جمیەروو گەنجا شۊڕشگېڵنی بەریتانیای جە ناوەنڎوو گلېرگەو کورڎی جە لەندەن بە دروشمەو "بەگەنجی دەسما پنەکەرڎ، بەگەنجی سەرۍ گنمۍ"، مەراسیم و مبارەک باییشا سازکەرڎ.

مەراسیمەکە بەدەیەقېوە بۍ دەنگی پۍ ڕېزگېرتەی جە یاڎوو ئا کەسا کە جە کۊشیای ئازاڎیینە گیانشا بەخشان دەسش پنەکەرڎ.

جە پەیامەکەو تەجەشەینە ئاماژە پانەی کریا، کە سیاسەتی فاشیستی دۊڵەتوو ترکی دژ بە گەلوو کورڎی جە کورڎسانەنە وەردەواما، بەڵام جە ۋەران ۋەرشەنە مدرامانۍ تاریخی گەریلای ملۊ ڕاوە.

جە پەیامەکەنە ئامان،"دژ پا دڕنڎەییە پەرەپنەدای کۊشیای کۊمەڵایەتی ئەرک و ۋەرپرسیاریۍ تاریخی و مرۊیی و نەتەوەییا".

جمیەروو گەنجا شۊڕشگېڵنی ۋیرش ئارڎۊ کە نزیک بە ٣ ساڵان حیچ زانیاریېوە جە بارەو ڕابەر ئاپۊیۊ ۋەردەس نیا و ئەرەیاۋناش،"کە گەلوو کورڎی و گەنجا حەتا زانیاری جە بارەو ڕابەر ئاپۊیۊ هۊرنەگېرا ۋەردەوامۍ با جە چالاکیەکاشا"

دیوارۍ هۊڵوو مەڕاسیمەکەی، بە لافیتۍ ڕابەروو گەلوو کورڎی عەبدوڵا ئۊجالانی و ئاڵاکا یەپەگەی و یەپەژەی و تەجەشەی ڕازیۍ بېنۍ. ۋەردەوام دروشمەکا "بژیۋۊ سەرۊک ئاپۊ"ی و "کورڎسان قەبرسان و فاشیستان"و "ژەنی، ژیای، ئازاڎیی" و "گەریلا"ی وچیېنۍ.

حەریۊ جە هونەرمەنڎا"زەینەڵ ئاڵا، سونا ئالانۍ و مەڕوان شانی"، سەرو تەختەو شانۊیۊ گۊرانیېشا چڕیۍ و مەراسیمە کە بە گۊرانیۍ و هۊرپڕای دمایش پنە ئامە.