ڕوقایمانە ئی نخیانەتە ڕۋۍ جە زۋان و عەلی عەونیوە بە ئاشکارا دڎانش نریۊ پۊرە و ڕۋېچ جە زۋان و چەکڎارېشاوە کە شان بەشان و پاسدارەکا ئېرانی دژ بە پېشمەرگەکا ۋەرکەوتی گژیا.

"ئېمە پارتی دیموکراتو کورڎسان و عېراقینمۍ، بەڕابەرایەتی مەسعود بارزانی، ئېمە ئینایمۍ چنی مەسعود بارزانی و مەسعود بارزانیچ هامکارو خومەینین، خومەینیچ هامکارو ئېمەن، ئېمە چېگە جەنگ کەرمۍ دژوو پارتو دیموکراتی ئېرانی و جەماعەتو تاڵەبانی، ئېمە تاۋاما ئا مەنتیقا جە دوژمنا(پارتو دیموکراتی ئېرانی و یۊبیەی نیشتیمانی کورڎسانی) پاک کەرمېوە. پەیامو ئېمە ئانەن پاسدارۍ ئازۍ هامکارۍ ئېمە با کە مەنتیقەکەی جە دوژمنا ئېمە، کە کورڎۍ ئېرانینۍ بە سەرۊکایەتی قاسملوی پاک کەرمېوە".

ئینە قسۍ چەکڎارېوە پەدەکەینۍ کە جە سەرەتاو هەشتاکا سەڎەی ۋەڵینی ئا وەختەی قیادە مۊقەتە شان بەشان و پاسدارا و بەسیجەکا دژ بە جمایۊ کورڎەکا ۋەرکەوتوو کورڎسانی جەنگ کەرېنۍ، پەوپەڕو شانازیۊ قاوو ئا خیانەتەیە مڎۊ.

چا بارۊ دکتۊر قاسملۊ سکرتېرو ئا وەختەو پارتو دیموکراتو کورڎسانی و عەبدوڵای حەسەن زادە جەبارەو ئا خیانەتەو قیادە مۊقەتەی کتېبېشا نۋیستەن بە نامۍ خیانەتەکا قیادە مۊقەتەی و چنەشەنە ئاماژە پانەی کەرا:'' چەکڎارەکۍ قیادە مۊقەتەی، بۍ حیچ پڕەنسیپېوە دژبە گرڎ کورڎېوە ئازاڎیوازی شۊڕشگېڵنی بېنۍ، هەمیشە سەرو سنورەکا کورڎسانینە، قۊڕتۍ پۍ خەباتگېڵنا کورڎی ۋەشکەرېنۍ و بە فیتو ئەرەگیرا پەلامارەو شۊڕشگېڵناکورڎی دېنۍ بەبۍ جیاوازی''.

قاسملۊ جە دمادمایی باسو قیادە مۊقەتەینە، پرسیارەو ئانەی کەرۊ کە ئایا خانەواڎەو بارزانی چېشا گەرەکا جە گیان و مەردمو کورڎسانو ئېرانی، حەرپاسە ماچۊ(قیادە مۊقەتە، جە وەختو هجومکەرڎەی سەرو مەنتیقە ئازاڎ کریاکانە، بەسەرۊک جاشەکاشا ۋاتەن، شمە تەنیا ۋەرپەرسیاری جەنگەکەی جە ئەستۊ گېردۍ، ئېمە جەنگەکەی کەرمۍ. ماچۊیچ، پەنەوازەن گرڎوو گەلوو کورڎی و باتایبەتی کورڎۍ پانیشتی جە خانەواڎەو بارزانی پەرسا ئایا پی هەرماناشا کورڎوو عېراقی ڕزگار کەرا؟).

جە ئیسەیچەنە کە جەنگېوە قورس بەینو گەریلاکا ئازاڎیی کورڎسانی و سوپاو ترکی ئەرەگیرینە ملۊ ڕاۋە ، ئیجارە پەدەکە جە زۋانو عەلی عەونی ۋەرپەرسو  لقو  ٨ و پارتەکەیسۊ جە یاۋنەری ڕەسمی ۋېشۊ بە شانازیۊ پەرڎە سەرو ئا خیانەتەیە لا مڎۊ و داوا جە سوپاو ئەرەگیری ترکی کەرۊ کە ۋەرپەرسا و گەریلایا پەکەکەی بەدرۊن بۊمبۋاران کەرا گەشمەرڎېشا کەرا.

پۍ ۋینای ڤیدیۊکەی کلیک  چېنە کەرڎۍ

ئا دووە ڤیدیۊو چەکڎارەکەو  پەدەکەی و علی عەونی، کە جە دۋۍ وەختۍ جیاوازەنە تۊمار کریېنۍ، بەڵگۍ تاریخی و حاشا هۊرنەگیرېنۍ سەرو خیانەتەکا پەدەکەی، ڕووەو ڕاسەقینەو پارتەکەی و سەرکرڎەکاش، کە ۋەردەوام بۍ سڵەمایۊ دەسشا چنی ئەرەگیرا تېکەڵ کەرڎەن و دەسشا لۋان دلۍ ۋنەو شۊڕشگېڵنا کوردی، پۍ ڕای گرڎیی ئاشکرا کەرۊ.

ئانەی یاگۍ سەرنجیا پەدەکە ۋەردەوام خیانەت و لەکە پەڕ شەرمەزاریەکاش  پېسە شانازی و سیاسەتی نیشانەو گلېرگەی کورڎی مڎۊ، مەکینەو یاۋنەریەکاش بە شېۋنای ڕاسیەکا چەواشەکەرڎەی ۋەردەوام بەهانۍ پۍ ئا خیانەتیە مارۊوە، بەڵام هوشیاری بەرزو نەتەوەو کورڎی و بیەی بەڵگەی چی جۊریە، حۊڵەکا پەدەکەی پوچ کەرۊوە، حیچ بەهانېوە مەتاۋۊ ئا لەکە سیاوەیە بە میاچەما پەدەکەی و عەلی عەونیەکاوە چەرمە کەرۊوە.

هـ.ش