ئەندامو کۆمیتەو ڕاوەبەری پەکەکەی موراڎ قەرەیلان بانگەوازش پەی بەشداربیەی جە مەراسیمەکا نەورۆزینە کەرد و واتش، "کریۆ نەورۆزو ٢٠٢٥ بۆ بە سەرەتێوە تازە پەی ئازاڎیی ڕابەر ئاپۆی و چارەسەری پرسو کوردی."
ئەندامو کۆمیتەو ڕاوەبەری پەکەکەی موراڎ قەرەیلان بەشداریش جە بەرنامێوە تایبەتی ستێرک تیڤیینە کەرڎو چنەشەنە وەڵێکۊتەی و گەشەئەسایەکۍ دماو بانگەوازییە تاریخیەکەو ٢٧و شوباتو ڕابەر ئاپۆیش هۊرسەنگنۍ.
چەمپنەکۊتەیەکەو موراڎ قەرەیلانی پی جۊرەنە:
*ئینایمۍ سەرەتاو پرۆسەو نەورۆزینە. مەراسیمەکۍ نەورۆزی بە هوتافەو 'ڕابەرایەتی ئازاد، گلېرگەی دیموکراتیک' بە جۆشو خرۆشۆ پێشوازیشا ۋنەمکریۆ. پی بۆنۆ گەرەکتانە چێش واچدۍ ؟
سەرەتا سڵام جە گرڎو گەلوو کوردی مکەر و نەورۆزشا پیرۆز مکەرو. وەڵۍ ئانەینە جوابو پرسیارەکێتا بڎەوە گەرەکما ئانەی واچو؛ کۆچی دماینو ئەڎا ساکینە ئاراتێما ئەژنی. خەمبارێش کەردیمۍ. جە نزیکۆ ئەڎا ساکینەی ئشناسێنا. ئەڎێوە نموونەییە بۍ. گرڎو ژیوایش جە ڕەنج و فیداکاریینە بەرد سەر و تا دما نەفەس بەردەوامە بۍ. ئەڎا ساکینە ئەڎاو گردیما بۍ. بەڕاسی کۆچ کەردەیش خەمبارێش کەردیمۍ. سەرساغی ۋێما پەی گرڎو بنەیانەکەیش، ئەڎایا ئاشتی و خەڵکو ئامەدی موازو. ڕاسا جە ژیۋاینە نەمەنە. ئەرکمانە بیمۍ بە ڕۆڵێوە عالو ئاڎۍ و لایەق بە فیداکاری و ڕەنجەکا ئاڎۍ بیمۍ. قەولو ئینەی مڎەیمۍ.
نەورۆز گرنگیێوە گۊرەش هەن جە تاریخو گەلا هەرێمەکەی و کوردەسانینە. ڕابەر ئاپۆ ٥٢ ساڵۍ چێوەڵی جە ڕۊو نەورۆزینە بەرکۊتەیە تاریخیەکەش بەروست. چا سەردەمۆ گرڎ کاتۍ نەورۆز بیەن بە ڕۊو بەرکۊتەیۍ تازەی، مڎرامانی و چالاکی؛ بی بە ڕوێوە کە پریشکو ئېری یاوا ئاسمان، کە وەڵتەرۍ کەردەیۆ ئېری بە تنتەرین شێوە قەڎەغە کریۍ. گەلەکەما جە دەورو ئېرو نەورۆزی، ئېرو مڎرامانی و ئازادیرە سات بە سات زیاتەر پیرۆزشا کەرڎ و پێشوازیشا ۋنە کەرڎ. پەی ئینەیچ جەمۍ گەشمەرڎۍ گیانشا فیدا کەرد. سەروو گرڎیۆ جە بۆتان و نسێبین، جە گرڎو کوردەسانینە بە فیداکاری شەهادەت یاگەگیربی، وە پی جۊرە قبوڵ کریا. سەرو ئی بنەمایە گرڎو گەشمەرڎا نەورۆزی بە ڕێزدارییوە یاڎمارووە. سەرەتا نەورۆزی جە ڕابەر ئاپۆی پیرۆز مکەرو، سڵام و ڕێزداری و دڵسۆزی ۋێماش نیشانە مڎەو. هەرپاسە نەورۆزی جە ئەڎایا گەشمەرڎا و گرڎو بنەیانەو گەشمەرڎا پێرۆز مکەرو. وە ئی ڕووە مبارەکەیە جە گرڎو گەلوو کوردی و گەلاو هەرێمەکەی پیرۆز مکەرو، جە گەریلاکاو ئازادی کوردەسانی و هەمڕایاما پیرۆز مکەرو. جە دڵۆ هیواو سەرکۊتەی پەی گرڎ لایۍ موازو جە ساڵەی تازۍ نەورۆزینە. جە کەسایەتی کاوەی سەردەم- مەزڵوم دۆغانی و زەکی ئاڵکانینە گرڎو گەشمەرڎا شۆرشی بە ڕێز و پنەزانایۆ یاڎۍ مکەرووە، ئا قەولەی پاڎیشاما دان واوەی مکەرمێوە. یادەوەرییشا جە کوردەسانی ئازاد و دیموکراتیکنە زیڼە مەنۆوە.
هامکات جەژنەو ڕەمەزانی نزیکە بۆوە. جە ئیساتێوە جەژنەو ڕەمەزانی جە گەلەکەیما و جەهانی ئیسلامی پیرۆز مکەرو.
جە کاتێوە گرنگەنە پێشوازی چی ڕووە پیرۆزا مکەرمۍ. بەتایبەت نەورۆزو ٢٠٢٥ نەورۆزێوە ئاسایی نییا. گەلەکەما ئی نەورۆزە بە هوتافەو 'ڕابەرایەتی ئازاد، گلېرگەو دیموکراتیک'ی پیرۆز مکەرۆ. ئی نەورۆزە بۆ بە سەرەتێوە تازە پەی نەورۆزو چارەسەری و ئازادی ڕابەر ئاپۆی. هەرۋێش ئازادی ڕابەرایەتی جە هەمانکاتەنە ئازادی گەلوو کوردی و چارەسەری پرسو کوردین. پەی ئانەی نەورۆزو ٢٠٢٥ بۆ بە نەورۆزو ئازادی ڕابەرایەتی و گەلوو کوردی، مشۊم بە گرڎو هێزیماوە گنمۍ هەوڵدای و ئەوەکۊشایۆ.
