هەردووە گەریلا سائیر مەنبەج و عەگید قامیشلۆ ئەرەیاۋناشا جە تەمامو تاریخینە، نەورۆز پەی گەلوو کوردی روێوە پیرۆزا، واتشا: "نەورۆز پەی ئێمە دڵوەشیا، سەرکۊتەیۍ تازەن، گۊرەکەردەی ئەوەکۊشاین".
جە گەریلا عەرەبەکا، گەریلا سائیر مەنبەج، وە گەریلا عەگید قامیشلۆ، بۊنەو ئامای جەژنەو نەورۆزیوە هەستو ۋێشا بەربڕی و جەختشا کەردۆ سەرو گەشکەردەی ئېرو مڎرامانی. ئی دووە گەریلا کورد و عەرەبە، تەئکیدشا کەرڎۆ، ئاڎۍ شۊنکۊتۍ مەزڵوم دۆغانینۍ و تا دما هەناسە پەی گەشکەردەی ئېرو نەورۆزی ئەوەکۊشای مکەرا.
گەریلا سائیر مەنبەج: "٢١ و ئاداری جەژنەو نەورۆزینە، ڕۊو مڎرامانیا، ڕۊو تازەکەردەیۆ شۆڕشین. پۊکەی گەلوو کوردی و گەلوو عەرەبی و گرڎو گەلە ستەمدیدەکا ئی جەژنۍ پیرۆزە مکەرا. ئېرو نەورۆزی پەی ۋێش هېماو دمایئاردەین بە ستەمکاریی سەرو گەلا و بەتایبەتی ستەمو سەرو گەلوو کوردی کە جە سەرەتاو تاریخیۆ تووشو فشاری و چەوەسنایۊیۍ فرەی بیەنۆ، پۊکەی ڕوێوە مبارەکا. نەورۆز پەی ئێمە دڵ وەشین، سەرکۊتەیۍ تازەن، گەشکەردەی ئەوەکۊشاین. گرڎ ساڵێ پی ڕۆحیانەتۆ پێشوازی چی جەژنۍ مکەرمۍ و زەماۋنە گێڵنمۍ. هېماو ئەوەکۊشای ئێمە هەمیشە گەشکەردەی ئېرو نەورۆزی بۆ. دلۍ پارتو ئېمەیچەنە ئی ئېرە هېماو ۋێش جە چالاکییە فیداییەکەو هەڤاڵ مەزڵوم دۆغانینە موینۆوە، چونکی ئی چالاکییە بی بە بناغەی سەرەکی پەی بەردەوامیی ئی تەڤگەرەیە. ئا ئێرەی هەڤاڵ مەزڵوم بە بەڎەنو ۋێش گەشش کەرد، بی بە ئېرو شۆڕشو گەلوو کوردی و عەرەبی. ئا فیکر و ئیرادەی کە ڕابەر ئاپۆ پەی گەلا وەڵێش وست، ئارۆ پاسە مکەرۆ کە ئی ئێرە دیسان بە سەرکۊتەی هۊرگیسیۆوە. ئێمە پېسە جەنگەوانا عەرەبی چی کەشانە، ئی فیکرەیە پەی ۋێما پېسە ڕاو هەقیقەتی موینمێش. حەجگیز سەرە مەنامنمېرە و مبارەکی ئی ڕووەیە پارېزنمۍ.
ئی ئێرە شۆڕشێوەن کە ئیتر دلۍ دڵەکانەگەش بیەن. هەزاران دژمنۍ مویناش کە گەرەکشانە گەلا دلېنە بەرا، پۊکەی پاشەکشە چی فیکرەیە نمەکەرمۍ. هەر ئینسانێوە ڕابەرایەتی موانۆوە مېیاوۆ پی حەقەتینیە. پۊکەی ئەوەکۊشایما بەردەوام بۆ، تا مېیاومۍ بە ئازادیی بەڎەنی ڕابەر ئاپۆی. ئا کاتە پیرۆزکەردەی نەورۆزی و ئازادی ڕابەر ئاپۆی بۆ بە یۆ.
