هەورامانو دیمو پانیشتو کوردستانی، ڕۆمانەو مەولەی ڕەوانەو چاپخانەی کریا. ڕۆمانەکە جە نۋیستەی ئیبراهیم میکە عەلی-ن و بە زۋانی گۆرانی نۋیسیان و بڕیارەن بە زوویی وەڵاو بکریۆنەوە و کتێبخانەو هەورامانیش پنە دەوڵەمەند بکریۆنە.
جە ئی بارەوە نۋیسەر جە پەلیانەو فەیسبۆک-یشەنە نۋیستەنش: 
سوپاسی بێ پایان پەی خوڎای دمای شەونخونیێوە فرەی ڕۆمانەو مەولەی یاوا چاپیانەو چەمەڕانا پی نزیکارە بە قەبارەو ٣٥٠ لاپەلا چاپە بۆ، هەر جەئیسۆ و چێگۆ سوپاس پەی گردو ئا وەشەویسا هەکە دەسبارشا دانێ جە بەرهەم ئاوردەی ئی ڕۆمانێنە.
هومێد وازو کتێبیانەی هەورامینە یاگێ وێش گیرۆ.

فەرماودێ چەنی بڕگەو دەسپەنەکەردەی ڕۆمانەکێ:

وەرو ئانەی هەکە ڕوٙی ویەردە کاکەخانی کوٙڕشا گیٛریابیٛ سەرواز، یانەو لالوٙ مراڎی شەوەی ویەردیٛشا پیٛسە تازیەباریی بەردە سەر، تا دیٛرێوەیچ بەر و هامسا و کەس و کار و فرەو خەڵکو دەگێچ هەر لاشاوە بیٛنیٛ و دڵنەواییشا کەریٛنیٛ.
هەرچنڎ ڕەحمو ئەڎێ بەراود مەکریوٙ بەکەسی تەری وەلێم لالوٙ مراڎ جە ئەرخەوان خانیٛ ژەنیٛش زیاتەر هیلاک و کەیل بیٛ پەی دوور کەوتەیۆ کاکەخانی کوٙڕیش، چونکە کاکەخان وەرویٛڕکو یانەی و چوەو دەسو لالوٙ مراڎی تاتەیش بیٛ.
لالوٙ مراڎ شەوەکیٛش هەر بە داڵغیٛ و تەپاوتلیٛوە بەردە سەر، سەحبێ زوو هوٙرئیٛست لوا مزگینە پەشتەو سەرەو مەڵڵا ئوٙلخالەقیۆ و چەنی چوار پەنج پیایا تەری، نماکیٛش کەردەش و دمای نمێچ ماموٙسا و پیێکیٛ تەریٛچ، هامخەمیی ویٛشا بەروست پەیش و واتشا: خوٙڎا کاکەخانی پاریٛزنوٙنە و بەزەیش بسیوٙوە توٙ و ئەرخەوان خانیٛرە، خوٙڎا یاربوٙ خانە گیان سەروازیەکەیش تەمامنوٙنە و بەسڵامەتیچ گیٛڵوٙوە دلیٛما.
مەڵڵا ئوٙلخالەق واتش: لالوٙ مراڎ کاکەخان تەنیا کوٙڕو شمە نیا، کوٙڕو گردو دەگێ و ئی خەڵکیچەنە هەکە ئینا پی دەگایا دەور و پشتیمارە.
لالوٙ مراڎ مەمنونیش پەی بەر وستیٛ و بە قسەکاشا کوٙچێو بارو دەرونیش سوک بی و لەقە لەق گیٛڵاوە ڕوەو یانەی.
هیشتای لیٛڵ و بوم بیٛ لواوە سەر ویٛش کوٙ کەردۆ، خاوەرەی کناچیٛش و ئەرخەوانەی حەرەمەش هەڵای هوٙرنەئیٛستیٛبیٛنیٛ.
ئەوەڵۆ نیازش نەبیٛ هایش کەرۆوە وەلێم هەکە زاناش هایشا، بە دەنگێوی نزم و دڵێوی پەڕۆ واتش: ئەرخەوان خوٙڎا یاربوٙ ئاروٙ ملو هیتەکیٛ کەرونە و توٙمەکەی شانو با ئا داڵغەیچمە مل گنوٙ، چاشتنگا یام ویٛت بوٙ سەرێوەم دە یام بە یوٙیرە نانو چاییم پەی کیانە.
ناشوکریی نەبوٙ خوٙ کاکەخان نیا هەویٛڵەنە هەتا بە فڕکێوە گر هەرمانێوەما پەی مەیسەرە کەروٙ.
دڵش پەڕ بی و وەرو ویٛشەرە واتش: مەر ڕەحمو خوٙڎای ئنڎا ئی دووە ساڵە هەتا خانە مێوە بە تەنیا باڵیی هەرمانەما مەویەروٙ.
ڕوەش کەردۆ ئەرخەوانیٛ و واتش: ئەگەر تاوی وەزەرە دەسبارێوەم دە با یەرەق و بنەتوٙمەکەی بار کەرونە و تا دیٛرش نەکەردەن وەزورە وەردەگا. 
توٙرەکڵەو تەماکوٙ جگەرەکاش کەردش لاقەڎشەرە و وەستەرە وار گاوە بوٙر و هەرە کەوەش گەوڕەنە زنیێرە و هەرەکەوەش کوٙپانە کەرد، فرەش پۆ نەشیی ئەرخەوانەی حەرەمەیچش بە بالوٙرە واتەی باڵاو کاکەخانیرە وەستەرە و هەرجوٙر بی یاردەی لالوٙ مراڎیش دا یەرەقەکەشا بەست کوٙڵیٛ هەرەکەیرە و بنەتوٙمەکەیچشا بار کەرد ئەو گاوە بوٙری.
لالوٙ مراڎ چویتەش نیا شانەشۆ و خوٙڎا حافیزیش کەرد ئەو ئەرخەوانیٛ و واتش: ژەنەکیٛ ورە دە بە ویٛت، چار نیا دوٙعێ خەیریش پەی کەرە خوا پاریٛزنوٙش.
هەچێوەش کەرد و هەرو گاوەکەش دێنە وەر و کەوت ڕا.
ئەرخەوانە تا ئەودیمو بەرەو حەوشەکیٛچ لواش چەنیی و واتش: پیاکە خەمت نەبوٙ خوٙڎا یار بوٙ چاشتنگا ویٛم و خاوەرە مەیمیٛ پەی لایت.