کریۆنەورۆز بۆ بە سەرەتێوە. هەر ۋێش جە تاریخو ئەوەکۊشایمانە، گرڎ نەورۆزێوە بیەن بە سەرەتاو بەرکۊتەیۍ تازەی. ئی نەورۊزەیچە ڕەنگە بۆ بە سەرەتێوە پەی هەڵمەتەو ئازادی و چارەسەری. پەنەوازا پی مەعنێوە پێشوازی جە نەورۆزی بکریۆ. هەرۋێش گەلەکەما پېسە ئازادی ڕابەرایەتی پێشوازی جە نەورۆزی مکەرۆ؛ ئینە هەڵوێسێوە درووسا، بەڵام مشۊم فرە ۋەرفراوانتەر هۊرسەنگیۆ. ئازادی ڕابەرایەتی بە ماناو چارەسەری و ئازادی گەلوو کوردین. هامکات بەماناو ئاشتی بەینو گەلاو کوردی و تورکین. سەرو ئی بنەمایۍ مشۊم گرڎ کەسۍ جە کوردەسان هەرێم و ئۊروپا و جبەرو وڵاتینە بەشداری نەورۆزی بکەرۆ. ، بە بەهێزتەرین شێوە بەشداری نەورۆزو ٢٠٢٥ ی بکەرا. جە نەورۆزەنە تەنیا مشۊم هوتافەکۍ "بژیۋۆ سەرۆک ئاپۆ و ئازادی پەی ڕابەرایەتی" بەرزۍ بکریاوە. پەنەوازا بە بەهێزتەرین شێوەی جەماوەری هوتافەکۍ وچیاوە. مشۊم گرڎو ئازادی، دیموکراسی و یەکسانی جە دەورو ویستو داواو گەلوو کوردینە کۊبۆوە.
جە ئارۊوە بەتایبەت نەرۆزو ئامەدی فرە گرنگا. ئامەد هەم مېیانیا، هەمیچ بە تەمامی ڕۆو ٢١و ئاداری چا نەورۆز پیرۆز بکریۆ. پۊکەی مشۆم نەورۆزو ئێساڵ و ئامەدی، جە نەورۆزو ٢٠١٣ گۊرەتەر بۆ. ئا نەرۆزە نزیکەو دووۍ ملیۆن کەسا بەشدارۍ بێڼۍ. پەی ئێساڵیچ مشۆم جەماوەری و گۊرەتەر بۆ. گەلەکەما جە دەوورووبەرو ئامەدی، ڕحا، ئیلح و مێردینینە مشۊم بەشدارۍ دووۍ نەورۆزا با. هەم نەورزو شارەکەو ۋێشا، هەمیچ بەشدارۍ نەورۆزو ئامەدی بانە. بەتایبەت پی جۊرە گەلەکەما گرنگی بڎۆ بە پرۆسەکەی و بانگەواز بکەرۆ. داواکاری ئاشتی، چارەسەری، ئازادی و دیموکراسی مشۆم چا مېڎانەنە بە جەماوەری بەربڕیۆ. مشۊم جەهان مبارەکبایی گۊرەو ئازادی و دیموکراسی بوینۆ. مشۊم پی جۆرە پێشوازی جە نەورۆزی بکریۆ.
*جە ٢٧و شوباتینە ڕابەرایەتی ۋەرو چەما گرڎو جەهانیوە بانگەوازێوەش کەرد. تەڤگەر بانگەوازەکەش پېسە مانیفێستۆیۍ پێناسەکەرد و ئایێربەسش ئەرەیاۋنا، بەڵام دۊڵەت حیچ هەنگامېوەش نەنیا. جە بەرنامێوەنە جە ٤و شوباتینە واتت 'مشۊم ڕابەر ئاپۆ ئازاد بۆ، بە تەنیا نمەتاوو بانگەوازو چەکنیایرەی جە گەریلای بکەرو.' سەبارەت پینەی شمە چێش ماچدۍ؟
ئیسەیچ من هەمان چێو ماچونە. تا ئیسە چنین هەڤاڵێما جە بەرنامەکانە بەشدارێ بیێنێ. دماین جار هامسەرۆکایەتیما بەشدار بێ، هەمان چێوش وات.
ئیسە ئا کەسێ کە هەوڵ مڏانە چنیشا ئاشتی بکەرمینە، واتە دۆڵەت، مشۆم ڕاس یاوۆنە. ئا چێوەی کە ڕابەر ئاپۆ جە بانگەوازە تاریخییەکەیشەنە وستش ڕۆژەڤۆ بێ بەها نییا، چێوێ فرە گۆرەن. ٥٢ ساڵە ئەوەکۆشای و، ٤١ ساڵێن جەنگێ بەردەواما. کادرێما بە قەرارو خاوەن هەڵوێسێ ئایدیۆلۆژیک، دلێ ئی تەڤگەرەینە یاگێشا گێرتێنە. قەرارو بەستەو کۆنگرەی، هورشانایۆ پارتی و چەک نییارەی چێوێ ئاسایی نییا. پۆکەی مشۆم ئەرەمەزنارەو ئی پارتەیە ڕابەر ئاپۆ، کە گرڏو هەڤاڵا ئاڏی بە بنەما هورگێرانە، تاوۆنە ئی پرۆسەیە بە ئەنجام یاونۆنە. ڕابەرایەتما تاوۆنە ئینەی بە شێوێ چالاک وسۆنە پراکتیکۆ، ڕێکوزتەی بکەرۆ و بە شێوێ تەندروس سەرش وسۆنە. پەی ئانەی هیچ گروپێوە چبەرۆ نەمەنۆ، گرڏ کەسێ قایل بۆنە، ئێمە ماچمێنە با پاسە بۆنە. بڕێ ئینەی پێسەو مەرجێ شڕۆڤە مکەرا و ماچانە، 'مەرج قبوڵ مەکەرمێنە'، بەڵام پەی ئانەی بە تەمامەتی گوزەریۆ ئینە پەنەوازییەکەن. مشۆم دەرفەت بۆنە پەی ئانەی ڕابەر ئاپۆ بە شێوێ چالاک بەشداری پرۆسەکەی بۆنە. واتە مشۆم ئازاد بۆنە، ئازادانە هەرمانەکاش بکەرۆ.
بڕێ هەڤاڵێما نییەنێ مێڏانەنە، یان ئینێ چبەرو وڵاتیۆ یان ئینێ زینانەنە، جە ئەرەیاوناکاشانە ئاماژەشا پانەیەدا کریۆنە ڕابەرایەتی بە مەڵامەتو تەکنیکیۆ پەیام گیانۆنە، بەڵام ئینە هەرمانێ نییەنە تەنا بە پەیامێوە تەمام بۆنە. بابەت ئانەن ئەر کۆنگرەی دروس بەسیۆنە، مشۆم ڕابەر ئاپۆ جە گرڏو قۆناغەکانە و ئا قەرارێ بسیانە ئاگادار بۆنە و جواب دۆوە. ڕەنگە نێ مێڏانو کۆنگرەی و چبەرۆ بەشداری بکەرۆ؛ چی بارەنە تەکنیک تاوۆنە دەورش بۆنە، بەڵام مشۆم شاندێ بلۆ لاشو و گێڵۆوە، مشۆم ڕوانگەکێ دریانە بە شاندەکەی و گیانۆشا، هەرپاسە مشۆم چنی ئا کەسا قسێ بکەرۆ کە قایلێ نەبیێنێ. با گرڏ کەسێ زانۆنە، جە دۆخو ئیسەینە هەڤاڵ، جەنگاوەر و فەرماندەما هەن قایل مەبۆنە. هەڤاڵێما چبەرۆ پی جۆرە قسێ مکەرا بە زاناو وێشا هورسەنگنای مکەرا، بەڵام چێگەنمێ و ئێمە خاستەر مزانمێنە. چێگەنە بڕێ بابەتێ هەنێ پەی هەڤاڵاما جیا مازمێنە خاستەر بۆنە.
