ئەرەیاۋیا، پەدەکە جە مەنتیقەو برادۊستینە ئینا حۊلوو گەمېوە تازەینە و گەرەکشا جە بارەگاکا پارتەکا ۋەرکەوتینە بنەوزۊ. هاموەخت ٢٤ سەعاتۍ ئیجازەش بە خەڵک و مەنتیقەکەی دان، کە چۊڵش کەرا.
پەدەکە کە ڕۊو ١٣و ئەیلولی زیاڎ جە ٢٠٠ زرېپۊشۍ، تانکۍ، ترۊمبېلۍ سەروازیۍ و چەکی قورسش ڕووەو مېڎانەکا گەریلای جە مەنتیقەو برادۊستی فاڕېوە، ڕۊو ١٤ و ئەیلولی هجومش کەرڎ سەروو سەنگەرەکا گەریلای، ئیسەیچ ئینا دلۍ جموجوڵۍ تازەینە.
بەپاو هەواڵېوە ئاژانسوو ڕۊژنیوزی، پەدەکە گەرەکشا چېروو ئاڵاو عېراقینەو بەنامۍ پارېزنای سنوریۊ هجووم پۍ سەروو هەرېمەکا گەریلای ئەنجام بڎۊ. سەرچەمەکۍ باس چانەی کەرا، کە ئی هجوومە سەروو داواو دۊڵەتوو ئەرەگیری ترکی ئەنجام مڎریۊ و ئامانجەکەیچش فراوانکەرڎەی ئەرەگیریەکا ترکین، جە مەنتیقەو برادۊست و پانیشتوو کورڎسانینە.
هاموەخت سەرچەمېوە تایبەت جە مەنتیقەکەنە بە ئاژانسەکەیش ئەرەیاۋنان، هېزی شەوۍ نزیک بە سەعات ١٠:٠ی، چەکڎارەکۍ پەدەکەی جە ڕاو موختار، ڕیش چەرما، سەرۊک عەشیرەت و کەسایەتیە دیارەکا مەنتیقەکەیۊ کۊچەریۍ، جوتیارۍ و دەگانشینۍ کوېسانەکا برادۊسیشا ئاگاڎار کەرڎېنۍ، بەتایبەتی ئا مەنتیقۍ نزیکېنۍ جە هەرېمەکا پارېزنای مەدیایۊ، کە بەزووتەرین وەخت چۊڵش کەرا چونکی جەنگ ڕووە مڎۊ.
سەرچەمەکە ئانەیچش وست ڕووە، پەدەکە تا سەعات ٠٤:٠٠ و ئی ۋېرەگایشە دیاری کەرڎەن پۍ چۊڵکەرڎەی مەنتیقەکەی، کە گرڎوو کوېسانەکا (کېلەشین، شەکیف، خواکوڕک، بەربزین، بۊڵۍ،هۊڕنۍ) گېرۊوە و نزیک بە ٢٠٠٠ خېزاناش چنە مژیوا، تەنیا جە کېلەشینەنە نزیک بە ٥٠٠ یانا مژیۋا، فرەینەشا کۊچەریېنۍ و حەیواندارېنۍ مەتاۋا گېڵاوە مەنتیقە گەرمەکا و جوتیارەکېچ سەڎان دۊنمۍ زەمینشا کەرڎەن بە زەراعەت، بەڵام ناچارکریېنۍ کە چۊڵش کەرا و جیاش بازا.
حەرپاسە ئاماژەش پانەیچ دان، چەکڎارەکۍ پەدەکەی بەخەڵکەکەیشا ئەرەیاۋنان، تا سەعات ٠٤:٠٠و ئی وېرەگایە ئیجازە هەن مشۊم چۊڵش کەرڎۍ، چانەی بە دماوە گرڎوو ڕېیەکا تەری وزیارە، چونکی جەنگ دەسپنەکەرۊ و مەنتیقەکە تۊپۋاران و بۊمبۋاران کریۊ، ئا مەنتیقۍ بەشېوەشا گنا دلۍ هەرېمەکا پارېزنای مەدیای کە گەریلاکۍ ئازاڎیی کورڎسانی پارېزناشا و بەشەکۍ تەریچ فرە نزیکېنۍ جە هەرېمەکا گەریلایۊ.