هەرپاسە نۋیسەر د. ناجح گوڵپی، جە پەلیانەو  هەورامان نێت-ینە کوڵەباسێش سەرو ڕۆمانەو مەولەوی بە ئی جۆرە نۋیستەن:
یوەم بەرویرو ماموٙسا ئیبراهیم مەیکە عەلی بە زوانو (گوٙران_هەورامی) پەخشە مەبوٙوە.

بەپاو هەواڵێ کە جە پەلو فەیسبوکو نویساو ڕوٙمانەو مەولەی وەڵاو کریانوە، واتەنش پی زووانیە ڕوٙمانەو مەولەی چیٛرو چاپینە بەرمەشوٙنە. نویسا ئیبراهیم مەیکە عەلی سەربارو ئانەی کە چنڎەها کتیٛبیٛ تەریٛش نویستیٛنیٛ و هوٙرش گیٛڵنێنیٛ، وەلێم ئیجارە لاشکەردەن لاو ڕومان نویستەیرە و بە زوانو ئەڎاو ویٛش، زوانو گوٙران- هەورامی، هەڵبەت پیٛسەو خەمەوەرێ پەی زوانەکەیش هەم گردکەسیچ بزانوٙن کە ئی زوانە ئنڎە هیٛقمەن سەربارو ئانەی هەزاران ساڵیٛ تاریخش هەن! ئیسەیچ گریکو ئانەیش چەنەن کە بتاووٙنە جە گرد ویارەکانەنە بڕبڕانی بکەروٙن.

ڕوٙمانەو مەولەی ٣٥٠ لاپەلیٛنە، بە قەوارەو ئەی پەنجی. ئی ڕوٙمانیٛ سەرو گیروٙدە کوٙمەڵایەتیەکانو مەردمو هەورامانی باس و شیکەردەیەو مەکەروٙن، ڕوٙمانەو مەولەی پیٛسەو گرد ڕوٙمانێوە خاسیەتە زانشتیەکیٛ و ئەدەبیەکیٛ ڕوٙمانیٛش چەنەنیٛ، هەر جە ئەکتەر، یاگیٛ و کات، هیٛڵەو لوایوەرۆو ڕوٙمانیٛ(پلۆت)، ملەجیڕێ و ململانیٛ چەنی نەریت و ڕەفتارو فیسپەگای، پاڵەوان_قارەمان و ڕوٙمانیٛ و دژە قارەمان، ئینیٛ گرد ئاومێنیٛ دلیٛ دلیٛنەو ڕوٙمانەکیٛنە، دماو ئانەی ملەجیڕەکیٛ خاویٛ مەبانوە، ڕوٙمانەکیٛ ڕووەو وەشی مەلوٙنە.

ڕوٙمانەو مەولەی سەرئامێوە نزیک جە واقعین، نویسا پیٛسەو ڕووەدایێ جە ویەردەنە کەلکش چەنە هوٙرگیٛرتەن پەی نویستەی ڕوٙمانەکیٛش، بە دەسیٛ و پەنجیٛ و ئاوەزی ژیرانەش تاوانش بەرویرێ جوان پیٛشکەشو کتیٛبیانەو هەورامانی و وەنیاران و مسیارانو هەورامانی بکەروٙن. بەنامیٛ وەڵاوگاو هەورامانی و سایتەو هەورامان نێتی و وێمەو دەس وەشانە و جوانتەرین مەبارەکباییش وەنە مکەرون، همیٛدەوارنان گرد نویسا هەورامیەکیٛ ئەر پەی یەکجاریچ بوٙنە بەرویرێ هەورامیانە بنویسانیٛ، با شوٙتو ئەڎایشان حەراڵ بکەرانیٛ.