ئیسە جە ڕاو سەرکۆتەو ئی قۆناغەیە بڕێ جە وەرپرسا دۆڵەتی ماچانە، 'پەنەوازا بە تەمامەتی جابەجێ کریۆنە و ئەنجام دریۆنە'؛ ڕاسا، پەنەوازا ئینە جابەجێ کریۆنە، بەڵام پەی ئانەی جابەجێ کریۆنە، پەنەوازا هەلومەرج وەش بکریۆ. دۆڵەت باخچەلی داواش کەردە و ڕاش وەردەموو ئی پڕۆسەیە کەردۆ. چی بانگەوازەنە چێشش واتە؛ "با عەبدوڵا ئۆجالان پەی چەک نییارەی و هورشانایۆ داوا بکەرۆ؛ با چنی گروپو دەم پارتی جە پەرلەمانەنە قسێ بکەرۆ؛ پی جۆرە هەتا دمای مافو هیوای دانش پۆرەنریۆ." پۆکەی ئیسە داوێوە کریێنە و کەسێ وەرپرسێ دۆڵەتی ئاماژەشا پانەیەدان داواکارییەکەشا پنە خاس بییەن، جە یاگێ وێشەنە وینانشا و مەمنونێش بیێنێ. دیسان پێسەو پەکەکەی ئێمەچ جوابی ئەرێنیما داوەو و پەی ئانەی ئی پڕۆسە بلۆ ڕاوە، ئایێربەسما ئەرەیاونا. جە ڕاسینە سەرەتا بە شێوێ ئەرێنی پێشوازییشا چی بابەتەیە کەرد و ئەرەیاوناشا کە بانگەوازەکەو ڕابەرایەتی تەمام مکەرۆ. کریۆنە بڕێ دماتەر هەڵوێسشا فاڕابۆ، بەڵام تاوەکو دمای ئەرێنی نزیک بیمیوە، بە پڕۆژەو ڕابەرایەتیما بڕوا مکەرمێنە و بە تەمامی بەشدارێ بیمێ. چی دۆخەنە پەنەوازا بڕێ یاسێ سەرڕاسێ کریانە و ڕا وەردەمو ڕابەرایەتی کریۆوە، بەڵام جیاتی ئانەی ئینەی بکەرا (واتە یاساکێ سەرڕاسێ کریانە).
سەبارەت پینەی گەرەکما خاڵێوە تەر ئاماژە پنە کەرو: پەی نموونەی، ئیسە جەنگاوەرێما و فەرماندەرەکێما فرەیشا ئا هەڤاڵێنێ کە دماو ساڵەکا ١٩٩٩ و ٢٠٠٠ی بەشداری ڕیزەکاما بیێنێ. گرڏو ئانیشا دامو ئا ساڵاوە بەشدارێ بیێنێ، بە ئامانجو مسۆگەرکەردەو ئازادیی ڕابەرایەتی بەشدارێ بیێنێ. هەتا ئا هامڕێ دەنگو ڕابەرایەتی نەژنەوا، نەوینا کە ڕا وەردەمو ئازادی ڕابەرایەتی کریانۆ، مەکریۆنە بە ئاسانی قایلێ مەبانە. پۆکەی واتم، بانگەواز مەکەرو. چونکە چنی هەڤاڵا مژیونە، مشناسوشا و زانونە. پەی چێوێ کە قایل مەبانە و ئەنجامش مەڏانە، چی بانگەواز بکەرو! بێگومان من بانگەواز مەکەرو؛ چونکە نییا یاگێ وێشەنە. پەی ئینەی پەنەوازا هەوڵدای نیشانە دریۆنە. هەرپاسە ئینایمێ دلێ جەنگینە. چنین چێوێ چانە پەی هێزێ کە ئینا دلێ جەنگینە وچیۆنە!
ئا هێزێ کە ئینێ دۆڵەتەنە بە ئاوەزێ سەلیمۆ جوڵیاوە، پەنەوازا ئی دۆخە وەرچەم گیریۆنە و پەی وەڵکەوتەو پڕۆسەکەی ئا چێوێ پەنەوازێنێ جابەجێ کریانە. ئینجا پی جۆرە پڕۆسەکە وەڵێ گنۆنە.
*زوانو بەشێوە جە ۋەرپەرسا دۊڵەتو تورکی چی پرۆسەنە حیچ فاڕیایێش سەرەرە ناما. زوانێوە تن و ژەعراویی بەکار مارا. ماوۍ چێوەڵی یاشار گولەر وەزیرو وەرگیری تورکیای قسێش کەردۍ و ئەرەیاۋناش، "مشۊم بەبێ حیچ مەرجێ چەکەکاشا تەسلیم بکەرا". چی بارۆ چێش ماچدۍ؟
بێگومان ئینەیچ مژارێوە گرنگا. پرسو کوردی پرسێوە قەڎیمیا. ئەر جە سەردەمو عوسمانییەکاوە ۋەرو چەما گێرمۍ، ٢١٩ساڵېن سیاسەتو نکۆڵی هەن؛ ئا وەختەی عەبدوڵا بابانزادە کویسنجەقەنە جە ساڵۊو١٨٠٦ینە کاردیش جە پارێزگارو عوسمانی دا، چا کاتۊن ئی کێشە بیەیش هەن. بەتایبەت سەردەمو کۆمارینە، ئەر سەرهۊردای شێخ سەعیدی بە سەرەتێوە مقارنە بکەرمۍ، پرسو کوردی ئیساتۍ ١٠٠ ساڵێن بیەیش هەن. جە سەڎەی ۋېیەردەنە کۆمکوژی و دلېنەبەردەی فرە ڕووەشا دان. جە سەردەمو ئێمەیچەنە کوشتەی و کۆمکوژیی ڕووە مڎۆ. دۊڵەت ماچۆ، 'تورکیایۍ بۍ تیرۆر'. بە مەعنێوەتەر تنوتیژی بە تیرۆر نامۍ بەرا. بێگومان ئەر ئا تنوتیژییە بە تیرۆر نامۍ بەرا ئینە یەکلایەنە نییا. ئەر ئانەی ئێمە مکەرمێش 'تیرۆر' بۆ، ئانە دۊڵەت چانەی زیاتەر تیرۆرش کەردەن. جە کوردەسانەنە ١٧ هەزارۍ و ٥٢٥ هرووژمۍ نادیارۍ بیەیشا هەن، کە جە لایەنو هێزەکاو دۊڵەتیوە ئەنجام دریێنۍ. جە فرەو ئی جەنگانە ئینسانۍ گیانشا جە دەسدان، بڕێشا بە زامڎاری جە هرووژمەکانە ڕزگارشا بیەن. جگە چانەیچ ژمارەو ئا دەگەیا کە چۆڵۍ کریێنۍ و ئا کەسۍ کوشیێنۍ، بێ شومارا. ئیساتۍ بڕۍ باسو هەستیاری مکەرا؛ ئایا گەلوو کوردیچ هەستیاریش نییا؟ بێگومان کە هەنش.
