ۋەرووئانەی نەهامەتی جەرگبڕ ملو گەلوو پانیشتیرە نۍ، ئیساتۍ جە هەر یووەسۍ کەشەکا کورڎەسانینە گەریلاکۍ ئازاڎیی دلۍ گرڎ هەلومەرجێوەنە گژیانە و ئەرەکۊشا. پەی ئانەی ئی ئەرەکۊشایە بیاوۆ ئەنجام، مشۊم گەلوو پانیشتی پەشتیوانی جە گەریلای بکەرۆ.
هرووژمی ئەرەگیری پەی سەرو کەشوو وەهاری جە مېڎانوو گەشمەرڎە دەلیلینە جە زاگرۆس، جە ڕاو ئەنجامدای ئۆپراسیۆنێوە هامکاتیوە پەی سەرو گرڎوو مېڎانەکا پانیشتی دەسشپنەکەرد. شەوەو ٣ۍ تەمووزی سەعات ٩ جە ئاکاموو رێککەوتەیۍ یەرە قۆڵینە جە ما بەینوو هێزەکاو عێراقی، پەدەکەی و تورکینە، جە یەرۍ قۆڵېوە بە ڕای زەمینیوە هەوڵدریا هرووژم بکریۆ سەرو کەشوو وەهاری. نەک هەر کەشوو وەهاری، سوپاو ئەرەگیرەو تورکی بە کارەوانوو ترۆمبێلی زرێپۆشی بە ڕسمی و بە ڕاپنەدای حکومەتوو هەرێمی، بە مەراموو ئەرەگیرکەردەی ڕووەش کەردە هەرێموو سەرگەلێچ.
هێزەکاو گەریلای کە هەرزوو گلکەشا سەرو پەلەپیتکۍ تفەنگەکاشاوە بۍ، بە ۋەرپەرچدایۆ کاریگەرەکاشا، مەراموو هرووژمەکاشا پوچ کەردۆ. تورکی ئەرەگیر جە ڕاو ئا هرووژماوە گەرەکشا ۋێش بیاونۆ بە چێش سەرو خاکوو پانیشتوو کورڎەسانینە؟
جە جابەجاکەردەو پلانەکا دەوڵەتوو تورکینە بارزانی تاکەی کوڕە گولانە و گۆشگیرەکەش مبۆ، بە مەڵامەتوو هەڵوێسوو ئاڎیشاوە چ فاڕیایۍ سەرو خەریتەو پانیشتوو کورڎەسانینە مېنە ئاراوە؟
ئامانج چەسپنای خاکوو پانیشتوو کورڎەسانیا
دەوڵەتوو تورکی بەنامۍ ئانەی کە چنی پارتوو کرێکارا کورڎەسانی جەنگ مکەرۆ، جە ڕاو هرووژمە ئەرەگیریەکاشۆ هەوڵ مڎۆ تەماموو خاکوو پانیشتوو کورڎەسانی بوزۆنە چێروو دەسەڵاتوو ۋێشۆ و چەسپنۆش بە سنوورەکا تورکیایۆ. ئانە جە پرۆژەو ئەرەگیری ئاڎیشانە خاڵەی یووەمەنە. حەرپۊکەی هرووژمەکۍ پەی سەرو کەشوو وەهاری و سەرگەلێ بەشێوە هەرە گرنگۍ ئا پلانە قڕکاریێنۍ. هەوڵەکۍ پەی ۋۍ یاونای پا مېڎانا، هەوڵداین پەی ۋۍ یاونای بە دەروازەو شاری و مەحاڵەکا پانیشتوو کورڎەسانی.
حەرچنڎە بە رادێوە لووان دلۍ دەگا و مەحاڵەکا و ئا مافشە پنەدریان کە جموجۆڵوو گەلوو هەرێمەکەی بوزۆنە چێروو هەیمەنەو ۋێشۆ، بەڵام مەرامەکێشا قووڵۍ و ۋەرفراوانتەرێنۍ. حەرپۊکەی ئەگەر دەوڵەتوو تورکی بیاوۆ خاڵەی یووەموو مەرامەکەیش، یاخوڎ هەرێمەکەی جە روو جوگرافیوە بوزۆنە چېروو هەیمەنەیشۆ، ئەگەر ئەرەنیشتەکێچش کوردۍ با جە ڕاو کولتوری شۆڤێنیزمی تورکیوە پێچەوانە مبۆوە. حەرپۆکەی ئی پرۆسەی فاڕای دیموگرافیاو گەلوو پانیستوو کورڎەسانی گێڵنۆوە پەی قۆناغەو کۆڕەو و کۆچبەری سەردەموو سەدامی. جیای ئاڎیشایچ مەرامەکە ئەرەنیشتەکەردەو ئەرەنیشتا تورکی و چەتەکاشانە. پی جۆرە خەریتەو پانیشتوو کورڎەسانی بە هرووژمۍ چەپەڵەرە ۋییەرۆنە و بیەو ئیساتۍ ۋێش جە دەس مڎۆ.
