پارتی دیموکرات و قیادە موەقەتە دیدوو د. قاسملۊیۊ
"خیانەتوو پارتی دیموكراتوو كورڎسانی، تەنیا وەراوەروو ئازاڎیوازاو پارچێوە كورڎسانیوە نەبییەن، بەڵكوم وەراوەروو حەر ئازاڎیواز و شۊڕشگێڵنیوە بییەن، حەرچوار پارچەو كوردسانینە."
دكتۊر عه‌بدوولڕه‌حمان قاسملۊ، جە نامیلكێوەشنە، كه ساڵەو ١٩٨١ بە هامبەشی چەنی عەبدوڵڵای حەسەنزاڎەی نویستەنشا، باسوو په‌یوه‌ندییه‌كاو پارتی دیموكراتوو كورڎسانی و قیاده موەقەتەی کەرۊ، چەنی حزبوو دیموكراتوو كورڎسانوو ئێرانی و گه‌لوو كوردی وەرکەوتوو كورڎسانینە. یاگۍ واتەینە ئی کتێبە چێروو نامۍ (خیانەتەکاو قیادە موەقەتەی بە نەتەوەو کوردی)وە و جە چاپکریایەکاو چاپەمەنی و ئەرەیاونای کۊمیتەی ناوەندی حزبوو دیموکراتوو ئێرانین.
خیانه‌توو پارتی دیموكراتوو كورڎسانی، ته‌نیا وەرانوەروو ئازاڎیوازاو پارچێوە كورڎسانینە نەبییەن، به‌ڵكوم وەراوەروو حەر ئازاڎیواز و شۊڕشگێڵنیوەنە بییەن جە حه‌رچوارپارچه‌و کورڎسانینە. پەی یاواینە و وانایۊ پەی ئی تارێخە پەڕ شه‌رمه‌زارییه، گەشمەرڎە قاسملۊ وەختێوە هه‌ستیار و خراپنە مێوە قسۍ و په‌رده سه‌روو ئا خیانه‌ت و وێورەشییاو پارتی دیموكراتوو كورڎسانیوە ورماڵۊ.
ئەوەڵوو نویسیته‌كه‌یشنە قاسملۊ، باسوو سه‌ركه‌وتەی شۊڕشوو چوارده‌و ته‌مووزوو ساڵەو ١٩٥٨ کەرۊ عێراقنە و ماچۊ: (دماو سه‌ركه‌وتەی شۊڕشی فرسەتێوە تارێخیی پەی گه‌لوو كوردی ئاما وەڵێوە، تا بتاوۊ مافه نه‌ته‌وه‌ییه‌كاش بەدەس بارۊ جە چوارچوەو عێراقێوە دیموكراتینە، كه ئاوەخت پارتی دیموكراتوو كورڎسانی به‌نهێنی خه‌بات کەرۍ. حوكمه‌توو قاسمی سه‌ره‌تاوه فرە هەنگامۍ دەردوارڎۍ و شۊڕشگێڵنانێش به قازانجوو خه‌ڵك و چینه زه‌حمه‌تكێشه‌كا نیۍ، مەسەلەن به‌شكەرڎەی زه‌مینوزاری. ساڵەو ١٩٦١ بڕۍ جە ده‌ره‌به‌گه‌كاو كورڎسانوو ئێراقی، جە به‌رنامه‌و ئیسڵاحاتوو زەمینوو حوكمه‌ته‌كه‌و عه‌بدولكه‌ریم قاسمی ناڕازیۍ بێنۍ و چەکشا ورگێرت و بوون و داشا کەش. دماو ماوێوە پارتی دیموكراتوو كورڎسانی، سه‌رۊكایه‌تیی ئا جمیەرە چەكدارییه‌یشە گێرت ده‌س و درووشمی نه‌ته‌وایه‌تی و خودموختارییش ورگێرت).
