سەرەڕاو فشاری و هەڕەشەکا ئېرانی، ئارۊ هاموەخت چنی یۋەم ساڵوەگېڵ و دەسپنەکەرڎەو سەرهۊردای "ژەنۍ، ژیای، ئازاڎیی" سەروو داواو پارتەکا ۋەرکەوتی و چالاکا مەڎەنی مانگرتەی سەرانسەری چا بەشەو کورڎسانینە لۋاڕاوە.
ئارۊ جە یۋەمین ساڵوەگېڵ و کوشیای ژینا ئەمینیۍ و دەسپنەکەرڎەو سەرهۊردای "ژەنۍ، ژیای، ئازاڎیی"نە جە فرەو شارەکا ۋەرکەوتوو کورڎسانینە مانگېرتەی لۋاڕاوە. دوکاندارۍ و کاسبکارا جە شارەکا کرماشان، جوانڕۊ، سنە، مەهاباد، بۊکان، مەریوان، بانە، سەقز، دیواندەرە، شنۊ،دېوڵان و کامیاران و فرە شارۍ تەرۍ دوکان و بازاڕەکېشا وستېرە.
هاموەخت بەپاو سەرچەمە دلېینەکاچنڎین ڕووېن بەمەڵامەتو ڕاگېرتەی جە دەسپنەکەرڎەو ۋېنیشانداکا هېزېوە فرەی سەروازی دلۍ شارەکا ۋەرکەوتینە کۊکریېنۍ.
حەر ئارۊ جە شاروو سەقزی، ئەمجەد ئەمینی تاتەو ژینا ئەمینیۍ جە وەختوو ئامای بەریش جە یانەکەشەنە جە تەرەفوو هېزە ئەمنیەکاوە گیریا.
ماوەو چن ڕووېوەن دۊرووبەروو قەبرسان و ئایچیی سەقزی کە قەبرەو ژینا ئەمینیېش ئینا چنە، بە هېزېوە سەروازی تەنیان و ئارۊ بەمەبەسوو ڕاگېرتەی جە لۋای خەڵکی بەرەو نزرگاو ژینۍ هېزەکۍ ئېرانی یۊ جە دەرچەکا بەنداوو چراغ وەیسیشا کەرڎۊ پۍ ئانەی ئاستەنگ پۍ ئاما و لۋای جە دۊرووبەروو قەبرسانەکەینە سازکەرا.
چن ڕووۍ چېوەڵتەر شش پارتۍ ۋەرکەوتوو کورڎسانە(پەژاک، حدکا، کۆمەڵەی زەحمەتکێشان، کۆمەڵە- رێکوزیاو کوردستانی حزبی کۆمۆنیستی ئێرانی، سازمانی خەبات و پاک)ی، داواشا کەرڎېبۍ جە ساڵوەگېڵ و کوشتەی ژینا ئەمینیېنە و دەسپنەکەرڎەو سەرهۊرداو"ژەنۍ، ژیای، ئازاڎیی"نە هامۋڵاتیۍ جەڕاو وستەیرەی دوکان و بازاڕەکا و سەرڎای جە نزرگاو گیانبەخشایا ئا سەرهۊردایە، ناڕەزایی ۋېشا ۋەران ۋەر بە دەسەڵاتی بەربڕا.
خانەواڎەو ژینا ئەمینیېچ ئەرەیاۋنابېشا، کە جە ساڵوەگېڵ و گیان بەخشای کناچەکېشانە سەروو نزرگاکېشۊ مەراسیمېوە سازکەرا.
ڕۊو ١٣ و ئەیلول و ٢٠٢٢ پۊلیسی بەنام ئەخلاقی جە شاروو تارانی بەبەهانۍ حیجابی ژینا ئەمینیەشا گېرتە و جە ئاکاموو ئەشکەنجەی و تنوتیژیوە ئا کناچە کورڎۍ کۊتە ئاژەو کۊمایۊ و دماو یەرۍ ڕووا مەنەیۊ جە نەوەشخانەنە ڕۊو ١٦ و ئەیلولی گیانش جە دەسدا و ئانەیچ بی بە مەڵامەتوو سەرهۊردای جە ۋەرکەوتوو کورڎسانی و ئېرانی کە بە سەرهۊرداو"ژەنۍ، ژیای، ئازاڎیی" مشناسیۊ و درېژ مەوداتەرین و ۋەرفراوانتەرین ۋېنیشاندای بۍ جە عمروو ٤٤ ساڵەو جمهوری ئېرانینە.
جە ئاکاموو تنووتیژیی هېزەکا دەسەڵاتینە نزیک بە ٥٥٠ کەسا چا سەرهۊرداینە گیانشا بەخشان و بەهەزاران کەسېچ زامڎارۍ کریۍ و لاو کەمیۊ ٧ ۋېنیشاندەرېچ دریۍ قەنارە.
