێکوستەی و مەژگی رەگەزپەرسوو دەسەڵاتپارێزی وست ڕووە، کە ۋەرپرسیار و تاوانباروو کردەوەکان جە دژوو ژەنا. حەرپۊکەی ٨و مارسوو ٢٠٢٤ بی بە ڕەمزوو بەرجەسڎەیی هوشیاربیەیۆ ژەنا، ئەنەیاوای، ئیراڎەبیەی و رێکوستەی. کۊشیای ژەنا ئارۆ بیەن بە رادیکاڵتەرین کۊشیای مافەکاو مرۆڤی و دیموکراسی.
ئا دەسکۊتۍ کە بە کۊشیای ژەنا خوڵقیێبێنۍ جە ڕاو ئاخێزوو ۋەرنیشتیۆ یاوۍ بە ئاستێوە بەرز. ئێمە ٨و ئاداروو ئێساڵی بە قەرارداری پێشوازیما چانەی کەرد کە ئاخێزوو ژەنا ۋەرنیشتی کەرمۍ بە موڵکوو ژەنا ۋەرکەوتوو دلێڕاسەی و جەهانی. ئا جەنگۍ بە دەسوو فاشیزمی پیای-دەوڵەتی دەسپنەکەرا فرەتەرین کاریگەری کەرا سەروو ئێمەی ژەنا، زاوڵا، گەلا و ژیۋگەی. ۋەروو ئانەیچە جە دژوو قەیرانۍ، جەنگ، وڕای، کۆچبەری، نەژاڎپەرسی، نەتەوەپەرسی و رەگەزپەرسی فاشیزموو دەوڵەتی پیا سالاری، پێسە ژەنۍ مشۊم ئێمە نەک هەر یەک ڕۆو ساڵی، بەڵکم جە گرڎ ساتێنە پۍ ژیۋایۍ ئیکۆلۆژیکی، ئازاڎی و دیموکراتیکی دلۍ رێکوستەی و کۊشیاینە با. ساڵەو ٢٠٢٤ کە جەنگی ئابوری، سیاسی، کولتوری و سەروازی کاریگەریش کەردەن سەروو ژەنا، گەلا و ژیۋگەی، جە روو کۊشیای ژەناوە ساڵێوە گرنگەنە. راسی ٨و مارسی بی بە ئێژاتەری ڕەمزوو ئانەی. چی ساتە هەستیارەو تاریخینە تەنیا ڕاو مردنای سەردەمی وەحشیگەرایی و دڕندەیی مۆدێرنەی ئانەنە کە سەروو فەلسەفەو ژەنی، ژیۋای، ئازاڎیی ئاخێزوو ژەنا رێکوزیۆ. جە دژوو سیستموو پیای کە سات دماو ساتی جەنگ، کۆلۆنیالیزم، نەژاڎپەرسی، رەگەزپەرسی بەرهەم مارۆ و زیاڎش کەرۆ، جە کەسایەتی ژەنانە ژیۋای کوشۆ، مشۊم ئێمە هێزو هوشیاری و کۊشیای بەرز کەرمێوە و پی جۆرە هەنگامە بنیەیمۍ. کۊشیای ژەنا ئیتر گێڵایشۆ نییا. حەرپۊکەی مشۊم عالتەر رێکوزیۆ، خەتەو کۊشیای هامبەشی وەشکریۆ و پی جۆرە ئێمە متاومۍ سیستموو ستەمکاری کە وەختش سەرەرە شیەن، دلێنەبەرمۍ.
وەخت وەختوو گوڕداین بە کۊشیای، وەختوو بەگەردوونیکەردەی و هامبەشیکەردەی کۊشیاین. وەخت وەختوو بنیاڎنیای ئاخێزوو ژەنان سەروو بناغەو فەلسەفەو ژەنی، ژیۋای، ئازاڎیی. پێسە کەژەکەی بە جۆش و ناوازەیی ئاخێزوو ژەنێوە ئێمە جارێوەتەر سڵام چا ژەنا کەرمۍ کە ٨و مارسیشا ماناڎار کەرد.
پۍ سەروستەی کۊشیای ماف، دادپەروەری، یەکسانی، ئازاڎیی و دیموکراسی ئێمە وەعد واوەی کەرمێوە کە گرڎ ڕووۍ کەرمۍ بە ٨و مارسی".
