بنەیانەو نێرگز محەمەڎیۍ تۊڕە کۊمەڵایەتییەکانە ئەرەیاوناێوەشا وەڵا کەرڎۊ و واتشا: ڕاوبەروو زیندانەکەی بە ئەمرەو وەرپەرسە پلە باڵایا، پەی جاروو دووەمی ڕاشا نەدێنە نێرگز محەمەڎییە بلۊ خەسەخانەو دڵی، چونکوم سەرەش نەپۊژنانرە.  

کەسوکاروو محەممەڎیۍ واتشا، دماو ئانەیە ڕۊو دووەشەممەی تیمێوە پزیشکیۍ لوێنۍ زیندانوو ئێڤینی پەی وشکنای(فەحس)وو نێرگز محەممەڎیۍ، وەرپەرساو زیندانەکەی ئامادۍ نەبیێنۍ، کە نێرگزۍ بە بۍ سەرپۊش بیاونا خەسەخانە.

بنەیانەکە واتشا، کە نێرگز محەمەڎییەی ٥١ ساڵە بۊنەو کێشەو دڵی و سییەکاوە پێویسیش بە چەمداریی بەپەلەی هەن و واتشا: "تەنانەت ئامادۍ نییەنە پەی تیمارکەرڎەی وێش بە زۊر سەرپۊش بدۊ سەرەشرە و ژیوای وێش وزۊ دلۍ تەرسێوە".

نێرگز محەمەڎییە، کە ١٣ جارۍ گیریێنە، ٥ جارۍ حوکموو ٣١ ساڵا زیندانیش دریان پەنە و ١٥٤ جارۍ سزاو دایوەنەی. ساڵەو ٢٠٢١ جارێوە تەر گیریاوە، یوە بۍ چا کەسا کە بەشداریی سەرەورڎای "ژەنی، ژیوای، ئازادی"یش کەرڎ.

نێرگس محەممەڎییە چالاکەو مافوو ژەناو ئێرانی زیندانەکەو تارانیوە پەیامێوەش کیانا و واتش: "سەرکەوتەی ئاسان نییا، وەلۍ مسۊگەرا".

پەیامەکەو نێرگز محەمەڎیۍ بە زوانی فەڕەنسی لاو کیانا ڕەحمانیێوە ونیاوە و ئەوەڵوو مانگەو تشرینوو دووەمی پەلیانەی ڕسمیی نۊبڵینە وەڵا کریاوە.