عەلی کەنعان ئۆغڵو ئەرەیاۋناش؛ گلېرۊبیەکۍ بەینو ڕابەر ئاپۆی و شاندو دەم پارتی هەڵای پرۆسێوە بێ ناما و واتش، ئاڎۍ پەی ئاشتی بەشدارۍ پرۆسەکەی بانە و ئی پڕۆسە گرنگە بەتەنیا پەی دەسوەڵێوستەی ڕامېیاریمەدارا جیانمازمۍ.
عەلی کانعان ئۆغڵو، هامسەرۆکو واتەواچو کۆنگرەو دیموکراتیکی گەلا (هەدەکە)ی باسش جە هەڵمەتەو "یەک ملیۆن ئیمزای پەی ئاشتی" کەرڎ، کە قەرارا پێشکەش بە پەرلەمانو تورکیایش بکەرا.
"مشۊم جە گلېرگەنە داواکاری ئاشتی وەڵۍ گنۆ"
عەلی کەنعان ئۆغڵو واتش: "جە ١و ئۊکتۊبەریۆ هەرمانە سەرو پرۆسێوە مکەرمۍ کە هەڵای نامێش چنە نەنریان. ڕامېیاریمەدارا فرەتەریڼ قسۍ سەرو ئی پرۆسەیە مکەرا. ئێمە پېسە 'هەدەکە'ی کە پەی دیموکراسی و ئەرەمەرزیا مەدەنی و دیموکراسیەکا گلېرگەی کۊشش مکەرمۍ و ماچمۍ ئینە پرسێوە گرنگی کۆمەڵایەتییا، نمە بۆ داواو ئاشتی تەنیا بە دەسوەڵێوستەی سیاسییەکا بەرەو وەڵۍ بلۆ، بەڵکم پەنەوازا داواکاری ئاشتی چی گلېرگەنە وەڵۍ گنۆ پەی پاڵپەشتی چی داواکارییە، ئێمە هەڵمەتێوە ئیمزاکەردەیما دەسپنەکەردەن. ئی ژمارە [یەک ملیۆن] بێ گومان پېسە ڕەمزێوەن. ئێمە ژمارەکا وەردەمو هەرمانەکانە نمەنیەیمێرە، بەڵکم جیای ئانەی هەوڵمڎەیمۍ ۋێما بیاونمۍ بە گرڎ چین و توێژەکا گلېرگەی و ئاگادارێشا بکەرمێوە کە ئاشتی چڼە گرنگا. ئێمە گەرەکمانە گلېرگە بە زۋانی ۋێش ویستو ئاشتی بەربڕۆ و پەشتیوانی و پاگیریش سەر بکەرۆ. جە چوارچێوەو ئی هەڵمەتێنە جە ناوچە جیاوازەکانە هەرمانە مکەرمۍ؛ جە هەرێمەکاو ئیجە، ئاکدەنیز، ئەنادۆڵی مېیامین، بەحری سیا و تراکیانە گلېرۊبیەکا ئەنجام مڎەیمۍ، چنی گرووپە دلېینەییەکا گلېرۆبیەی ئەنجام مڎەیمۍ، باس جە زەرەرەکا جەنگی سەرو گلېرگەی مکەرمۍ و داواکاری ئاشتی بەرز مکەرمېوە و قسێش سەر مکەرمۍ. ئێمە فرە عال مزانمۍ هەرچی بۆ ئاشتی عالتەرا جە جەنگی. مەترسیەکۍ جەنگی گرڎ کەسۍ مگێراوە."
کەنعان ئۆغڵو ئاماژەش بە کاریگەریی سیاسەتو جەنگی پەی سەرو گلېرگەی کەرڎ و واتش: "بڕۍ جە کەرتەکا گلېرگەی جە ڕوو ئابوورییوە دەسو ئا جۆرە ڕەوتاوە مناڵنا. بودجە پەی سیاسەتی ئەمنی و سیاسەتو جەنگی کاریگەریش سەرو کەمتەرین حەقدەسی و خانەنشینی گەلی هەن. پۊکەی گەرەکمانە ئینیشا گرڎی چنی گلېرگەی باس بکەرمۍ و دڵنیۍ بیمۍ چانەی گلېرگە ئاینڎەو ۋێش پەی دەسوەڵێوستەی ڕامېیاریمەدارا جیانمازۆ."
