پەرلەمانتارەو کانتۊنوو ست گاڵێن فرانسیسکا ڕیسەرە ئەرەیاوناش، تا ئەورووپا کارتوو پەنابەرا دەسوو ئەرڎۊغانینە بەر نارۊ، ئاسان نییا فشار وزیۊ سەروو تورکیای. 

پەرلەمانتارەو پارتوو چەپی سەوزوو سویسرای فرانسیسکا ڕیسەرە کە وەختوو ورچنییەکەینە پێسە ئەندامێوە شاندی سویسری  لوێبۍ کورڎسان، جوابوو پرسیارەکاو ئاژانسوو هەواڵوو فورات (ANF)یش داوە.

ڕیسەرە ئانەشە وات کە ورچنییەی ئی جارەیە فرسەتێوە گەورە بۍ و واتش:"بە داخۊ ئانە کە چەمەروان کریۍ ڕووەش نەدا. وەختێوە جا بێنمۍ چەنی نوێنەرانو هەدەپەی، پارتوو چەپی سەوزی و کەسە جیاوازا دیدارما ساز کەرد. هەوڵێما دۍ کە جە کەمپینوو ورچنییەی ئاڎیشا بیاومێنە. دماتەریچ ڕۊو یەکشەممەی پێسە چەمداروو بنکەو ورچنییەی لوایمۍ بنکەکەکاو دەنگدای، دیما کە ئاستێوە فرەنە مافەکاو خەڵکی پاشێلۍ کریا."

فرانسیسکا ڕیسەرە سەبارەت بە هەڵوێستوو یۊبییەی ئەورووپای سەروو پەرسەو کوردی، کە بەرڎەوام ماچا 'نیگەرانێنمێ' واتش:

"من بڕوام بە دووۍ چێوا هەنە:

*یۊبییەی ئەورووپا و بە گردین ئەورووپا بۊنەو سیاسەتوو پەنابەرا و کۊچبەراو تورکیایۊ نیگەرانێنۍ. فرەو وەڵاتا تەرسا کە لێشاوێوە گەورەو پەنابەرا بۍ و نەتاوا هامکارۍ با. بە بڕواو من، پێسە یۊبییەی ئەورووپای مشۊم ساحیبوو سیاسەتێوە خاستەری با بارەو پەنابەراوە.  پەی ئانەیە ئاڎیشا قبووڵۍ کەرا مشۊم بەینوو وەڵاتانە ڕایۍ گونجیۍ وێزاوە. وەروو ئانەیە ئیسە پێسە ئەوسای نییا، کۊچبەرۍ فرەتەرێنۍ. بە واتەی 'شۊنێنە قۊرخ هەن و ئێمە جە کریایۊ تەرسمێ' ئینە مەکریۊ.  یۊبییەی ئەورووپای ناچرا ڕاێوە خاستەرە وێزۊوە. ئا وەختە متاوۊ فشار وزۊ سەروو ئەرڎۊغانی.

*دووەمشا پەی سویسرای ئابوورین. چەنی باڵیۊزوو سویسرای لە ئەنقەرەنە یۊترینما دی و ئادیچ واتش کە ئەرڎۊغان ئینا دلۍ قەیرانێوە ئابوورینە. هەرپاسە واتیچش نوێنەراو ئا کۊمپانییایا کە توورکیانە وەبەرئارڎەی کەرا هەستیارێنۍ، چونکوم پەیوەندییش بە زەڕیوە هەن، یانۍ پەی ئانەیە فشار وەش کەرمۍ و کارتێوەما دەسۊ بۊ، پێسە سویساری وەختۍ مافوو خەڵکی پاشێل کریۊ متاومۍ کە واچمۍ بە کۊمپانیایەکا چاگە وەبەرئارڎەی نەکەرا، بەتایبەت کە فشار وزیۊ سەروو گەلوو کوردی."

ڕیسەرە ئەرەیاوناش کە حەوڵۍ مڎا، تورکیا وەراوەروو پیمانەو ئەرەمەرزیایەکاو ئەورووپایۊ مل کەچ کەرا و واتش: "وەروو ئانەی ئا پەیوەندییە پەشتیش بە یاسۍ بەستێنە، مەتاوۊ بەرە وزۊرە و بلۊ مشۊم ئەورووپا دەس چی کەلیمۍ ' ئێمە نیگەرانێنمێ'ی ورگێرۊ.

گەنجەکۍ فرێشا ماچا تورکیا ژیوایش چەنە نەمەنەن. جە مانگەکاو دماتەریوە ئەگەرش هەن تورکیا و کورڎسانۊ کۊچێوە گەورە بەرەو ئەورووپا دەس پەنە کەرۊ، سویسرانە رای خاسە پەی پەنابەرا هەنە، تەنیا پیویسمانە وێما ڕێکۍ وزمۍ، تەسەوروو ئامای کۊچبەرا نەک تورکیا و کورڎسانۊ لایەکای تەریچۊ کەرمۍ. من ئجۊم مانگەکای تەرنە ئا بابەتە سویسرانە بۊ بە پەرسێوە گەرمە."

س.ز