دكتۊر قاسملۊ باسوو هه‌ڵوێستوو حزبوو دیموكراتوو كورڎسانوو ئێرانی و خه‌ڵكوو وەرکەوتوو كورڎسانی کەرۊ، دماو دەسپەنەکەرڎەی خه‌باتوو پانیشتوو كورڎسانینە جا وەختەنە، كه گه‌لوو كوردی وەرکەوتوو كورڎسانینە هومێدشا پا جمیەرەو پانیشتی ورچنیەبۍ. ئا هامكارییۍ حزبوو دیموكراتوو كورڎسانوو ئێرانیچ کەرۊ پەی پارتی دیموكراتوو كورڎسانی و ماچۊ: (كادر و مه‌سولاو ئێمه، چە ئانیشاو وەڵاتی به‌نهێنی هەرمانە کەرێنۍ، چە ئانۍ كه ئاوارۍ كورڎسانوو ئێراقی بێنۍ، قورسایی هەرمانێشا وستەبۍ سەروو كۊشیای جمیەروو گه‌له‌كەیما كورڎسانوو ئێراقینە. ئا كادرۍ ئێمه پانیشتنە ژیوێنۍ، ده‌سه ده‌سه ئێنۍ پەی كورڎسانوو ئێرانی و چه‌ك و پووڵ و ته‌قه‌مه‌نی و وارڎەی و جل و پاڵۍ كوۍ کەرێنیوە و و یاونێنێشا به برایەكاشا كورڎسانوو ئێراقینە. خه‌ڵكوو كورڎسانوو ئێرانیچ خاس مزانا ئی هامكاریۍ چێرووو زه‌بروزه‌نگوو ساواكینە كۊ کریێوە).
دماو ئی هامكارییاو كادراو حزبوو دیموكراتوو كورڎسانوو ئێرانی و خه‌ڵكوو وەرکەوتوو كورڎسانی، پارتی دیموكراتوو كورڎسانی جە خه‌ڵكوو ئازاڎیوازوو وەرکەوتی دوورۍ کەوتێوە و په‌یوه‌ندییه‌كێشا چەنی حوكمه‌توو حه‌مه ڕه‌زا شای و ده‌زگاو هەواڵگێریی ئێرانی 'ساواك'ش قەوەت كەرد و خەتەو خیانه‌تیش ورچنیە.
پارتی دیموکرات و دەزگاو هەواڵگێریی شاهەنشاهیی 'ساواک'
دكتۊر قاسملۊ باسوو په‌یوه‌ندییه‌كاو په‌ده‌كه‌ی و ساواكینە ماچۊ: (ڕه‌فتار و هه‌ڵوێستوو بارزانی وەرانوەروو ئیمه خراپتەر بۍ، ساواك وێش خزنابۍ دلۍ پارته‌كەی، ئانەبۍ ئه‌فسه‌ری نامیە سه‌رهه‌نگ مودەڕسی، مەنتێقەو سه‌نگه‌سه‌رینە ئەمرەش كەرڎە به سەرۊكایه‌تیی بارزانی، كه هێزه‌كاو ئێمه سه‌روو سنوورینە دوورۍ گناوە و به حیچ نۊعێوە هاموشۊو ئێرانی نه‌كه‌را و چانەی زیاتەر داواش كەرڎە، كه دلۍ ئێرانینە حیچ چالاكیێوە نەکەرا).
ڕێكه‌وتەیەکاو بەینوو مه‌لا مسته‌فای و شاو ئێرانی نه‌تاواشا ڕا جە خه‌باتوو پارتی دیموكراتوو كورڎسانوو ئێرانی گێرۊ، خه‌ڵكوو شاره‌كاو پیرانشاری و بانه‌ی و سه‌رده‌شتی، ئەرەپڕۍ، دماو ئانەیچە حه‌ر زوو شا په‌ناش بەرڎە وەروو مه‌لا مسته‌فای، هێزه‌كاو مه‌لا مسته‌فای شانبه‌شانوو هێزه‌كاو ڕژێمی شۊنەو پێشمهرگهكاو دیموكراتیرە گێڵێنۍ. وەختوو ئەرەپڕاکەینە و دماتەریچ چندین كادرۍ و پێشمه‌رگۍ حزبوو دیموكراتی، لاو چه‌كداراو بارزانیوە تەسلیموو ڕژیموو ئێرانی کریێنۍ، یا گەشمەرڎۍ کریێنۍ، جه نموونه‌و گەشمەرڎەكەرڎەی سلێمانی موعینی و مه‌لا ئاواره‌ی و چندینی تەری.