بە پوختی جەنگێوە ڕووەشدان؛ ڕەگ و ڕیشەش پەی ١٠٠ ساڵا چێوەڵی گێڵۊوە، ئێمەیچ گەرەکمانە جە ئیساتێوە ئی کێشەیە چارەسەر بکەرمۍ. واتە ئێمە گەرەکمانە ئاشتی بارمێنە ئاراوە. بەڵام پەی ئانەی ئینە بکریۆ، سەرەتا مشۊم ئا زۋانەی کە بەکارمۍ زوانو ئاشتی بۆ نەک زوانو دژمنایەتی. بێ گومان ئاوەزیەتیچ مشۊم ئاوەزیەتو دۆسایەتی بۆ نەک دژمنایەتی. بەڵام ئیساتۍ موینمۍ؛ ئا ئاوەزیەتەی کە هەن و ئا زوانەی کە بەکارمۍ هەمان ئا ئاوەزیەتەو ۋېیەردەین. زوانشا پەڕا جە ئېری، پەڕا جە دژمنایەتی زوانشا ئېرش چنەوارۆ.
لایەنۍ فرۍ هەنۍ کە گەرەکشانە ئی پرۆسەیە شێونا. ئاشکران بڕۍ لایەنۍ جە لایەنو حکومەتی و هەرپاسە جە لایەنو کوردیچۆ هەنۍ کە گەرەکشانە پرۊسەکەی شێونا. جە گرڎی گرنگتەر، جە ۋەرکۊتوو مېیامینینە لایەنۍ فرۍ هەنۍ کە گەرەکشانە ئی جەنگە بەردەوام بۆ. چونکی ئینۍ فرەیشا ئیسفاڎە چی جەنگەیە مکەرا. هەر پۊکەی ڕابەر ئاپۆ گەرەکشا ئاراستەکا فاڕۆ. واتە کەسانێ هەنۍ کە جەنگشا گەرەکا. ئاساییا کە ئاڎۍ زۋانشا تیژ بۆ و هەرچێوە خیاڵشارە مۍ واچاش. بەڵام بەکاربەردەی هەما زوانی جە لایەنو ۋەرپەرسا حکومەتیوە کە وەزیرێنۍ و ئەرکی فەرمیشا هەن، مژارێوە تەرا و نمەبۆ پا جۊرە بۆ. ئێمە ئاشتی وەش مکەرمۍ یان گەرەکمانە یۆترینی دلېنە بەرمۍ؟
چی جەنگەنە کەس نمەتاوۆ بە واتەی 'من سەرکۊتا، سەرکۊتەیۍ هەرزان بەدەس بارۆ. ٤١ساڵێن ئی جەنگە بەردەواما و کەس نەتاوانش کەسی دلېنەبەرۆ. ئێمە نە تاوانما هێزەکاو حکومەتی جە کوردەسانەنە بەربکەرمۍ، نە ئاڎۍ تاوانشا پېسە ڕێکوستەی ئێمە دلېنەبەرا و سەنگەرەکاما چنە بسانا. واتە ئەنجامەکە یاوان بن بەس و مشۊم قبووڵش بکەرا. یاشار گولەر کە ۋەرپرسیاریش هەن حکومەتەنە؛ گرڎو قسەکاش بۍ بنەمێنۍ. ئیساتۍ هرووژمی ئاسمانی مکریۆ سەرو هەرێمەکاو پارێزنای مەدیای، پاسەن؟ تەنانەت پا فڕۊکایچۆ نمەتاوا حیچ زەرەرێما لا یاونا. چونکی ئێمە ڕاوجای پەنەوازما ۋەرا ۋەر گێرتێنۍ ۋەر. بەڵام بەردەوام و بەردەوامێنۍ جە هرووژمەکاشا. بە هەمان شێوە تۆپورانەکێشا بەردەوامێنۍ. ئینە گرڎ جە خەزێنەو حکومەتیوە بەرمشۆ. جە حەقەتینەنە ئەر شۆنیرەلوای بکەردۍ بەرگنۆ کە چا هرووژمانە حیچ ئەنجامێوەشا بە دەس ناردەن، گرڎ حەفتێوە ماچا: 'ئێمە ئاڼنە کەسېما کوشتۍ'. واتە بەردەوام ژمارەو گیان جە دەسدایەکا زیاڎ مکەرا و پاسە ۋێشا نیشانە مڎا کە فرە سەرکۊتێنۍ چا هەرمانێنە. جە حەقەتینەنە چێوۍ چامنە نیا؛ ئێمە زەرەرۍ چامنەما لا نەیاوان.
چنی ئی گلېرگەیە دروۍ مکەرا؛ جگە چانەیچ سەرکۊتەی و قازانجێوە ساختە وەش مکەرا، ئینۍ گرڎ دروێنۍ؛ نە سەرکۊتەیشا بەدەس ئارڎەن و نە زەرەرۍ چامنەشا بە کەسی یاونان، پی جۊرە گەرەکشانە قازانج بکەرا. ڕەنگە هەمان کەس هەمان چێو پەی سەرتەرو وێش گوزارشتە بکیانۆ. زانیاری ناڕاسو و غەڵەت مڎا بە سەرۆککوماری یا وەزارەتەکا تەری، پەی نموونەی ماچۆ: 'ئێمە ئی ژمارە فرێما کوشتێنۍ' و هتد. بەڵام چێوۍ چامنە بیەیش نیا. پەی نموونەی بەیاننامێوەشا وەڵا کەرڎۆ و واتشا: قفڵما جە ناوچەکەی دان. جە حەقەتینەنە چێوۍ چامنە بیەیش نیا، بەڵام جە بەیاننامە ڕسمیەکانە پاسە باسشا کەردەبۍ.
قسێوە هەنە ماچۆ: ئەوەڵین چێوۍ کە جە جەنگەنە مرۆ، حەقەتینا. ئێمە پېسە شۆڕشگێڵنا ماچمۍ: "ئی قسۍ بەنەفرەت مکەرمۍ و حەقەتینەکا وزمۍ ڕووە پەی ئانەی حەقەتینەکۍ نەمرا. بەڵام جەنگیچ ئی لایەنێشە هەنۍ. پەی نموونەی پاسە مەزانو بەرزتەرین مېیانو حکومەتی زانیاری تەمام و دروسشا سەرو وردەکاری جەنگەکەی بۆ. بەپاو قسەکاشا، جە ماوەو چن چەند مانگێوەنە هەزاران کەسېما گیانشا جە دەسدان. بەڵام چێوۍ پا جۊرە بیەیش نیا. بێگومان کاتێ ئینەی ماچو مەبەسم ئانەنە کە ئێمە جە جەنگەنە زەرەرما لا یاوان، بەڵام نەک پا جۊرەی ئاڎۍ باسش مکەرا. ئینە فرە دورا جە حەقەتینیۆ. جەنگێوە دەروونی ڕاوەبەر مکەرا و بەردەوامیش پنەمڎا. خاسا ئێمە گەرەکمانە سەردەمێوە تازە دەس پنە بکەرمۍ. ئێمە گەرەکمانە جەنگ مردۆ و ئاشتی بەرقەرار بکەرمۍ. شمەیچ مشۊم فاڕیەیدۍ. بەڵام موینمۍ کە هەرپېسە وەڵتەری بەردەوامێنۍ. پۊکەی ئێمە چێوی چامنە قبوڵ نمەکەرمۍ، ئی جۊرە قسا جە لایەنو حکومەتیوە بەتایبەتی ڕەڎۍ مکەرمێوە،. ئەر ئی جۊرە قسۍ بەردەوامۍ با، دەرورێوە تێکدەرانە گێڵنا. ئاڎۍ ڕا پەی پرۆسەکەی وەش نمەکەرا، بەڵکم پا جۊرە ڕاش ۋنە مگێرا.
