هجوومەئەرەگیرکەرییەکاو دەوڵەتوو تورکی چند ڕوێن هەسێ بیێنێوە  و هێزێوی فرەو ئەرەگیرکەرا مەنتێقەکاو چێروو دەسەڵاتوو پەدەکەینە ئینێ جموجووڵەنە و بە نیایرەی بازگە و کۆنترۆڵکەردەی شناسنامە و هەرپاسە بە بۆردومان و هجوومەکاشا فشارشا وستەن سەروو ئەرەنیشتاو ئا مەنتێقا. هەردووە حکومەتێ هەولێری و بەغدایچ وەراوەر بە ئەرەگیرکەرییەکەی بێدەنگێنێ و ئینەیچ سەروو ئاستوو جادەو پانیشتوو کوردستانی و عێراقیوە ناڕەزایەتییش شۆنیوە بێ.

'پەدەکە بەئاشکرا سەر بە ‌خەتەو خیانەتییا'

چرۆ شوانییە، پارێزنەرە و ئەندامەو دەسەو ڕاوەبەریی تەڤگەروو ئازادیی کوردستانی، بارەو هجووم و ئەرەگیرکارییەکاو دەوڵەتوو تورکی ئەرەگیرکەری پەی سەروو خاکوو کوردستانی و بەتایبەتی پانیشتوو کوردستانی پەی ئاژانسوو هەواڵوو فوراتی (ANF) قسێش کەردێ و واتش: "ڕاسیینە گەر بگێڵمێوە پەی تارێخوو ئەرەگیرکاری و بەتایبەت ئەرەگیرکاری پەی سەروو خاکوو کوردستانی، میاومێنە کۆمەڵێو هۆکارێ پاسەشا کەردەن ئی ئەرەگیرکارییە بەردەوامییش بۆ، یۆ چا هۆکارا ژیوگە و هورکەوتەی جوگرافیی خاکوو کوردستانین، ئینجا یۆنەبییەی دلێ یانەو کوردی و بییەی خەتەو خیانەتی، هۆکارێوی تەرێ بیێنێ، کە تاریخوو کوردینە تا ئیساتێ بەردەوامییشا هەن."

ئاماژەیچش پانەیە کەرد، کە سەبەبوو ئی دەسدرێژیکارییاو دەوڵەتی فاشیستوو تورکی، مگێڵۆوە پەی ئا وەرمە کۆنەیە کە گەرەکشەن میساقی میللیی زینە بکەرۆوە و کورد وەربەسوو وەردەموو ئامایدیی وەرموو ئا دەوڵەتە ئەرەگیرکاریەنە و واتیچش: "بەداخۆ پارتی دیموکراتوو کوردستانی (پەدەکە)، جیاواز جە جارا، ئارۆ بەتەمامی و بەئاشکرا لوان دلێ خەتەو خیانەتکارییوە و گرد چێوی مکەرۆ وەراوەروو گەلەکەیش، تەنیا پەی مەنەیوە وێش، پێسە کە دیما ئامادە نییەن بەشداریی ورچنیەیەکا بکەرۆ، ئینەیچ ماناو نەمتەیرەی تەشکیلەو حوکمەتی و ورشانایوە قەوارەو هەرێموو کوردستانینە."

سەبارەت بە هەڵوێستوو لایەنە سیاسییەکای تەروو هەرێموو کوردستانی و عێراقی، ئی پارێزنەەرێ باسوو ئانیەشە کەرد، کە ئەرەگیرکاریی تورکی هجوومەنە دا نەمەنەن و ئامان دلێ خاکوو هەرێموو کوردستانی و تەماعەی ئابورییەش هەنە هەیە و دەسش بە بارکەردەی دەگایەکا کەردەن و ئینە ئەرەگیرکاریێوی ئاشکران و واتیچش: "گردوو خەڵکی باسوو ئی ئەرەگیرکارییە مکەرانە و پاسە دیارا بە بۆنەو بییەی ڕێککەوتەێوی سیاسییوە عێراقیچ پەوکای بێدەنگەن، پەوکای بەڕاسی پەنەوازا چی وەختەنە حزب و لایەنە سیاسییەکێ تەرێ تر هەڵوێستی جیددی برمانا، تاکە چارەسەروو ئی ئەم دۆخەیچە ئامای پاڵوو یۆ و گردوو لایەنەکان دژ پی ئەرەگیرکارییە."

