جە لەندەنەنە پایتەختو ئینگلتەریا نەورۆزو ئێساڵی بە درووشموو "سڵام جە ڕابەرایەتی مکەرمێنە، ئاشتی و گلێرگەی دیموکراتیک بنیاد منییەیمێ.' بە بەشداری زیاتەر جە ١٠ هەزار کەسێ جە گرڏو تەمەنەکاوە  جە فرەو شارەکا فینسبوری ئەنجام دریا.

موبارەک باییەکەی بە دەقێوە ڕێزونە نییای دەسش پنەکەرد و دماتەر وێنەو گۆرەو ڕابەر ئاپۆی، مەزڵوم دۆغان و گەشمەرڏا نەورۆزی جە مێڏانو مەراسیمەکەینە هورواسیێ. جە مەراسیمەکەنە چنین ڕێکوزیێ بەشدارێ بێنێ، بەشداربییەکێ بەتایبەت ژەنێ بە جلوبەرگو کلتووری وێشاوە مێڏانەکەشا ڕازناوە.

جە مێڏانو مەراسیمەکەینە بە بەردەوامی درووشمەکێ "بژیوۆنە سەرۆک ئاپۆ"، "پەکەکە گەلا، گەل ئینا چێ"، "بژیوۆنە مڏرامان و تشرینی"، "بژیونە گەریلا" و "ژەنی، ژیوای، ئازادی" وچیا و بەشداربییەکێ بە جۆشو سەرکۆتەیۆ بە گۆرانییەکا هونەرمەندا مەمۆزان، مەروان شان، یەڵدا عەباسی، گرووپی چوار نەوا و گرووپی هورپڕای تەشو زەماوەنێ و هورپڕایشا گێڵنا.

هامسەرۆکا ئەنجوومەنو گەلوو کوردی جە بەریتانیا سەعید سوروچ و سۆنگوڵ مەرەش وتەو دەس پنەکەردەو زەماوەنەکێشا پێشکەش کەردە و واتشا: "ئەوەکۆشایما بەردەوام بۆنە تا مسۆگەرکەردەو ئازادی جەسەیی ڕابەر ئاپۆی. ئاپۆیینمێ و سەربەرزێنمی. فیداییێ ڕاو ڕابەر ئاپۆینمێ."

دماتەر سیاسەتمەدارس کوردی ئەرجان ئاکبال قسێش کەردێ و واتش: "مشۆم دۆڵەتو تورکی بزانۆنە، ژیوای ئازادی سەرەنجام بە ئازادی ڕابەر ئاپۆی مێ ئاراوە. ئازادی ڕابەر ئاپۆی پاساوەو بنەڕەتی ژیوایمانە. ئازادی ڕابەری هێڵەی سوورمانە."

هەرپاسە جە مەراسیمەکەنە پەیامو موبارەک بایی نەورۆزو تەڤگەرو ژەنا کوردی، تەڤگەرو جوانا شۆڕشگێڵی، ڕێکوزیێ کوردەسانییەکا، فیدراسیۆنو عەلەوییەکا بەریتانیای، یۆبییەو هێزو دیموکرکراتیکی، مەلەکەپە و زینانیا سیاسی ونریاوە.

مەزڵوم عەبدی: نەورۆزو سەرکۆەتەی و ئازادی گەلەکەیمانە

فەرماندەو گرڏی قەسەدەی جەنەڕاڵ مەزڵوم عەبدی پەیامێوەش پەی نەورۆزو لەندەنی گیانا واتش: "نەورۆز نەک تەنها جەژنێوەن، جە هەمانکاتەنە نیشانەو ئیرادە و مڏرمانین. گەلوو چێردەسی جە تاریخەنە بە ئیرادەو ئازادی وێشا نیشانەشادان متاوانە ڕژێمو زۆردارەکاش وڕنانە."

مەزڵوم عەبدی جە بەردەوامی قسەکاشەنە واتش: "تاوەکو گەل گرڏ ئازاد نەبۆنە، حەجگیز بە تەمامەتی ئازاد مەبۆنە. پێسەو چنین ئەوەکۆشای و ژیوایما کاریگەریش سەرو بڕێ وەش مەکرۆنە، ئازادی و دیموکراسیما جە هەرێمەکە و جەهانەنە دەنگ مڏۆوە. هەر وەر ئینەی مشۆم پ بە هۆشیاری وەرپرسیارێتی تاریخی جوڵە بکەرمێنە، تاوەکو یاومێنە بە ئامانجو ئەوەکۆشایما بە ئیرادەوە بەردەوامێ بیمێ."

مەزڵوم عەبدی جە دماینە بە نامێ قەسەدەی و فەرماندە و جەنگاوەرا یەپەژەی موبارەک بایش جە گەلی کەرد و واتش: "بە ڕۆحو نەورۆزی، بە جۆش و خرۆشو مڏرامانی و سەرکۆتەی سڵام گیانونە. سەرکۆەتەی هین و ئێمەن. ئازادی گەلەکەیمانە."

سیاسەتمەدارو کورد عوسمان بایدەمیریش نەورۆزش مەبارەک کەرد.

کۆربین: مشۆم عەبدوڵا ئۆجالان ئازاد بۆنە

پەرلەمانتارو ئیسلینگتۆن جێرمی کۆربین واتش: "یۆ جە مەڵامەتە گرنگا کە ئینایمه چێ پەیامەکەو ئێژا عەبدوڵا ئۆجالانین. وەڵتەرێش چنین جارێ چێوە داواو ئازادی ئێژا ئۆجالانیما کەردەن و داواکارییەکەیما واوەی مکەرمێوە. مشۆم عەبدوڵا ئۆجالان ئازاد بۆنە."