فەرمانبەراو هەرێموو کورڎسانی زیاتەر جە ٢ مانگان مووچەشا ورنەگێرتەن. حکومەت هەڵای وەختوو ئامای مووچەیش ئاشکرا نەکەرڎەن. کارمەنداو پەروەرڎەی و تەندروستی و شارەوانی پەی مووچەکاشا بایکۊتشا ئەرەیاونا، ئەوەخوایشا کەرڎۊ تا مووچەکاشا ورنەگێرا مەلاوە دەوام.  

پانیشتوو کورڎسانینە، ساڵەی تازۍ وانای جە ١٣و ئەیلوولیوە دەسش پەنە کەرد، وەلۍ مامۊسۍ و کارمەندۍ پەروەرڎەی بۊنەو نەدای مووچەیۊ، قەراروو بایکۊتیشا دان.

کۊیە

قەزاو کۊیەو سەر بە هەولێرینە بەرەو مەکتەبەکا نەکریانۊ. مامۊسۍ داوا کەرا مووچەو دووۍ مانگە وەڵیناشا بدا پەنە. سنووروو مەنتیقەو کۊیەینە ٢١٠ مەکتەبۍ هەنۍ و ٣٥ هەزار تەلەبۍ دلێشانە وانا. زیاتەر جە ٤ هەزار مامۊسا و کارمەندا دلێشانە دەوام کەرا.  

ڕاپەڕین

مامۊسۍ وەرڎەموو ڕاوەبەرایەتیی پەروەرڎەو ڕاپەڕین-ینە کوۍ بیێوە و داواو مووچەکاشا کەرڎە، مامۊسۍ واتشا، تا مووچە نەدریۊ دەوام مەکەرا.

کەلار

قەزاو کەلاروو سەر بە ئیدارەو گەرمیانی وەڵتەر کارمەندۍ شارەوانی و دادگای و تەندروستی وەروو نەدای مووچەی بایکۊتشا ئەرەیاونا و بەرڎەوامێنۍ، ئارۊیچ بەشێوە جە مامۊسایا بە هەمان ئامانج بایکۊتشا ئەرەیاونا، مامۊستایاو کەلاری واتشا تا مافەکێشا نەدریا دوام مەکەرا.

هەڵەبجە

بە هەمان ئامانج مامۊستایاو پارێزگاو هەڵەبجەی کوۍ بیێوە و وەرڎەموو بیناو ڕاوەبەرایەتیی پەروەرڎەو هەڵەبجەینە بایکۊتشا ئەرەیاونا.  

چا بۊنەنە، بەنامۍ مامۊسایاوە، مامۊسا سەڵاحەدین زەڵمی واتش: "پاڵپەشتیی گردوو دەنگە ناڕازییەکا کەرمۍ پەی ڕێزگێرتەی جە کەرامەتوو گردوو مامۊسایا. داوا وەنەو گردوو دەنگە ناڕازییەکا کەرمۍ هامکارێما با تا بیاومۍ بە ئامانجەکاما".

کۊمیتەو تەندروستی بایکۊتی گردیینش ئەرەیاونا

بە بەهانۍ نەدای مووچەیۊ، سەندیکاو تەندروستیی سلێمانی بایکۊتی گردینش جە سەرجەموو بنکە تەندروستییەکاو پارێزگاو سلێمانی-ینە ئەرەیاونا.

هاوژین عوسمان سەرۊکوو سەندیکاو تەندروستی  وەرڎەموو خەسەخانەو ھیواینە پەی ڕۊنامەنویسا واتش جگە جە بەشوو فریاکەوتەی و ناوەندەکاو بەشوو فریاکەوتەی خەسەخانەو شاری، خەسەخانەو زارۊڵا و بەشوو چەمداریی هەسی، سەرجەموو بنکە تەندروستییەکای تەری بایکۊتی گردین ئەرەیاونمۍ.  

درێژەو قسەکاشنە، هاوژین عوسمان ماچۊ: "یەرۍ ڕوۍ وەختما دا بە حوکمەتی، بۊنەو کەمتەرخەمی و پەشتگۊشوستەی داواکارییەکاماوە، یاوایمۍ ئی قەرارە، پێسە مافە ڕەواکاما دەس وزمۍ. ".

س.ز