ئی ئېرە سەرکۊتەی ئێمەن و هەرپاسەیچ بۆ. دیسان ئی جەژنۍ جە گەلوو عەرەبی و کوردی و سریانی و تەمامو گەلا پیرۆز مکەرمۍ، هیواڎارێنمۍ گرڎو گەلا بە دڵ وەشی و هێز و ڕۆحو یۊگێرتەیۆ، بە بەهێزکەردەی سۆسیالیزمی، پێشوازی چی جەژنۍ بکەرا".
ئی نەورۆزە بۆ بە نەورۆزو ئازادی بەڎەنی ڕابەر ئاپۆی
گەریلا عەگید قامیشلۆ: "سەرەتا مبارەکبایی نەورۆزو ٢٠٢٥ جە ڕابەر ئاپۆی و گەشمەرڎا شۆڕشی و گەلا ۋەرکۊتوو مېیامینی و جەهانی مکەرمۍ. سڵامو ڕابەر ئاپۆی جۆش و خرۆشێوە فرەش بە ئێمە بەخشا، هەرپاسە ئانەش نیشانە دایمۍ کە مشۊم جە چ ئاستێوەنە پێشوازی جە نەورۆزو ٢٠٢٥ بکریۆ. ئی نەورۆزە جیاوازتەرا جە گرڎو ساڵا وەڵینی. دماو عەیامۍ جە مڎرامانی ئیمراڵینە، سلامما جە ڕابەر ئاپۆیۆ پنەیاوا. پېسە ڕابەر ئاپۆ ماچۆ "تەڤگەرو ئازادی تەڤگەرو نەورۆزیا". جە کاوەی ئاسنگەرۆ تا کاوەی سەردەم مەزڵوم دۆغانی، ئەوەکۊشای و مڎرامانێوە گۊرە لوان ڕاوە. جە هەر نەورۆزێوەنە بە هەنگامەی گۊرۍ ڕۆحو سەرهۊردای ئەزموونکریان. ڕابەر ئاپۆ بناغەو ئی ڕۆحەیشە نیارە. ڕابەر ئاپۆ بە فیکر و فەلسەفەکەیش بی بە ڕابەرو گەلا ۋەرکۊتوو مېیامینی. بە فیکرو مۆدێرنیتەی دیموکراتیکی گەلاو ئی هەرێمەیشە جە باوشی گێرت.
پېسە گەریلاکاو ئازادی پەی ژیۋایۍ ڕاسی، بیمۍ بە بازنێوە گۊرەتەر دەورو ڕابەرێتیرە و پێشوازی چی نەورۆزیە مکەرمۍ. پەی بەدیئاوردەی ئینەی، جە چوارچێوەو پارېزنای ڕەواینە، هەرچی پەنەوازا مکەرمېش. پەی وەڵېکۊتەی چارەسەری جە ۋەرکۊتوو مېیامینینە، ڕابەر ئاپۆ ۋەرپرسیاریش گێرت ئەستۆ، ئێمەیچ حەرچی گنۆ ئەستۆما ئاماڎێنمۍ. بەڵام با گرڎ کەسۍ بزانۆ، تا ئازادی بەڎەنی ڕابەر ئاپۆی بەدی نۍ، پەو پەڕو قەوەتیۆ درێژە بە ئەوەکۊشای مڎەیمۍ. پېسە گەریلاکاو ئازادی، گەریلاکاو هەقیقەتی، خیاڵو گەشمەرڎا بەدی مارمۍ، جەخت چانەی مکەرمېوە کە ئێمە نەورۆزو ٢٠٢٥ مکەرمۍ بە نەورۆزو ئازادی بەڎەنی ڕابەر ئاپۆی".