خاسا ئا وەزیرە واتەنش: "بەبێ مەرج تەسلیمۍ با. کێ تەسلیمو شمە بۆ؟ ئانۍ گرڎ کە باسشا مکەری فیدایێنۍ؛ گرڎ پەی مەبەسێوە پیرۆزی بیێنۍ بە شۆڕشگێڵنۍ. کێ تەسلیم بۆ؟ ئایا ئا کەسۍ ئینەی ماچا ۋێشا باوەڕیشا بە قسۍ ۋێشا هەن؟ پەی نموونەی ئیسە جە مەتینا و زاپ و فرەو شۊنا تەرینە جە مابەینو سوپاو تورکی و هێزەکامانە ٢٠٠-٣٠٠ مەترێن. مکابەرە دریان دەسو ئا سەروازاوە و هاوار مکەرا: "سەرۆکەکەتا قسێش کەردێنۍ بەیدۍ تەسلیمۍ بیدۍ. ئینە چ ئاوەزیەتێوەنە چنی ئاوەزو چ ئینسانۍ گونجیۆ. کێ مۍ و تەسلیمو شمە بۆ؟ ٤ ساڵېن چا جەنگ مکەرا، نەتاوانتا پێگەو سەنگەرەکاو هەڤاڵاما گێردۍ. ئایا کەسێوە کە چا سەنگەرانە مڎرامان مکەرۆ، پا ڕۆحە بەرزۆ مۍ و تەسلیمو شمە بۆ؟ کەسانۍ بە کەرامەت کە پەی دۆزو ڕەوای ۋێشا فیدا مکەرا بانۍ بە پەکەکە. ئینسانی پەکەکەی بێ هیچ دوودڵیێوە ۋێش پەی کەرامەتو ۋێش فیدا مکەرۆ. ئی جۊرە بانگەوازیۍ نەک هەر ئەنجامێوەشا نییا، بەڵکم حیچ ئیسفاڎێوەیچشا پەی تورکیای نییا، بەڵام هەڵای بەردەوامێنۍ. بەڵام ئەر هەرمانە پەی بەرقەرار بیەی چارەسەری بکەرا، بێگومان ئیسفاڎەی فرەیچش پەی تورکیای بۆنە.
ڕابەر ئاپۆ ئی قۆناغێشە نەک هەر پەی کوردی، بەڵکم پەی گەلا تورکیایچ وەش کەردەن. پەی ئەرەمەرزنای دیموکراتیکی، گەرەکشا فاڕیای جە تورکیەنە بارۊنە ئاراوە. پی جۊرە هەوڵ مڎۆ ڕا ۋەردەمو تورکیاینە بکەرۊوە. ئایا ئیساتۍ تورکیا نیا بن بەسەنە؟ پێشئامایەکۍ ئیساتۍ ناوچەکەی مەترسی سەرو تورکیەی وەش مکەرا. ئینەی گرڎ موینمۍ؛ پۊکەی چێگەنە ئینە پەنەواز نیا ئینەی بە وردی ڕۆشن بکریۆوە. بەڵام کاتێ ئاژەکەی بە دروسی موانمێوە، موینمۍ تورکیە ڕووبەڕوو بن بەسی بیەنۆ. سەرۆک ئاپۆ واتش: 'ئەر تورکیا گەرەکش بۆ بە ئاشتیانە چنی کوردی ئی چەق بەسیە ۋېیەرنۆ، ئێمە ئاماڎێنمۍ. کەواتە، ئەر گەرەکتا، مشۊم پا جۊرە مامەڵەش چنی بکەری. پۊکەی نمشۊم ۋێتا جە قسۍ ناڕاسۍ و چەواشەکارانەی دوور داردۍ. پەنەوازا گرڎ کەسێ حەقەتینەکا قبوڵ بکەرۆ.
بە پوختی، کەسە ئەنەیاوێکۍ جە حکومەتو تورکیاینە پەنەوازشا پانەینە کە ئینەی بوینا و هەڵمەتێوە دەس پنە بکەرا کە ڕا پەی پرۆسەکەی بکەرۆوە. ئەگینا پا ڕێبازەی ئی وەزیرە نیشانەش دا، حیچ وەڵێکۊتەیۍ بەدی نمۍ، بەڵکم ئی جۆرە قسە بێ بنەمایۍ سوکایەتی بە کەرامەتو ئینسانی مکەرا، پرۆسەکەی وزۆ مەترسیۆ. پەنەوازا گرڎ کەسۍ ئینەی بزانۆ و ئەر بەڕاسی گەرەکشا بۆ پرۆسەکەی بەرەو وەڵۍ بەرا، پەنەوازا دەسبەردارۍ ئی جۆرە سیاسەتاشا با.
*بڕۍ ۋەرپەرسۍ دۊڵەتی ماچا، "پەکەکەما دلێنەبەرڎ، پەکەکە ۋەروئانەی شکسش ئارڎەن پۊکەی ئامان دلۍ پڕۆسێوە پی جۊرەیە." سەرو ئی مژاریە چێش ماچدۍ؟ ئاخۆ ڕاسا پەکەکە ۋەروئانەی شکسش ئارڎەن ئایێربەسش ئەرەیاۋنان؟
بەڵی بڕۍ لایەنۍ پېوەس بە دۊڵەتی هەنۍ ئی قسا مکەرا، بەڵام بنەماو ئی قسا ڕاس نیا. بنەماو ئینەی جەنگی تایبەتا. مشۊم گەلەکەما، ڕای گرڎیی و دۊڵەت بزانۆ کە هیچ کاتێ ناچارۍ نەبیێنمۍ. بە پێچەوانۆ ۋێما پەی قۊناغێوە جە جەنگی جیاوازی ئاماڎە کەرێنمۍ، بەڵام ڕابەرایەتی ئینەی دیاری مکەرۆ، کە ئینە دە ساڵێن سەرو ئی مژاریە ورد بۆوە و گەرەکشا بە پرۆسێوە جە فاڕیای فاڕیای بارۊنە ئاراوە. بە بەربڕیەیۍ تەر گەرەکشا پەی ئێمە و پەی بەرژەوەندی تەمامو هەرێمەکەی پەرە بە پرۆسێوە پی جۊرەیە بڎۆ. ئی پرۆسە هۊرگیرو ماناڎاری و قوڵبیەیۊیۍ گرنگیا. پۊکەی نمەبۆ حیچ کەسێ ئی هەنگامە تاریخیۍ ڕابەر ئاپۆی بارۊنە ئاستو مژارگەلۍ سادەی پی جۊریە.
