ئەوەڵوو مانگەو تشرینوو یوەمی ئارمیتا گراوەندە کناچە کورڎەو خەڵکوو شاروو کرماشانی و ئەرەنیشتۍ تارانی، یۊ جە وێستگەکاو میترۊو ئا شارەینە، بە قسۍ شایەتحاڵا بۊنەو ئانەیۊ پابەندەو حیجابی زۊرەملۍ نەبیێبۍ، هێزە ئەمنییەکا تندوتیژییشا وەراوەر کەرڎە و ویەرڎێبێوە.

دماو ٢٨ ڕوا مەنەیۊ خەسەخانەو فەجروو تارانینە، کە بەتندی چێروو چەمداریی هێزە ئەمنییەکانە بۍ، هیزی هەواڵوو مەرڎەی ئارمیتۍ وەڵا کریاوە، ئانەیچ کارڎایوەی فرەش شۊنەو وێشرە ئارد و چند گەڕەکۍ و مەنتێقێوە تارانینە خەڵک دژوو دەسەڵاتی دروشمێشا واتۍ.

بە هەمان شێوە جە شارەکاو کرماشانی و شیرازیچنە چند چالاکیێوە ناڕەزایەتی هامشێوە لوۍ ڕاوە و بە پاو چند سەرچەمێوە کاربەدەساو ئێرانی بە مەبەسو ڕاگێری جە حەر نۊعە وێنیشانەداێوە، هێزێوە فرەشا شاروو کرماشانینە زێدوو ئارمیتێنە وستەن.

حەر جە چوارچوەو ڕاکارەکانە پەی ڕاگێری جە سەرەورڎایوە وێنیشانەدایەکا تا ئیساتۍ جەنازەو ئارمیتۍ نەدریانۊ دەسوو بنەیانەکیشاوە و بە پاو چند سەرچەمێوە فشارەکۍ سەروو ئا بنەیانەیە هەسۍ چڕکریێنێوە، تاحیچ نۊعە مەراسیم و پەرسێوە پری کناچەکێشا نەنێیارە.

مەرڎەی ئارمیتۍ مەرڎەی ژینا ئەمینیۍ ویر وزۊوە، چوون بەهەمان شێوە تاراننە بە بەهانۍ  حیجابیوە جە ١٣و ئەیلوولوو ٢٠٢٢ گیریا و ڕووبەڕوو تندوتیژی بیۊ و دماو ئانەیە کەوتە دۊخوو کۊمایۊ ڕۊو ١٦و ئا مانگۍ گیانش جەدەس دا و ئا ڕووەدایەیچە بی سەرەتاو سەرەورڎای ژەنی، ژیوای، ئازادی، کە بە گەورەتەرین و وەروەڵاتەرین شەپۊلەو ناڕەزایەتیی ٤٥ ساڵی ویەرڎەی ئێراننە بنریۊرە.