دكتۊر قاسملۊ باسوو به‌یاننامه‌و یانزه‌ی ئازاری کەرۊ و ماچۊ، حه‌رچهنده حوكمه‌توو ئێراقیچ بێكه‌موكوڵی نه‌بۍ، چەنی ئانەیچە سوور بۍ سەروو بەیاگەیاونای ڕێكکه‌وتەینامه‌كهی. وەلۍ بۊنەو په‌یوه‌ندییه‌كاو مه‌لا مسته‌فای و شاو ئێرانیوه، نەیاوا یاگۍ و به نەیاواییاگێش گه‌لوو كوردی تووشوو ئا گردوو یانەوێرانی و كاره‌ساتەیە كەرد کە ساڵه‌كاو دماتەرینە، یاوا ئاشبه‌تاڵ، كه دیسانۊ شا سه‌پناش ملوو مه‌لا مسته‌فایرە.
مه‌لا مسته‌فا و نه‌وه‌كاو دمایش به‌شێوە فرەو ئه‌نداماو پارتی دیموكراتوو كورڎسانی، حیچ وانێوەشا جە ئاشبه‌تاڵه‌كه‌و ١٩٧٤ ورنرگێرت، یاوەخت و ئیسەیچە جە خەتەو خیانه‌تینۍ و درێژه پا وێورەشییە مدا، كه ئەوەڵۊ دەسشا داننە. به نیایرەی قیادە موەقەتە، دیسانۊ درێژەشا به خەتەو خیانه‌تی دا.
دكتۊر قاسملۊ حەر چا نامیلكه‌نە باسوو قیاده موەقەتەینە ماچۊ: (دماو سه‌ركه‌وتەی شۊڕشوو گه‌لاو ئیرانی، بنه‌یانەو بارزانی پەیوه‌ندیی دۊسانه‌شا چەنی گه‌لاو ی ئێرانی نەبۍ، تەماموو حزب و ڕێکوزیایەکاو ئێرانی، داواشا كەرڎە ته‌ماموو ئه‌فرادوو قیاده موەقەتەی ئێراننە بەرۍ کریا، چونكوم فرەو جینایه‌ته كۊن و تازه‌کانە به‌شدارۍ بێنۍ. حەرچند حزبوو دیموكراتی جە گردوو ئادیشای تەریچ زیاتەر شاره‌زاو هەرماناو ئا تاقمه‌ی بێنۍ، وەلۍ وەروو هه‌ستوو وەرپەرسبیەی، وەراوەر به چاره‌نویسوو گه‌لوو كوردی و هه‌زاران یانە وەنەقۊمیایا كورڎاو ئێراقی، كه ئاوارۍ ئێرانی بێنۍ ، جه فكروو هەقسانانیۊنە نەبێنمۍ، پەوکای گرد یاگێوەنە دژوو ئانەیە مرڎایمێوە، كه كورده په‌نابه‌ره‌كۍ ئێراننە بەرۍ کریا، هه‌رپاسە كۊنفرانسوو گه‌لایچنە تاراننە، كه نوێنه‌روو حزب و لایه‌نه‌كاش جەنەبۍ، دژوو هجوومکەرڎەی سه‌روو قیاده موەقەتەی مرڎایمۍ پێسە حزبوو دیموكراتوو كورڎسانوو ئێرانی).
ناپاکیی قیادە موەقەتەی وەراوەروو پێشمەرگەکاو دیموکراتی
قیاده موەقه‌ته و بنه‌یانەو بارزانی، دایمە وەختوو لاوازینە په‌ناشا پەی كوردوو پارچه جیاوازه‌كا بەرڎێنە و داواو هامكارییشا کەرڎێنە، وەلۍ حەروەختێوە ئاغاكێشا و ده‌زگا هەواڵگێرییەکۍ هەرمانەشا دێبا ملەرە، یەکسەر لوێنۍ پاڵوو دوژمنی. دكتۊر قاسملۊ ماچۊ: (سه‌ره‌تا قیاده موەقەتە پەنەشا واتیمۍ وتین كه به‌بۍ موافه‌قه‌توو ئێمه حیچ هەرمانۍ مەکەرا و ئامادۍ حه‌ر هامكاریێوە ئێمەنۍ، وەلۍ دماو ئانەیە جەنگ پاوه‌نە وەش بی، چه‌ك و ئازووقه‌ما کیانا پەی پاوه‌ی، وەلۍ چه‌كداراو قیاده موەقەتەی دزڵێیەنە، ڕاشا وەنەو قافڵەکەو ئێمه گێرت كه لوێنۍ پەی پاوه، ئه‌گه‌ر ئا خیانه‌ته‌و قیاده موەقەتەی نه‌بیۍ و شۊڕشگێڵناو كوردی كۊمه‌كشا یاوۍ لاچارەنویسوو جەنگوو كورڎسانی نۊعێوە تەر بۍ. ئینە جگە ئانەی چه‌كداراو قیاده موەقەتەی، دایم وەڵۍ هێزه سه‌ركوتكاره‌كاوه بێنێ).