وەڵۍ گرڎ چێوێنە پەنەوازا بزانیۆ، پەکەکە تەڤگەرێوە گلېرگەیی، سیاسی، تیۆری و ڕێکوزیاییا. پەکەکە تەنیا گەریلا نییا. کریۆ پەکەکە سەڎەنە ١٠ش سەروازی بۆ. بنەما سەرەکییەکەش گلېرگەییا. پەکەکە ئیسە چی پڕۆسەنە جە سەرنیشتوو کوردەسانی و گرڎ شۊنێنە ئینا ئەوجەو بەهێزی ۋێشەنە. ئینە مژارێوە حاشا هۊرنەگیرا.
جە حەقەتینەنە جە مژارو گەریلاینە لاوازی نییا. کەسانۍ بێ ئەزموونۍ نیەنمۍ. عەیامێوەن ئینایمۍ دلۍ ئی هەرمانێنە. فرەو ڕووەدایا کە هەڵای ڕووەشا نەڎان مزانمۍ دەرەنجامەکەشا چێش بۆ. هەڵبەت نمەواچمۍ بێ کەموکوڵیێنمۍ؛ کەموکوڵیما هەن، بەڵام جە بڕۍ ڕووەدایێوە متاومۍ ئا ئەنجامەی ڕووەمڎۆ بوینمۍ. دیما کە جە ساڵەو ٢٠١٦ینە گلادیۆو ناتۆی بەرنامەی پەنەوازش پەی ئاماڎەکەردەی فرۆکەو سیخوری چەکدارکەردەیشا بە تورکیای دا، هەرپاسە نیشانەش دا کە پارچە هەستیارە پەنەوازیەکۍ متاویۆ چکۊوە دەسۍ گنا، پی جۊرەشە کەرڎ کە ئی تەکنیکەو جەنگی(درۆن) گنۆ دەسو سوپاو تورکی. دماتەر جە کۆمپانیاکاو چێرو هەیمەنەو دۊڵەتیوە دەسشپنەکەرڎ و چی بوارەنە وێش وەڵێوست. ناتۆ، چی چێوۍ چامنەش کەرڎ؟ پەی ئانەی لاوازێما بکەرۆ و هامسەنگی جەنگی فاڕۆ لاو دۆڵەتو تورکیرە، ئینەش کەرد. پۊکەی سەرنجما دا دیما کە چەکێوە وەڵێکۊتەو تیرۆرکەردەین، پینەی متاوا فشارما چنە بکەرا و گورزێوە گۊرێما ۋنە بڎا. دژو ئینەی چێشما کەرڎ؟ هێزەکېما نەکیاستۍ پەی سەرنیشتوو کوردەسانی. هێز و چالاکییما جە سەرنیشتەنە کەمکەردۆ. ئینە جە ڕوو ستراتیجیوە شکس نییا، بە پێچەوانۆ پەی ئانەی سەرۍ گنمۍ ڕێوە تاکتیکیە بۍ، بەڵام ئیساتۍ ئا ژەنەڕاڵۍ کە سەرۍ نەکۊتۍ، پېسە وەزیرەکاشا، گەرەکشانە سەرو ئی نزیکبیەیۆ تاکتیکییە سەرکۊتەیۍ پەی ۋێشا وەش بکەرا. ماچا "مەجالما پەی پەکەکەی جە سنوورەکا تورکیاینە ناستەن." خاسا ئەر شمە سەرۍ کۊتێندۍ، پەی چێشێ ئی گرڎ قەڎەغەو ئاماو لوایا ئەرەیاۋندۍ و چا ئۊپراسیۆن ئەنجام مڎەیدۍ؟ جە بۆتان، ئامەد، دێرسیم و سەرحەدەنە گرڎ ڕوۍ ئۆپەراسیۆن هەن. ئەر پاسە بۆ، شمە چی نمازدۍ خەڵک بلۆ دلۍ باخەکاش؟ مزانا کە هێزەکېما ئینۍ گرڎ شۊنێنە، بەڵام نمازمۍ جما. هەڵبەت گەرەکمانە ئاماڎەکاریی بکەرمۍ. پەی ئانەی گەریلا دلۍ ئی هەلومەرجانە چنی ۋێش پارێزنۆ و سەر گنۆ، ئێمە چنەئامێنمۍ و ئی ئەوەکۊشایما تا ئاستێوە بە ئەنجام یاونان. ۋەرو ئینەیچ ئێمە شکس نمارمۍ.
پێفرۆمانسی فیدایانەو قارەمانا، ئاسیا عەلیۍ و ڕۆژگەر هێلینی جە چالاکییەکەو ئی دماییەو توساشینە ، گرڎ چێوێش وست وەرو چەما. واتە مەرجە کە هەر مانگوە جارێ جە ئەنقەرەنە چالاکی بکریۆ! ساڵێ جارێ وەسۍ نییا! ئەر هێزێوە بتاوۆ بە شێوێوە نموونەیی، ئازایانە، پڕۆفیشناڵانە چالاکی بکەرۆ، حەجگیز شکس مارۆ؟ بێگومان هەمڕا ئاسیا و ڕۆژگەر تەنیۍ نییەنۍ. هەمڕێشا هەنۍ. و ئێمە سەرو ئینەی مردمۍ. هەڵبەت گەرەکما نیا چی سەردەمەنە فرە سەرو مژارەکا پېسە ئینەی قسۍ بکەرمۍ، بەڵام تەڤگەرێوە فیداکارۍ چامنێش با و خاوەن ئەزموونێوە گۊرەن شکس نمارۆ. نەک شارەزا ساختەکۍ کە جە کەناڵە تەلەفزیۆنییەکاوە حەقەتینەکا ئاوەژوو مکەراوە، مشۊم شارەزای حەقەتینە، حەقەتینو ئانەی کە ئێمە پاسە شکس نمارمۍ بیاوانە.
جە لېوەتەرۆ ویرشا کەرڎۆ کە بە تەکنیکو درۆنی ئاستەنگی و ئاڵۆزیما پەی وەش بکەرا. هەر وێش درۆنشا وست گێڵایۆ. دژو ئانەی چێشما کەرڎ؟ ئەوەکۊڵیایما کەرڎ پەی ئانەی بزانمۍ ئی درۆنە چنی دلێنەبریۆ دەبرێت. جە ئاکامەنە یاوایمۍ بە ئەنجامێوە پی جۊریە. ئینەیچما پېسە مزانیێوە پەی گەلی وەڵا کەرڎۆ. ئیسە گەرەکم نیا یۆ بە یۆ نامۍ مۆدێلەکاشا واچو، بەڵام متاوو واچو چا کاتۊن تا ئیسە فرەو درۆنا جە هەرێمەکاو ئێمەنە نمەخولیاوە. چونکی ئەر بەیا ڕاسەوخۆ وزیارە واری. تا ئیسە ٢٤ درۆنۍ جە لایەنو گەریلاکاماوە وزیێنێرە واری. ئیتر ئەر جەنابو یاشار گولەری بەرگنۆ جە ۋەرا ۋەرو کامێراکانە و گرڎ چێوۍ بە ڕاسەوخۆ پەی گەلی وەڵا مکەرۆوە، چی باسو ئانیشا نمەکەرۆ؟ ئایا ئینۍ گرڎ فڕۆکەکۍ دۊڵەتی نیەنۍ کە ۋەرا ۋەر بە میلیۆنان دۆلارانە وەشۍ کریێنۍ؟ چونکی گەرەکش نیا واچۆ پەکەکە یاوان ئاستێوە کە فڕۆکەکا وزۊرە واری. گەرەکش نیا گەل حەقەتینەکا بزانۆ، بەڵام ئینە حەقەتینەکەن.
