نازیلا مەعروفیانە، کناچە ڕۊنامەنویسەو کوردی بە نیایرەی بارمتەی بە کاتی ئازاڎە کریا
نازیلا مەعروفیانە، کە ماوەو ساڵۍ ویەرڎێنە چوار جارۍ هێزەکاو دەوڵەتوو ئێرانی گێرتێنە، بە نیایرەی بارمتەی بەکاتی ئازاڎە کریا.
ڕۊو ٣٠ ئابی نازیلا مەعروفیانە ڕۊنامەنویسەو کورڎەو ئەرەنیشتۍ تارانی یانەو وێشنە تاراننە پەی چوارەم جاری گیریا و کیانییا پەی زیندانوو ئێڤینوو تارانی.
ئا کناچە ڕۊنامەنویسۍ ڕۊو چوارشەممەی وەڵینی تۊمارێوە دەنگینە زیندانوو ئێڤینوو تارانیوە ئاشکراش کەرد، کە جە ئەوەڵوو مانگەو ئەیلوولیوە دژوو ئەشکەنجەی و گێچەڵپەنەکەرڎەی وەختوو گێرتەیشنە و دلۍ زینداینە مانیش جە وارڎەی گێرتێنە.
ئارۊ ئەرەیاونییا، کە ئا کناچە ڕۊنامەنویسۍ بە نیایرەی بارمتەی و بە کاتی ئازاڎە کریێنە.
دماو کوشیای ژینا ئەمینی-ێوە، نازیلا چەمپەنەکەوتەیش چەنی ئەمجەد ئەمینی-ی تاتەو ژینۍ کەرد و بۊنەو ئا چەمپەنەکەوتەیوە یەرۍ جارۍ تەرۍ گیریا و بەکاتی ئازاڎە کریا، دماین جار بە تۊمەتەو بانگەشەی دژوو دەسەڵاتی سزاو ساڵێوە زیندانی و پەنەوجارای بە بڕوو ١٥ ملوێن تمەنا سەرەرە سەپییا.
ئا کناچە ڕۊنامەنویسۍ، کە خەڵکوو شاروو سەقزین و ئەرەنیشتۍ تارانینە وەڵتەرۍ بۊنەو هەرمانۍ ڕۊنامەوانیێوە چنڎ جارێوە ڕووبەڕووەو فشاری و وەنەپەرسایۊ ناوەندە ئەمنییەکا بیێبێوە.
س.ز