چه‌كداراو قیاده موەقەتە، به‌بۍ هیچ پره‌نسیپوە دژوو گردوو كورڎێوە ئازاڎیوازی و شۊڕشگێڵنی بێنۍ، دایمە سه‌روو سنووره‌كاو كورڎسانیوە، كێشه پەی خه‌باتگێڵناو كوردی نیێنێوە، بە فیتوو دوژمنی و په‌لامارەو شۊڕشگێڵناو كوردی دێنۍ به‌بۍ جیاوازی. وەرکەوتوو كورڎسانیچنە به هه‌مان نۊع به‌رده‌وامۍ بێنۍ دژوو پلانگێڵنیی ئازاڎیوازا. گەشمەرڎە قاسملۊ باسوو خیانه‌تێوە تەروو به‌كرێگیریایاو قیاده موەقەتەی کەرۊ، جە ساڵەو ١٩٨١، ماچۊ: (به كرێگیریایاو قیاده موەقەتەی به نامۍ ئانەیۊ، کە گەرەکشانە بلاوە ئەودیم كه ده‌یانه‌وێت بچنه‌وه بۊ ئه‌ودیو، له‌شكرێكوە فرەشا بەرەو دزڵێیە وست ڕا، پێشمهرگهكاو ئێمه‌یچ ڕاشا دۍ، وەلۍ به كرێگیریایاو قیاده موەقەتەی فرە نامه‌رڎانه ئا دڵپاكییه بە فرسەت مزانا و به‌رزاییه‌كاوه، به گردوو قوەیشاوە بنكه و باره‌گاكاو حزبوو دیموكراتی دزڵێیەنە مدارە وەروو ده‌سڕێژی، بۊنەو ئینەیچۊ پانزه پێشمه‌رگۍ ئێمه گەشمەرڎۍ و بریندارۍ بیێ).
دكتۊر قاسملۊ جە ئاخروو باسوو قیاده موەقەتەینە، پرسیارەو ئانەیە کەرۊ، كه ئایا بنه‌یانەو بارزانی چێششا گەرەکا جە گیانوو خه‌ڵكوو كورڎسانوو ئێرانی، هه‌رپاسە ماچۊ (قیاده موەقەتە وەختوو هجوومکەرڎەینە سه‌روو مەنتێقە ئازاڎ‌كریایەكا، به سه‌رۊك جاشه‌كاشا واتەن، شمە ته‌نیا مه‌سولییه‌توو جەنگەکەی گێرڎۍ گەرڎەن، ئندا جەنگەکە ئێمه کەرمێش. ماچۊیچ پەنەوازا گه‌لوو كوردی و به‌تایبه‌تی كورڎاو پانیشتی و بنه‌یانەو بارزانی پەرسا ئایا پی هەرمانا كوردوو عێراقی ڕزگار کەرا؟)
ئاخرۊ متاومۍ بواچمۍ خیانه‌ت و بەكرێگیریایی بنه‌یانەو بارزانی و په‌ده‌كه‌ی و قیاده موەقەتەی، ته‌نیا پارچێوە كورڎسانینە نەبییەن، ئینەیچ چا هه‌قیقه‌تەیە دڵنیاما کەرۊوە، كه بنه‌یانەو بارزانی ده‌سكه‌لاو ده‌زگا هەواڵگێرییەکانۍ و دژوو گرد كورڎێوە ئازاڎیوازی بەكار ئامێنۍ. ئی نامیلكه‌یه‌و دكتۊر قاسملۊیچە ئانەما پەی پەشتڕاس کەرۊوە، كه به‌ڕاسی بنه‌یانەو بارزانی وێورەشۍ و بەکرێگیریۍ نیەنۍ و وێشا دوژمنه هەقەتیەکاو كوردینۍ، چونكوم جە حەرپارچێوە كورڎسانینە و هەر قۊناغیوەنە، هه‌وڵۍ ئازاڎی و سه‌ربه‌ویێی دریێبا، دژێش مرڎێنۍ و گەرەکشا بییەن فۊتناش.
