دماو کوشیای پلەدارێوە کۊنسوڵخانەو تورک بە نامۍ عوسمان کۊسەی ج ١٧ تەمموزوو ٢٠١٩، هەر یۊ جە مەزڵوم داغی وعەبدولڕەحمان ئەری تۊمەتبارۍ کریۍ و دادگا حوکموو قەنارەدایش پەی بەرۍ کەرڎۍ. چا وەختۊن  زینداننە ڕووبەڕووۍ چندین پاشێلکارییا باوە، پەوکای جە ١٨ ئایاریوە دژوو فشارەکا پەی یەکپۊشیی جلوبەرگی و مامەڵەی خراپی وەراوەرشا، مانیشا جە وارڎەی گێرتێنە.

یاگۍ واتەینە داغ  و ئەر ج ٢٨ ئەیلوولوو ٢٠٢٢ دەسسا کەرڎ بە مانگێرتەی دژوو مامەڵەی خراپی و ئەشکەنجەی، وەلۍ بۊنو بەگۊشکەرڎەی داواکارییەکاشاوە جە ڕۊو ١٤مینینە مانگێرتەکەیشا ماڕا.

جەنی ئانەیچە جە ١٣ شوباتوو ٢٠٢٢ دژوو پاشێلکارییەکا مانگێرتەیشا جە وارڎەی ئەرەیاونا، وەلۍ جە ڕۊو نۊوەمینە دماو نەمەنەی پاشێلکارییەکا مانگێرتەکەیشا ماڕا.

مەزڵوم داغ ٢٣ حوزەیرانی قسێش چەنی بنەیانەکەیش کەرڎێنۍ و باسوو خراپیی تەندرووسییش کەرڎەنش و واتەنش: "ئیدارەو زیندانەکەی ١٠ ڕوێن وەنەما مەپەرساوە، ماچا دکتۊر و دەرمان نییا، ڕووبەڕووۍ مەرگیما کەراوە".

عەبدولڕەحمان ٢٠ کیلۊوۍ کێشش وەستەنرە و تەندروسییش خراپا، داغیچ ئەرەیاوناش ١٠ کیلۊوێش وەستەنرە و مەتاوۊ فرە قسۍ کەرۊ.  

هیزی جومعە، کۊمیتەو پەیوەندییەکاو جبەروو کەجەکەی، چی بارۊ ئەرەیاوناێوەش وەڵا کەرڎۊ، ئاماژەش پانەیە کەرڎ: "پەدەکە پەرسا جە تەندروسی و ژیوای ئەری و داغی، پەنەوازا گۊشەگیریی سەریشا مرڎنیۊ و تا حاڵشا خراپتەر نەبییەن، مەبۊ بلا چێروو داواکارییەکاو تورکیای". حەرپاسە ئەرەیاوناش: "پەنەوازا گرڎ لاێوە هەڵوێس وەرگێرا دژوو سیاسەتەکاو پەدەکەی".

س.ز