مونا زوبێرە کناچە شێوەکارێوە شاروو هەڵەبجەینە و ١٥ ساڵێنە و ماوەو پەنج ساڵان شێوەکاری کەرۊ، کە فرەو تابلۊکاش کولتوور، سروشت، میوە، درەخت و ولی گێرا وێشا، جە چەمپەنەکەوتەێوە تایبەتنەمونا پێسەو کناچە هونەرمەندێوە شێوەکارۍ سەبارەت بە چند پەرسێوە پێسە حەز و خولیای پەی هونەری و گرنگیی پاڵپەشتیی خێزانی و متمانەبەوێبییەی ژەنا جە نیشانەدای توانا و بەهرەکاشانە و چند بابەتێوە تەری لکیدریۍ بە هونەرەکەیش، پەی ئاژانسوو هەواڵوو فورات (ANF)ی دوا.

'جە ١٠ ساڵیوە شێوەکاری کەروو'

مونا زوبێرەی ١٥ساڵە ئەوەڵوو چەمپەنەکەوتەکەینە وێش ئشناسا و واتش، کە ئەوەڵوو حەزی و خولیایش جە ١٠ ساڵیوە دەسش پەنە کەرڎەن و بە ڕسمکێشتەی  بەبۍ ئانەی لوێبۊ دەورەو فێربییەیوە یان کەسۍ یارڎەیش بدۊ بە  حەز و عارەزوو وێش یاوێنە پی حەددەیە جە هونەری شێوەکاریینە.

 'زیاتر بایەخ بە ڕسمە کولتوورییا و سروشتی مدەو'

 هەرپاسە مونا زوبێرە، واتش کە تابلوەکاش جە فستیڤاڵەکانە نمایشۍ کەرۊو زیاتەر بایەخ بە ڕسماو سروشتی مدۊ پێسە چندین نۊعە ول و مێوەی جیاوازی، ماچۊیچ: "ئیساتێنە خەڵک زیاتەر مەیلش پەی ڕسماو ولا و میوەی هەن، کە ژەنیفرەتەر یانەکاشا پینیشا ڕازناوە، چونکوم تێر ڕەنگێنۍ و زیندەیی دلۍ ڕسمەکانە  موینیۊ و واتیچش کە ڕسمۍ کولتووریێچ کێشوو". 

 'ئینەیچە پاسەش کەرد کە بوو بە  شێوەکارە'

مونا باسوو ئەوەڵوو هەرمانەکاش کەرد و واتش: "حیچ کەسێوە منش فێرەو شێوەکاریی نەکەرڎێنا و تەنیا ئەوەڵ براکەم دەسش پەی هەرمانۍ کەرد و وەلۍ بۊنەو وانایۊ دوور کەوتۊ جە هەرمانەو شێوەکاری، منیچ چەمم بڕۍ وەنەش و ئیلهامم جە تابلۊکاش ورگێرت و متمانەم بە وێم بۍ و قەرارم دا بوو بە شێوەکارە، وەشبەختانە ئیساتۍ یاوێنا ئاستێوە خاس هونەرەکەمنە، سپاسوو ئەدۍ و تاتەیم کەروو، کە فرە پاڵپەشتێم بیێنۍ جە یاوایمنە پی ئاستە".

 'سەرەڕاو قسە نەرێییا بەرڎەوامە بییا'

کناچە شێوەکارەکۍ واتیچش: "فرەو کەسی ماچا ئی کناچە زارۊڵێنە و پێویس مەکەرۊ ئی هەرمانۍ کەرۊ، وەلۍ  سەرەڕاو قسەی نەرێییا من وێم پەیچوو تۊڕەی کۊمەڵایەتییێم نیارە و چا هەرمانەکام نیشانە مدەو، ڕۊ دماو ڕۊی کەسە نزیکەکام زیاتەر هانیشا دانۍ و پەرەم دا بە هەرمانەکێم و متمانەم بە وێم بی و کەسە نزیکەکێم تابلۊکێمشا یانە و یاگەکاشانە نمایشی کەرڎۍ و پێسەیچ هەرمانەکێم سەرنجەو خەڵکیشا کێشتە".

 'دووەدڵۍ نەبیدۍ جە ئرمانای بەهرەکاتانە'

مونا پەیامێوەش ئاڕاستەو کناچا و کورا کەرد کە بەهرەدارێنۍ  و واتش: "وەشبەختانە خێزانەکەم پاڵپەشتێمنۍ، و داوا ئانیشا کەروو کە بەهرەدارێنۍ بەیا وەرۊ کە بتاوا تەوانا و بەهرەکاشا نمایش کەرانۍ و توڕە کۊمەڵایەتییەکانە وەڵاشا کەراوە، پەوکای پەیامم پەی کناچە و کوڕە بەهرەدارا ئانەن، کە دووەدڵی نەبا و ئەوەڵ جە کەسە نزیکەکاشاوە دەس بە وەڵاکەرڎەیوە بەهرەکاشا کەرا، شارەکەو وێشانە نمایشش کەرا و پێسەیچ متمانێشا بە وێشا زیادە بۊ و گنا وەڵێ". 

 ئی نۊعە تابلووۍ سەرنجە کێشا  

 ئاخرۊ دەربارەو دلێنەو هەرمانەکاش کە کێشتێنێش، مونا زوبێرەی شیوەکارە پەی ئاژانسوو هەواڵوو فوراتی (ANF) واتش: "زیاتەر تابلۊو میوەی و ولا کێشوو چونکوم ڕەنگشا تێرا و سەرنجە زیاتەر کێشا و وەختۍ یانەکانە منریارە، ڕەنگەو یانەکەی کەراوە، فرەتەر حەز بە کێشای ولا کەروو بە بەراورد بە چیوەکای تەری، ئا نۊعەو وڵایچە کە کریێوەنۍ، وەختۍ ڕسوو سروشتی و درەختیچ کێشوو بایەخێوە فرە مدەو بە ورڎەکارییەکا".