دماو ئانەی ڤیدیۆ و مەراسیمۍ سەروازی جە شاروو زاخۆو پانیشتوو کوردسانینە جە میدیای دیجیتاڵینە وەڵا کریاوە و قسەوباسش چنە کۊتۆ، بڕۍ زانیاریۍ وردتەرۍ ۋەردەس کەوتێنۍ. مەنتیقەو چێروو کۆنترۆڵ و پەدەکەینە، ڤیدیۆیۍ بە مۆبایل تۆمارکریان، دیارا ئا ڤیدیۆیە دماو مەشقۍ سەروازی گیریان. کە ناوەنڎوو زاخۆی پېسە نیشاندای هێزی نمایش کریان، زانیان کە ئا هێزە، هێزوو پەدەکەین کە چێروو نامۍ یەکەو پاسەوانی سنووری عێراقینە مەشقش پنەکریان پەی کیاستەی پەی هەرێمەکاو پارێزنای مەدیای ئاماڎۍ کریێنۍ. ئاژانسوو فۆراتی نامۍ ئەنداماو ئا هێزە مەشق پنەکریایە ئاشکرا مکەرۆ.

پەدەکە، کە ئینا دمایی حوکمڕانیشەنە، ئاینڎەو گەلوو پانیشتوو کوردسانی وێران مکەرۆ، حۊڵ مڎۆ ۋێش چی ئاژەو ئیساتۍ ڕزگار بکەرۆ، بەڵام ئی حۊڵۍ پەدەکەی پانیشتوو کوردسانیشا یاونان بە لێواروو وڕای. پەدەکە، کە پەی ڕزگاربیەیش، پەناش پەی دەیان ڕا و شێوازا بەردەن، چی ماوە دماییەنە جە ڕاو ڕۆنامەو خەباتیوە، بڕۍ جە ئەرەمەرزیا وڵاتپارێزنەکا سلێمانیش کەردۍ ئامانج. پەدەکە، داواش جە سوپاو تورکیای کەرد شۆڕشگێڵنا، دیموکرات و هێزە وڵاتپارێزنەکا کە خاوەن هەستێوە نەتەوەیێنۍ، بکەرا ئامانج و کوشاشا.  ئی ڕێبازۍ  پەدەکەی جە بارزانی تاتەیشاوە بە میرات پەیشا مەنەنۆ. 

جە سەدام  تا ئەردۆغان 

پەدەکە، کە چێروو نامۍ سیاسەتی هامسەنگینە بازرگانیش بە گرڎوو مەنتیقەکا پانیشتیۆ کەردەن، چنی ڕژێموو بەعسی کە جەساڵەو ١٩٩٦ینە گەلوو کوردیش کۆکوش کەرد، وەختۍ جە ۋەرا ۋەروو یەکێتینە تووشوو ئاستەنگی بی، چنی ڕژێموو بەعسی کورد کوشی کەوت هامکاریۆ دژوو کوردی. ئیساتێچ چنی ڕژێموو ئەردۆغانی کە مەنەیۆ سەروو بنەماو ئەرەگیری و دەسسەرەرە گێرتەی کوردسانی مزانۆ، هامکاری مکەرۆ.  پەدەکە، بەشداری جە پلانە تازەکا ئەرەگیری دەوڵەتوو تورکینە بە ڕاو ڕزگارکەردەی دەسەڵاتەکەیش مزانۆ.  حەرپاسە زانیان پەی ئی  ئامانجیە چێروو نامۍ یەکەی پاسەوانی سنووری عێراقینە، دژوو هێزەکاو گەریلای ئاماڎەکاری مکەرۆ. 

جە ناوەنڎوو زاخۆینە ڕاپیمای سەروازی 

 بەپاو ئا زانیارییا بە دەس ئامێنۍ، ئا هێزۍ کە بە دروشمۆ جە سەنتەروو شاروو زاخۆینە ڕاپیمایشا کەردەن، جە بڕۍ شۊنی و مەنتیقەنە مەشق و ڕائاوردەیشا پنە کریان. ئی ئاژە لاو خەڵکوو مەنتیقەکەیۆ تەرسی و نیگەرانیش وەش کەردەن. حەرپاسە زانیان جە چوارچێوەو مەشق و ڕائاوردەی ئی هێزەینە، وەڵتەر جە بڕۍ مەنتیقۍ وشکانینە مەراسیمی سەروازی لووان ڕاوە. بەڵام ئینە ئەوەڵجارا جە ناوەنڎوو شارینە ڕاپیمای سەروازی ئەنجام بڎریۆ. 

نامۍ ئا کەسا دەس کۊتێنۍ 

بە پاو زانیارییەکا پەدەکە جە فرەو لێوە حۊڵوو کۊکەردەیۆ ئی هێزەیشە دان و چێروو نامۍ یەکەی پاسەوانی سنووری عێراقینە ئشناسێنێش. بەڵام ئاژانسوو هەواڵوو فوراتی لیستوو نامۍ ئی هێزەی کە پەدەکە چێروو نامۍ یەکەی پاسەوانی سنووری عێراقینە دژوو گەریلای مەشقش پنەمکەرا بەدەست ئاردەن. جە لیستەکەنە نامۍ، دمانامۍ، وەختوو پەیوەندی کەردەی، سەر بەکام هێزین، ئەنداموو کام بەشین، جە لیستەکەنە ٣٦٠ نامۍ بیەیشا هەن. 

پەدەکە هێز کۊمکەرۆوە 

 بەپاو زانیارییەکا، ئی هێزە پێکئامان جە هێزی تایبەتی پەدەکەی، زێرەڤانی، هێزەکاو گوڵانی بە سەرۆکایەتی مەسرور بارزانی. حەرپاسە زانیان کە پەدەکە چێروو نامۍ یەکەی پاسەوانی سنووری عێراقینە بەردەواما جە کۊکەردەیۆ هێزی و باس چانەی مکریۆ بە میقدارۍ زەڕ ئا هێزا کۆ مکەرۊوە و مەشقشا پنەمکەرۆ. دماو تەمامبیەی مەشقەکەیشا، فرەیشا ڕووانەو مەنتیقەکا دهۆکی و ئامێدی مکریا.