بارزانی بازرگانی بە ونەو گەشمەرداوە مکەرۆ
کەشەکاو پانیشتوو کوردستانی کە بە ونەو هەزارا گەریلایا و پێشمەرگاو نیشتمانی ئاوی دریان، پا ڕاددە شکۆمەند و ناوازێ بێنێ. گەلوو پانیشتی بە دەیان جارێ یانە وڕیێکێشا واوەی سەشێ کەردێوە و بە پیکوو ستەموو سەروازاو سەدامی وڕیێنێوە و کۆچبەرێ بیێنێ. بە سەدان زاڕوێ، گەنجێ ئەداوتاتێ بیێ بە قوربانی سەروو ئی خاکەیوە. هەرپاسە زیاتەرجە ٣٠ ساڵان هێزەکاو گەریلاو ئازادیی بە بەخشای گیانی جوانوو وێشا ئی خاکەیە جە ئەرەگیرکەراو تورکی مپارێزنا و ژیوای گەلوو هەرێمەکەیشا ئارامیینە پارێزنان. ئا خاکە سەیەو ئازارا و قوربانیییانە تا ئیساتێ هەن، ئارۆ سەروو دەسوو بارزانییوە پێشکەش بە سەدامێوی تەری مکریۆ.
گەریلا جەنگوو ئازادییش بەردەواما، پەنەوازا گەلوو پانیشتوو کوردستانیچ هەڵوێستی ڕۆشنشا بۆ
لایێوە کۆشیای گەریلای پەی ئازادیی کوردستانی هەن و لایێوی تەرۆ هەوڵدایەکاو بنەیانەو بارزانی پەی تەسلیمکەردەی ئیرادەو گەلووپانیشتوو کوردستانی هەن. ئایا پەنەوازا گەلوو پانیشتوو کوردستانی پەشتیوانیی جە ئازادیی وێش بکەرۆ، یان وێش بدۆ دەسوو هەوڵەکاو بنەیانەو بارزانییوە و کەسێتیی ئەردۆغانینە گەردەنیشا بوزانە چێرووچەقوەو سەدام حوسەینێوی تازەیوە؟
هێزەکاو گەریلای حەر جە ئەوەڵۆ زانێنی چەنی بە تاکتیک و شێوازی کاریگەر هجووم بکەرانە سەروو ئەرەگیرکەرا. هجوومەکاو ئەرەگیرکەراشا بێئەنجامێ کەردێ و ناچارێشا کەردێ بیاوناشا یاگێوە کە گەریلاش نیییەن چەنە. ئی هەڵوێست و ڕۆحەو گەریلایە گردوو هەرێمەکاو پارێزنای مەدیاینە فرە خاس دژوو ئەرەگیرکارا گیریانرە وەر. هێزەکاو کەوشوو بەهاری و هەرێموو سەرگەلی مزانانە متاوا بەوری شیکاری و دیاریکەردەی هەرجووڵێویی سوپاو تورکی بکەرا و هەنگامەو دماییشا بزانا، پەی ماوێوی فرەین وێشا پەی جەنگێوی چینەیە ئاماە کەردەن، باڵاشا بە فیشەکێ و دەروونشا بە ڕێبەر ئاپۆی و خاک و وەڵات و گەشمەردا پەڕ کەردەنۆ. هەست بە گرنگیی پلێ ستراتیژییەو وێشا و پرۆژەکاو دەوڵەتوو تورکی مکەرا. جەخت مکەرانێوە کە جارێوی تەر نازانە گەلوو پانیشتوو کوردستانی بە دەسوو خیانەتەکاو بنەیانەو بارزانیی تووشوو کارەساتی دڵتەزنی باوە.
گەلوو پانیشتی بە دەنگ و هەڵوێستەکاشا وەراوەروو ڕاکارەکاو بنەیانەو بارزانی و ئەرەگیرکاریی دەوڵەتوو تورکینە متاوا کاریگەریێوی گرنگ سەروو ڕاوەلوای جەنگی وەش بکەرا مەیدانەکەنە، کۆشیایەکاو گەریلای بە هەڵوێستە دروسەکاشاوە سەرێعتەر و گەورەتەر سەرمگنۆ.
حەر چەنی قڕکەردەی گەلوو پانیشتی، بنەیانەو بارزانی ئەمریکانە با
پەنەوازا گەلوو پانیشتی ئا فیداکارییە بوینا، کە ئیساتێنە کەشوو بەهارینە مکریۆ، وەراوەرنە دەس بوزانە سەروو دڵ و ویژدانیشا. پێویسا حەقیقەتوو بنەیانەو بارزانیی وەراوەروو گلێرگەینە بوینا و خاکوو کوردستانیشا پەی جیا نازانە، گەل و ئا جەنگەوانێ پەی ئازادیی مگژیانە ساعیبێ ئی خاکەینێ.
پەنەوازا گەلوو پانیشتوو کوردستانی هەست پینەیە بکەرا و بزانا، کە بنەیانەو بارزانیی گردوو خاکوو پانیشتوو کوردستانی مورەشا بە عوسمانییەکا و بە زەڕەکەیش بانکەکاو ئەمریکاینە دا داراییشا زیاد مکەرا، ئا وەختە دەوڵەتوو تورکی دەسش بە قڕکەردەی گەلوو پانیشتوو کوردستانی کەرد، جا وەختەنە بنەیانەو بارزانیی زووتەرین وەختەنە واشنتننە و نیۆرکەنە کۆشکەکاو وێشانە مبانە.
تا ئی ئازارە پەڕ ناسۆرێ ملوو گەلوو پانیشتیرە نێ، ئیساتێنە گەریلا حەر بستێوی کەشەکاو کوردستانینە حەربارودۆخێوەنە جەنگ و کۆشیای مکەرا. تا ئی کۆشیایە بە ئامانجوو سەرکەوتەی وێش بیاوۆ، گەلوو پانیشتی ناچارێنێ پەی بیەی وێشا دەسشا دەسوو گەریلاینە بۆ و خەتەو کۆشیای بەرزە بکەراوە.