مژارێوەتەر هەن چانەینە ڕای گرڎین ئاگاڎارش نەبۆ، بەڵام بێگومان ۋێشا مزانا. ئیساتۍ تەکنیکێوەما هەن کە متاوۆ تەمامو سەرنیشتوو کوردەسانی و هەتا نیمەو تورکیای بکەرۆ ئامانج و جە مەوداو ٨٠٠ کیلۆمەتراوە ئەنجامەکەی پێکۆ. ئەر گەرەکما بۆ متاومۍ ئابووریی تورکیای و گرڎ چێوۍ بکەرمۍ ئامانج و قەیرانێوە گۊرۍ وەش بکەرمۍ.
بە پوختی ستراتیجێوە ڕاوەبەر مکەرمۍ. پەنەوازا ئینە بزانیۆ. بە شێوێوە گرڎ چێوۍ بە جەنگی دەروونی نمەکریۆ. چانەینە بە جەنگی دەروونی یاوابۆ بە ئارۊی، بەڵام پەنەوازا بزانیۆ کە نمەتاوا چێگۆ بەردەوامۍ با. چونکی پرۆسێوە تازە دەسشپنەکەرڎەن و چی پرۆسە تازەنە نمەبۆ بە ڕێبازو جەنگی تایبەتی، مشۆم بە ڕێبازی حەقەتینە هەڵوێس وەش بکریۆ.
پەی نموونەی ٤ ساڵێن جە هەرێمەکا پارێزنای مەدیاینە جە (زاپ) جەنگ هەن. ناتۆ پاڵپەشتیش مکەرۆ؛ گرڎ چەکێوە مۆدێرن بەکارمارا. تەنانەت ڕۆبۆتۍ جۆراوجۆرێشا کیاستۍ دلۍ مەڕەکاماوە. هەڤاڵاما دەسشا سەرەرەگێرتۍ، بەڵام پەی ئانەی بڕۍ چێوۍ ئاشکرۍ نەبا، بە خاسما نەزانا جە میدیاکانە وەڵاشا بکەرمێوە. جارێوەتەر چەکی قەدەغە کریاشا بەکارئارڎ. پەدەکە هامکاریش کەردۍ، حکومەتو عێراقی هامکاریش کەردێ. بەڵام تا ئیسە نەتاواشا زاپی کۆنترۆڵ بکەرا. زاپ هەڵای ئینا دەسو ئێمەنە. بەڵێ کوچێشا گێرتەن، بەڵام ناوچە ستراتیجیەکۍ ئینۍ دەسو ئێمەنە. پەی نموونەی تا ئیسە نەتاوانشا بیاوا ئاوەو زاپی. ئاڎۍ ئامێنۍ دێرەلۆک؛ بەهامکاری پەدەکەی بارەگێوە سەروازیشا چا نیانەرە؛ چا دەسشا بە ئاوەو زاپی یاوان، بەڵام جە حیچ شۊنێوەتەرو ئا ناوچانە کە بنکە سەرەکییەکێما چنەشەنۍ، نەتاوانشا بیاوا بە ئاوەو زاپی و هەڤاڵا ڕاشا پنە نەڎێنۍ. ئینە ئا ئەنجامەنە کە جە ماوەو چوار ساڵانە پنەش یاوێنمۍ. ئینە پەی سوپێوە چامنە گۊرۍ چ مەعنێوەش هەنە؟ سەرەڕاو ئا گرڎو تەکنەلۆجیای و ئاسانکارییەی کە ئینا ۋەرو دەسیشەنە، جە ماوەو چوار ساڵانە نەتاوانشا ئا هەرێمەیە کۆنتڕۆڵ بکەرا. بەڵام هەڵای ماچا: 'ئێمە سەرۍ کۊتیمۍ'. چنی سەرۍ کۊتیدۍ! چێگەنە تاکتیکێوە هەن.
بە گوزارشتۍ پاسە بۍ بنەمۍ و پڕوپاگەندەی ناڕاسی نمەتاوا بیاوا بە حەقەتینەکا. ڕاسی ئێمە چێوەتەرا. چانەینە نەتاومۍ فرەو چێوی واچمۍ و باسش بکەرمۍ؛ ڕەنگە ئی قسۍ ئێمە تەنیا جە ئەرەیاۋنای ئازادو کوردینە وەڵۍ بکریاوە، بەڵام نمەیاوۆ گرڎ شۊنۍ و نمەگنا ڕۆژەڤۆ، دیسان ڕەنگە بە تەمامی نەیاوۆ ڕای گرڎی تورکیای، بەڵام ئینە حەقەتینەکێنۍ.
