بۊنەو ئا هجووماو دەوڵەتوو تورکی ئەرەگیریوە مانگەو ئەیلوولی عەین عیسا و گرۍ سپیینە کەرڎێش، کەسێوە مەدەنی مەرد و ٥ کەسۍ تەرێچ بریندارۍ بیۍ. ھاموەخت جە ئەنجاموو دایپێوەرەکایچەنە ٧ چەتۍ کوشیۍ.
ھەرپاسە سوپاو تورکی ئەرەگیری و چەتەکێش مانگەو ئەیلوولینە، دەیان جارێچ هجوومشا پەی سەروو دەگایەکاو نزیکوو بەرەکاو جەنگی عەین عیسا و گرۍ سپیینە کەرڎێنۍ.
چەنی لوایراوەو ئۊپەراسیۊنوو 'پتەوکەرڎەی ئاسایشی' مانگەو ئابینە جە دەگایەکاو دێرەزۊرینە، لاو هێزەکاو سوریای دیموکراتیک (قەسەدە)یۊ، سوپاو تورکی ئەرەگیری و چەتەکێش هجوومەکێشا پەی سەروو دەگایەکاو وەرنیشتی و وەرکەوتوو عەین عیسای هەستەرۍ کەرڎێوە. ڕۊو ٣ۍ ئەیلوولی، چەتەکاو سوپاو ئەرەگیرا هەوڵێشا دۍ بلا دلۍ دەگایەکاو سێگیرۊی و تروازییەی. جەنگەواناو قەسەدەی وەرپەرچشا دێوە و ئەنجامنە ٧ چەتۍ کوشیۍ و ٧ چەتۍ تەرێچ بریندارۍ بیۍ.
رۊو ٤وو ئەیلوولی ئەرەگیرۍ دەگاو حەویجەی (کە گنۊ ١٥ کیلۊمەتری وەرکەوتوو عەین عیسا)یشا تۊپواران کەرد. ئەنجامنە هاموەڵاتێوە بە نامۍ خەلیل ئیبراهیم حەمەدی (تەمەن ٢٣ ساڵە) بریندار بی.
ڕۊو ٢٠وو ئەیلوولی هێزە ئەرەگیرەکۍ هجوومشا کەرد سەروو دەگایەکاو ئەبو نیتۊلەی، (کە گنۊ ٢٠ کیلۊمەتری وەرنیشتوو عەین عیسا)یۊ و ئەنجامنە هاموەڵاتێوە بە نامۍ ماجد ئیبراهیم عەلی-یوە بریندار بی.
ڕۊو ٢١وو ئەیلوولی، کۊچبەرێوە بە نامۍ قەبن عەزیز خەلیلی (٢٩ ساڵی) وەختێوە، نزیکوو دەگاو شێخ حەسەنینە وەرکەوتوو عەین عیساینە دەشتەکێشنە هەرمانە کەرۍ، بە تۊپوارانوو ئەرەگیرا بریندار بی.
ڕۊو ٢٧وو ئەیلوولی، سوپاو تورکی ئەرەگیری دەگاو حەدریاتی (کە گنۊ ٧ کیلۊمەتری وەرکەوتوو عەین عیسایۊ)، بە چەکی قورس تۊپوارانشا کەرڎە و لە هاموەڵاتێوە بە نامۍ عومەر محەمەد جەویدی (٣٥ ساڵە)یۊ گەشمەرڎە بی و دوۍ کەسۍ تەرێچ بە نامەکاو مەحفوز حەمادی (٣٠ ساڵ)ی و مریسی حەمادی (٢٣ ساڵ)یوە بریندارۍ بیۍ.
ڕۊو ٧وو ئەیلوولی، سوپاو تورکی خەتێوە فاڕایۊ کارەبێش کەرد ئامانج، کە کارەبا پەی هەرمانگەو چیمەنتۊو لاڤارجی یاونۍ. ئەنجامنە کارەباو دەگایەکاو وەرنیشتوو مەنتێقەکەی و دەگایەکاو کانتۊنوو گرۍ سپی (دەگاو جەدیدەو عین عیسای تا دەگاو جرن)ی پڕچییا.
ڕۊو ١٨و ئەیلوولی، ئەرەگیرۍ جارێوە تەر هەمان خەتەو کارەبێشا کەرڎە ئامانج و پا بۊنەوە جارێوە تەر کارەباو ئاگەیشا پڕنچاوە. هەرپاسە ئەرەگیرۍ هجوومشا کەرد سەروو دەگایەکاو ئەحمەدیە، عەریزە و بەندەرخانی وەکەوتوو عەین عیساینە. بۊنەو تۊپوارانەکەیۊ پڕۊسەو وانای مردییا.
بە پاو ئامارەکاو ئاژانسوو ھاوار نیوزی، ئەوەڵوو ئەرەگیرکەرڎەی گرۍ سپی-یوە، بۊنەو هجوومەکاو سوپاو تورکی ئەرەگیریوە پەی سەروو دەگایەکاو عەین عیسای و گرۍ سپی، گردیوە ١٢٥ هاموەڵاتۍ مەدەنیۍ گەشمەرڎۍ و بریندارۍ بیۍ، کە ٥٠ کەسێشا زارۊڵێنۍ.
س.ز
