چەنی نزیکبییەیۊ یوەمین ساڵیادوو سەرەورڎای "ژەنی، ژیوای، ئازاڎی"، ماوەو شش ڕۊی ویەرڎەینە، لاو کەمیوە ٢٠ هاموەڵاتۍ کورڎۍ دەسبەسەرۍ کریێنۍ. حەر پاسە هەڕەشۍ وەنەو کەسوکاروو گیانبەختکەرڎاو سەرەورڎاکەیچ کریێنۍ، کە حیچ نۊعە ناڕەزایەتییوە بەرنەوزا.
جە سەروبەندوو یوەمین ساڵڕۊو کوشیای ژینا ئەمینیۍ و سەرەورڎای ' ژەنی، ژیوای، ئازاڎی'، هێزەکاو سەر بە دەوڵەتوو ئێرانی، شەپۊلێوە تازۍ فشاری، تەرسۍ و تۊقنایشا دژوو چالاکا و هاموەڵاتە کورڎا دەس پەنە کەرڎێنە.
بە پاو ئا زانیاریایاو تۊڕەو مافوو ئینسانوو کورڎسانی وەڵاش کەرڎێنۊ، ماوەو شش ڕۊی ویەرڎەینە، لاو کەمیوە ٢٠ چالاکۍ و هاموەڵاتۍ کوردی پارێزگا جیاجیاکاو وەرکەوتوو کورڎسانینە دەسبەسەرۍ کریێنۍ، کە چارەنویسوو فرەییشا نادیارا.
بە پاو ئا هەواڵاو تۊڕەو مافوو ئینسانی ماوەو شش ڕۊی ویەرڎەینە وەڵاش کەرڎەنۊ، حەریۊ جە "مامل شەریفی، ئەرسلان خەیری، هیوا ڕاهنشین، هیوا شەبئاهەنگ، هیدایەت خەستە، شیرکۊ نەسیری و ئەشکان ڕەسووڵی" مەهابادنە، "حوسێن مەحمودپوور، لوقمان سۊخەنوەر و هۊشیار قادری" پیرانشارنە، "ئەیوب میرزایی و شیروام خزری" شنۊنە، "بەهار ئەحمەدی، زریان مەلایی و زیلان مەلایی" سنەنە، "ئەرسلان یوسفی" بۊکاننە، "فەرمێسک بابایی" پاوەنە و "ڕەزا بەبرنژاد" لە قووچاننە دەسبەسەرۍ کریێنۍ.
ئینە جە وەختێونە ماوەو حەفتەکای وەڵینینە، دەیان هاموەڵاتۍ تەرۍ سەرجەموو پارێزگاکاو وەرکەوتینە بە دەسوو هێزەکاو سەر بە دەوڵەتوو ئێرانی دەسبەسەرۍ کریێبێنۍ.
شەپۊلۍ تازۍ دەسبەسەرکەرڎەی چالاکا و هاموەڵاتاو کوردی ئینا وەختێوەنە، بەپاو سەرچەمەکاو هەواڵوو وەرکەوتوو کورڎسانی، هێزەکاو دەوڵەتوو ئێرانی، فشارەکێشا پەی سەروو بنەیانەو گیانبەختکەرڎاو سەرەورڎای 'ژەنی، ژیوای، ئازاڎی' هەسۍ کەرڎێنێوە، هەڕەشۍ ئانەیشا وەنە کەرا "وێشا جە گرد نۊعە وێنیشانەدای و ناڕەزایەتیێوە جە یوەمین ساڵیادوو کوشیای ژینا ئەمینیێنە دوور گێرا".
س.ز