"حکومەت ۋەرو ناچاری جە گلېرۊبیەکانە بەشدار بیەن"
کەنعان ئۆغڵو ئاماژەش پانەی دا کە گەل و گلېرگە ڕاسگۆیی حکومەتی وزانە چېرو پرسیارێوە و واتش: "جە پرۆسەو هەوڵەکا ئاشتینە کە جە ١و ئۆکتۊبەریۆ بەردەواما، بێ گومان پرسو ڕاسگۆیی حکومەتی هۊرسەنگنۆ. بێ گومان گلېرگە نیگەرانی و توڕەیی ۋێش نیشانە مڎۆ. باس جە پرۆسەو ئاشتی مکریۆ، بەڵام جە لێوەتەرۆ قەیوم منریۆرە، ئۆپەراسیۆن ئەنجام مڎریۆ و خەڵک گیریۆنە. پۊکەی بەردەوام پرسیار مکریۆ؛ ئینە چ جۆرە پرۆسێوە ئاشتیین؟' گەل و گلېرگە چنەما پەرسا باوەڕیتا بە حکومەتی هەن یان نا؟ بێ گومان چا مېیانێوە بازرگانی هەن. ئانە ڕۊشنا کە حکومەت بە ناچاری دەورو مێزەو پرۆسەکەینە نیشتەنەرە، ئاڎیچ پێوەسا بە ڕووەدایە هەرێمیەکاوە. جە ۋەرا ۋەرو ئی ئامانجانە ئەجێنداو ڕامېیاریمەدارا کوردیچ ئینا ئارانە. سەبارەت بە پرسو کوردی داواکاریەکۍ سەڎ ساڵێن بەردەوامێنۍ. چی ماوەنە ڕۊشن بۆوە کە تا چن ئی داواکاریۍ جواب مڎریاوە و جابەجێ مکریا."
"دەرفەتو ئاشتی گۊرەتەر مکەرمۍ"
عەلی کەنعان ئۆغڵو باسش چانەیچ کەرڎ، ئاڎۍ پېسە 'هەدەکە'ی و ڕێکوزیاکا، لایەنۍ دیاریکەرۍ پرۆسەکەی نیەنۍ، بەڵکم پەی یاردیدای ئی پرۆسەیە کۊشش مکەرا و جە درێژەو قسەکاشەنە واتش: "لایەنەکۍ دلۍ پرۆسەکەی ڕۊشنۍ و ئاشکرێنۍ. ئانۍ چەک منیارە و ئانۍ بانگەوازی مکەرا دیارێنۍ. چی پرۆسەنە گرڎ هەوڵێوە مڎەیمۍ پەی خزمەتکەردەی ئاشتی. سەبارەت بە پرسو ڕاسگۆیی، چێوۍ نییا ئارۆ بە دڵنیاییوە بوینیۆ. بەڵام ئی خاڵۍ مشۆم ڕۆشنە بکریۆوە ؛ پۊکەی بازرگانی ئەنجام مڎریۆ. ئەر چانسو ئاشتیچ سەڎەنە یۆ بۆ، پەی گۊرەکەردەیش و بەهێزتەرکەردەیش ئەوەکۊشایما بەرز مکەرمێوە. پەی وەشکەردەی کۆمارێوە کە گلېرگە جە ئارامی و ئاشایسەنە بۆ ئەوەکۊشایما دەس پنە مکەرمۍ پەی ئانەی کەس ئاسمیلە نەکریۆ و زۋان و باوەڕی کەسیچ نکۆڵیش چنە نەکریۆ."