دمایین زانیاریەکۍ پەشت ڕاسش کەراوە، کە هجومېوە مەترسیڎار پۍ سەروو مەنتیقەو سیدەکانی و برادۊستی دەسپنە کریۊ. ئامانج جە چۊڵکەرڎەی مەنتیقەکەیچ ئانەنە، کە خەڵکی مەڎەنی شایەتحاڵۍ سیاسەتە چەپەڵەکا هېزەکا پەدەکەی و سوپاو ئەرەگیری ترکی نەبا، کە پېوەرە ئی پلانۍ جابەجۍ کەرا. پۍ ئا مەبەسیچە کۊچەری، جوتیار و خەڵکوو مەنتیقەکەی کۊچبەر کریا.
بەپاو هەمان سەرچەمەی، دماو ئانەی مەنتیقەکە جە ئەرەنیشتا چۊڵکریا، چەکڎارەکۍ پەدەکەی چېروو ئاڵاو عېراقینەو بەجلۍ پاسەوانوو سنوریۊ، چنی سەروازا ترکی، هجووم کەرا سەروو مەنتیقەکەی. حەرپاسە بەپاو ئا زانیاریا کە ڕۊژنیوزی ۋەڵا کەرڎېنېوە، چەمەڕاکریۊ پەدەکەو هېزەکۍ تورکیای بە هامبەشی هجووم پۍ سەروو مېڎانەکا کەش و بۊڵۍ، کەش و حەیاتی، بەربزېنی، گەورویا سنگۍ، کەش و شەماشەی تا سنین ئەنجام بڎا.
ئا مەنتیقەی کە باسشا ۋنە کریۊ سەر بە مەنتیقەو برادۊستینۍ. ئا یەرە یاگۍ، مېڎانەکۍ گەوروویا زینی و حەساری ڕۊستۍ پېوەرە بەساوە.
ئا یەرە مېڎانۍ ئاماژەشا پنە کریان، چونکی جە زەمینۊ یاگۍ ستراتیجیېنۍ دژوو ئەرەگیرکاری، تا ئارۊیچ گۊرەتەرین بەربەس بیېنۍ ۋەروو دەموو ترکی ئەرەگیرینە. ئارۊ پەدەکە گەرەکشا ئا بەربەسەیە لا بەرۊو دمایش پنە بارۊ و سوپاو ترکی ئەرەگیری چا مەنتیقەنە یاگەگیر کەرۊ.
ئامانجوو ئەرەگیرکەرڎەو مەنتیقەکەی ئانەن کە سوپاو ترکی زیاتەر خاکوو عېراقی ئەرەگیر کەرۊ و وزۊش سەروو سنورەکا تورکیای. بەڵام سەرەڕاو ئانەی کە ئینە مزانیۊ سەرۊک کۊمارو تورکیای ئەردۊگان دەیان جارۍ بەدەمی ۋېش ۋاتەنش، "کەرکوک و موسڵ خاکوو ئېمەنۍ"، بەڵام عېراق چا بارۆ بېدەنگا و پا بېدەنگیەیچش زەمینېوە گۊرەش پۍ هجوومەکا وەشکەرڎەن
بەپاو هەمان سەرچەمەی، گرڎوو هېزەکا پەدەکەی جلۍ پاسەوانی سنوری سوپاو عېراقی کەرانە. پۍ ئانەی پاسە نیشانەش بڎۊ کە عېراق هجومەکەی کەرۊ. ژمارېوە کەم جە چەکڎارەکاش عەلەمەو عېراقی بەرز کەراوە ڕیزوو وەلۍ هجومەکەی گېرا. هېزەکۍ ٨٠ی کەسەر بەپەدەکەینۍ، بەچەکی قورس بەشڎاری هجومەکەی کەرا. جە هەمان وەختەنە سوپاو ترکی ئەرەگیری هجومی ئاسمانی ئەنجام مڎۊ. حەرپاسە پېشمەرگەکۍ سەر بە هېزەکا ٨٠ی بە حیچ جۊرۍ لۊگۊو هەسارۍ پلەکاشا جە جلووبەرگەکاشا مەڎا و پا جۊرە جە هجومەکەنە بەشڎارۍ با.
هجووم پۍ سەروو مەنتیقەکەی بەماناو ئەرەگیرکەرڎەی بەشېوە جە خاکوو عېراقین. سەرەڕاو ئی مەتەرسیە، بېدەنگی و بۍ هەڵۋېسی حکومەتوو عېراقی یاگۍ نیگەرانینە.