ئێمە جە مانگۊو کانوونو دووەمینە گلېرۊبیەو ئەنجومەنو فەرماندەیی هەپەگەیما ئەنجامدا. گرڎو ئا هەڤاڵا کە خوڵقە کریێبێنۍ ئاماڎۍ گلېرۊبیەکەی بێنۍ. گلېرۊبیەکەی زیاڎ جە حەفتێوەش خواینا و گفتوگۆی دۆڵەمەڼ و هەمەلایەنە ئاما وەڵۍ و هۊرسەنگنایۍ فرۍ کریۍ. پلانەو ساڵانەی تاوتوێ کریا و جە گرڎی گرنگتەر، ئێمە دوکتۆرینی (شۆک) جەنگیما بە پەشت قایمی بە ئەزموونو چوار ساڵا ۋېیەردەی مۆدێرنتەر کەرد. چوارچێوەو دوکتورینی جەنگی کە دیاری کریا سەرو ئا بنەمایۍ کار و ئەوەکۊشای مکریۆ و جەنگو گەلی شۆڕشگێڵنیی بەرەو وەڵۍ بەرمۍ، گرڎ چێوۍ دیاری کریان. تەنانەت کتێبەکەیچش نویسیان. واتە ئێمە جە کاتو جەنگینە ئاردەینەی فرە و فاڕیایما کەرڎ. فرەو چێوا کە وەڵتەر بیەیشا نەبیەن ئیساتۍ ئینۍ ۋەرو دەسیمانە. پەی نموونەی ئیتر تەنیا سەرو زەمینیۆ جەنگ نمەکەرمۍ؛ هەرپاسە چېرو زەمینینە جە جەنگو مەڕاەکانە کە بیەن بە شێوازێوە تاکتیکی جەنگ مکەرمۍ. ئاڎۍ تەکنەلۆجیاشا بۍ؛ ئێمە تەکنەلۆجیاما نەبۍ. ئیساتۍ ئێمە پەرەما بە تەکنەلۆجیایچ دان. ئیساتۍ متاومۍ جەنگی ئاسمانیچ پەرە پنە بڎەیمۍ. ڕەنگە هەڵای کەموکوڵی بۆ و نەبیمۍ ئاستو ئاڎیشانە، بەڵام لاو کەمیۆ متاومۍ جوابو هرووژمەکاشا بڎەیمێوە. ئینەیچ پا مەعنۍ کە جگە جە جەنگی زەمینی، متاومۍ جە ئاسمانیچۆ گورزەشا ۋنە بشانمۍ. هەرپاسە متاومۍ نەک تەنیا جە نزیکۆ، بەڵکم متاومۍ ئامانجەکا جە مەودێوە دووریچۆ پێکمۍ. سەرو ئی بنەمایۍ ئێمە دوکتۆرینو جەنگیما پەرەپنەدا. ئەر گەرەکما بۆ ڕۊشنتەر واچو ؛ پەیما بەرکۊت تا زیرەکی دەسکرد نەوزمۍ هەرمانە جە جەنگەنە، نمەتاومۍ گەریلای جە جەنگی مۆدێرنەنە جە ۋەراۋەرو تەکنۆلۆژیاو سەردەمینە پارێزنمۍ و سەرکۊتەی بەدەس بارمۍ. ئیساتۍ چی بوارەنە سەرۍ کۊتێنمۍ. ئێمە جە نیایرەی زیرەکی دەسکردینە سەرو چەکی و تاکتیکو جەنگینە یاوێنمۍ بە ئاستێوە دیاریکریا. جە هەمان کاتەنە ئێمە جە ڕاو ڕائاوردەی چڕ و پڕی ئایدیۆلۆژی و سەروازییوە، پەروەردەو ئینسانیچ بەرەو وەڵۍ بەرمۍ؛ ئێمە کەسۍ دڵسۆز، چنەئامۍ، پسپۆڕۍ و پیشەیی پەروەردە مکەرمۍ. کەواتە ئێمە چنی شکس مارمۍ؟ ئێمە سەرۍ گنمۍ. ئێمە ئاژێوە جیاواز و ئایندێوە گەشما هەن. ئێمە بە هێزۆ باوەڕیما هەن کە بە جەنگو سەردەمی تازەیما سەرکۊتەی بەدەس مارمۍ. ساڵانە تەمامو تەرکیزیما سەرو ئینەی مکەرمېوە، و بە پێکئاوردەی جەنگی فیداییما کە فەخرش پۊوە مکەرمۍ و ڕووانە زیاتەر ئیرادەما گەشە مکەرۆ، بە دڵنیایوە سەرکۊتەی بەدەس مارمۍ. پەنەوازا گەلەکەما ئینەی بزانۆ.
دڵسۆزۍ و وابەسۍ ڕابەر ئاپۆینمۍ
چنی ئی ئاژەو گەریلای، دڵسۆزۍ ڕابەر ئاپۆینمۍ. ئێمە جمېیەرێوە ڕابەرایەتینمۍ. فکر و ئایدیاو ئی جمېیەرەیە جە لایەنو ڕابەر ئاپۊیۆ ئەرەمەرزیان؛ ئێمەیچ بەشدارۍ ڕابەر ئاپۆی بیێنمۍ. ئەر ئیساتۍ ١٠ساڵێن ڕابەر ئاپۆ سەرنجش ئینا سەرو مژارێوە، بەدڵنیاییوە باوەڕما پنەشا و خاوەنداری جە بەرنامەکاش مکەرمۍ. بەڵام ئەر حکومەت سەرو ئی مژاریە نەمردۆ و ڕا نەکەرۆوە و واچۆ، بە چەک دلېتانە بەرو، ئانە قبوڵ نمەکریۆ. دماتەر سەرو بنەماو ئەزموونێوە کەهەنما تاکتیکەکاما دیاری مکەرمۍ و پېسە ئا دکتورینەی دیاریما کەردەن و پلانەما نیێنەرە سەرو بنەماو ئەزموونو ئا ٤١ساڵەیە بەردەوامۍ بیمۍ. پی جۊرە متاومۍ جە گرڎ شۊنێنە هرووژم بەهێزتەر دەس پنە بکەرمۍ.
بە پوختی ئێمە هۊرچنیێما فرێنۍ، بێ هۊرچنیەی نیەنمۍ و ناچارۍ نیەنمۍ حیچ چێوۍ بکەرمۍ. چ جە ڕوو سەروازی و چ جە ڕوو سیاسیوە گرڎ جۆرە هۊرچنیێوەما هەن. ئێمە جە ئاستی هەرێمیچەنە پېسە هێزێوەنمۍ. متاومۍ پەیوەندی وەش بکەرمۍ، متاومۍ ۋێما جە گرڎ هرووژمێوە پارێزنمۍ و بە پەشت بینای بە هێزو ۋێما گەشە بکەرمۍ. چی حاڵەتەنە ئێمە متمانەما بە ۋێما هەن، بە تواناکاما و بە سیاسەتەکاما هەن، بەڵام پېسە ئاماژەم پنەدا فرەتەرین متمانەما بە ڕابەر ئاپۆی هەن. هەرپاسە ئاماڎێنمۍ پڕۆژەکەو ڕابەر ئاپۆی کە ئیسفاڎەش پەی گرڎ لایۍ هەن وەڵێگنۆ. ئێمە ئیساتۍ هەرمانە سەرو ئانەی مکەرمۍ. چی خاڵێنە پەنەوازا ڕابەر ئاپۆیچ بە کردەوە هامکارما بۆ و حکوومەتیچ چی مژارەنە ڕا وەشکەر بۆ. ئەر قەرارا ئاشتی بەرقەرار بۆ، ئانە مشۊم بڕۍ هەنگامۍ بنریا، پەی ئانەی چەکەکۍ بەکار نەیا. ڕابەر ئاپۆ وتەنی، پەنەوازا ئەوەکۊشای جە تنوتیژی و چەکۆ فاڕیۆوە پەی مېڎانی سیاسی و یاسایی. تەنیا سەرو ئی بنەمایۍ متاومۍ فاڕیای وەش بکەرمۍ، بەڵام پەی ئانەی ئا هەرمانۍ بکەرمۍ، مشۊم لایەنی ۋەارا ۋەریچ بە عالی جە پرسەکەنە هەنگامەی پەنەوازە بنیۆ. نەک بە هەرەشۍ و چەواشەکاری و فشارەکۍ جە بەرژەوەندی شمەنە مامەڵە بکەرا، نمەکریۆ. بە پوختی ئێمە کراوێنمۍ و ئاماڎێنمۍ. ئێمە ئاماڎێنمۍ پەی پرۆسەو ئاشتی و چارەسەری سەرو بنەماو بانگەوازییەکەو ڕابەر ئاپۆی و ئەر حکومەت ئینەی قبوڵ نەکەرۆ و هرووژم بکەرۆ سەرما، ئێمەیچ ئامادەیی ئانەیما هەن بە جەنگ جواب بڎەیمێوە. پەنەوازا گرڎ کەسۍ چی حەقەتینیە بیاوۆنە.
