هېزی ۋېرەگا ئەنڎاما ئەرەمەرزیا و رێکوزیاکا گلېرگەی ئێزدی سەردای قەبرە جەمەکا حەردانیشا کەرڎ و گەشمەرڎۍ کارەساتەکەیشا ۋیرئارڎۍ. دەیان کەسۍ جە مەردمو شەنگالی کۆبیېوە و جە ئەرەیاۋنېوەنە داواشا کەرڎ رای گرڎی پەی پارېزناو مافەکا گلېرگەی ئێزدی هەڵوێس برمانا.

ئەرەیاۋناکە جە لایەنو ئەنڎامەو تاژۍ کنۍ خدریۊ ۋنیاوە. جە ئەرەیاۋناکەنە ئامان، "جە ئەوەڵۊ گرڎوو گەشمەرڎا کارەساتەکەی ۋیر مارمېوە، ئانە بی بە نۆ ساڵۍ بە سەڎان کەسۍ جە مەردمو ئێمە بە دەسو داعشی و بە هامکاری خانەواڎە و بارزانی گەشمەرڎۍ کریۍ. گەرەکشابۍ گلېرگەی ئێزدی دلېنە بەرا و جە شەنگالەنە بلا بەر. گلېرگەکەما ۋېڕاگریش کەرڎ و ناستش ئا ۋەرمەو دوژمنی سەرگېرۊ. ئارۊ پۍ ئێمە ڕۋېوە سیا و بە ئېشا، داوا جە گرڎوو گەلەکەیما کەرمۍ ئا ڕۋەیە جە یاڎ نەکەرا، خۊتانکەرڎەی جە گەشمەرڎاشا کەرا. ئەگەر ئارۊ سەرو ئی خاکیۊ مژیۋمۍ جە سایەو رەنجو گەشمەرڎاوەن. حەر بستێوە چی خاکیە بە رەنج و ۋنەو گەشمەرڎېوە سوور بیەن. ئێمە وەعد مڎەیمۍ کە دەس جە رێبازو ئا گەشمەرڎا هۊرنەگېرمۍ، کە گیانشا چا ڕېنە بەخشان.

جە درێژەنە کنۍ خدرە ۋاتش، "نۆ ساڵۍ ۋیەرڎەن، بەڵام ئا ڕۋە پەڵېوە سیاوا بە میاچەما مرۆڤایەتی و ئا وڵاتاوە کە باس جە پارېزنای مافەکا مرۆڤی کەرا. ۋەرو ئانەی ۋەرو چەما گرڎوو جەهانیۊ ئێمە رووبەڕوو ئی کۆکوشیە کریایمېوە. بەڵام کەس خۊتانکەرڎەیش ۋنە نەکەردیمۍ. شەرمەزاریېوە گۊرەن کە تائیسە ئا کارەساتە بە جینۆساید نەشناسیان و تەنیا پېسە نۋیستەیۍ سەرو کاغەزی مەنەنۊ. ئێمە داوا جە گرڎو مرۆڤایەتی کەرمۍ جە ۋەران ۋەر بە گلېرگەی ئێزدینە خۊتان ۋەرپرسیاری با".

هـ . ش