 ' دەوڵەتوو تورکی پاسە قڕکەرا دارستانی و ئاژەڵیچ ش دلێنە مبەرۆ'

دکتۆر بەکر مەجید، ئەنداموو دەسەو بەڕاوەبەری تەڤگەروو ئازادیی سەبارەت بە هجوومەکاو دەوڵەتوو تورکی فاشیست واتش: "هجوومەکاو تورکی ئەرەگیرکەری پەی سەروو خاکوو کوردستانی، بەچەمساقی پەدەکەی، لەشکرکێشیی پەی سەروو خاکوو هەرێمی و هجووما پەی سەروو ژیوای گلێرگەو پانیشتی، هاموەخت تەرسینە  پەی سەروو تەماموو گەلاو عێراقی و مەنتێقەکەی. چونکوم دەوڵەتوو تورکی ئەرەگیرکەری تەنیا بە ئەرەگیرکاریی خاکیوە نەمدران و کۆکوشی مکەرۆ و دەگا و شارەکاو کوردستانی بۆردومان مکەرۆ، ئی هجووم و ئەرەگیرکارییاو دەوڵەتوو تورکی پەنەوازا بە جینۆسایدوو کوردی بشناسنیا."

دکتۆر بەکر چڕۆ وەنەو ئازادیوازا و چالاکا کە دژ بە ئەرەگیرکاری بمدراوە و واتش: "ئی هجوومێ دەوڵەتوو تورک، هجوومنێ پەی سەروو تەماموو ئینسانی چونکوم دەوڵەتوو تورکی تەنیا بە هجوومکەردەی سەروو خاکوو هەرێمیوە نمەمدرۆ. جە حەر چوار پارچەو هەرێموو کوردستانینە دەوڵەتوو تورکی کوردی دلێنە مبەرۆ و تارێخ  گەواهیدەروو ئی ڕاسییەینە. دەسەڵاتوو تورکی قڕکەری پاسە بێڕەحما دارسان و ئاژەڵەکایچ دلێنە مبەرۆ، پەوکای داواکارنا جە ڕێکوزیا مەدەنییەکا و چالاکە مەدەنیا دەموو بانگەوازوو گەلیوە بەیا، دژوو دەوڵەتوو تورکی ئەرەگیرکەری."

'وەرنیشتوو کوردستانی بیەن بە قەڵغانوو وەرگێری'

هەرپاسە دکتۆر بەکر سەبارەت بە بییەی کوردی و دۆزوو کوردی لاشۆ پاسنە بێ، دەوڵەتوو تورکی هیچ یاگێوە دنیێنە گەلوو کوردی قبووڵ نمەکەرۆ و واتش: "ماوەو دەسبەهەرمانبییەی  دەسەڵاتوو ئاکەپە-مەهەپەینە فرەتەرین پاشێلکاریێ و ئەرەگیرکاریێ پەی سەروو گەلوو کوردی و خاکەکەیش کریێنێ، تا ئیساتێچ دەوڵەتوو تورکی هجوومکەردەینە سەروو وەرنیشتوو کوردستانی بەردەواما و جەنگەوانێ ئازادیی وەرپەرچوو هجوومەکا مدانێوە."

 د. بەکر مەجید باوڕش پاسنە بێ، ڕێکوزیایەکاو مافوو ئینسانی ساختینێ و وەرگێریی جە دۆزوو گەلا نمەکەرانمێ و ئینێ خزمەتوو سیستمینە و واتش " پەنەوازا ئێمەی گەلوو کوردی چەمەڕێ ڕێکوزیایەکا بە نامێ مافوو ئینسانیوە نەبیمێ و هەڵوێست برمانمێ دژوو ئەرەگیرکارییەکاو دەوڵەتوو تورکی، ئانە تەنیا هەرمانەو پەکەکە نییەنە کە وەرگێریی جە خاکوو کوردستانی بکەرۆ، بەڵکوم هەرمانەو یوە یوەو کوردینە."