هامسەرۆکو لقو وان و پارتو هەرێمە دیموکراتیکەکا (دەبەپە)ی هارون ئۆکای سەبارەڎ بە گۆشەگیری سەرو ڕابەرو گەلوو کورڎی عەبدوڵا ئۆجالانی قسېش پۍ ئاژانسو هەواڵی فورات (ANF)ی کەرڎۍ.

هارون ئۆکای ۋیرش ئارڎۊ کە ڕابەرو گەلوو کورڎی عەبدوڵا ئۆجالان ساڵەو ١٩٩٩ ی بە پیلانگێڵیېۋە میان نەتەوەیی فاڕیاوە پۍ تورکیای، چا وەختۊن ماوەو ٢٤ساڵان گۆشەگیرکریان، بەڵام چی ساڵا ۋیەرڎەینە گۆشەگیریش دلۍ گۆشەگیریینە سەرەرە سەپیان و هەلومەرج و زینڎانیکەرڎەیش بە شێۋېوە نایاسایی قورستەر کریان.

ئۆکای ئاماژەش پانەی کەرڎ کە ڕاگېرتەی جە دیڎارو عەبدوڵا ئۆجالانی چنی خانەواڎەکەیش و پارێزنەراش زەرەرۍ گۊرە بە ئاشتی کۆمەڵایەتی میاۋنۊ و ۋاتش، "یاسای میان نەتەوەیی و یاسای دلېینە پاشێلۍ کریا. دەورو عەبدوڵا ئۆجالانی جە ئاشتینە زانیان و سەلەمیان. جە بەینو ساڵەکا ٢٠١٣ پۍ ٢٠١٥ینە کە ئا وەختە چالاک بۍ تەنیا یەک کەسیچ نەکوشیا. جە ساڵەو ٢٠١٥ ی بەدماوە گۆشەگیریش دلۍ گۆشەگیرینە سەرەرە سەپیا. مشۊم گۆشەگیری سەرو عەبدوڵا ئۆجالانی خېرا دمایش پنەبۍ. ئەگەر ئانە کریۊ، ئا ناکۆکی و دوژمنایەتیەی دلۍ گلېرگەینە خوڵقیان، دمایش پنەمۍ.

' جە پەرسو گۆشەگیرینە با گرڎۇ گەلەکەیما هوشیارۍ با'

ئۆکای ئانەش وست ڕۋە کە ڕاگیری کەرڎەی جە دیڎاری چنی ڕابەرو گەلوو کورڎی جە بەرۊ و پێچەوانەو یاسایا و ۋاتش، "مشۊم عەبدوڵا ئۆجالان بتاۋۊ جە گرڎو ئا مافا کە تایبەتېنۍ بە سزادریایا ئیسفاڎە کەرۊ. پۍ پێکئامای ئاشتی کۆمەڵایەتی، ئێمە داوا جە تەمامو گەلا تورکیای کەرمۍ کە جە پەرسو هۊرگېرتەی گۆشەگیرینە هوشیارۍ با".

هـ . ش