پەدەکە و بنەماڵەو بارزانی پەی پارێرزنای دەسەڵاتی و کورسیەکەیشان سڵ جە هیچ کەردێوی چەپەڵی نمەکەرانێوە و ڕاست و چەپەرە سامان و دارایی پانیشتو کوردستان تەخشان و پەخشان و تاڵان مەکەرانێ و مەبەخشانێش بە کەسانێ کە ئەرەنیشتێ پانیشتو کوردستانی نییەنێ و دژبەرێ کوردی و جمیەرە ئازادیەکەیشەنێ. ئا کەسێ یان جە ویەردەنە یان جە ئیسەنە فرێوشان بەکرێگیرێ دوژمنی بیێنێ و دەسێشان سورێنێ بە هونەو ڕۆڵەکێ کوردی و ئارۆیچ بەشدارێ ئۆپەراسیونیەنێ دژ بە گەریلای و سەرکوتکەردەی خەڵکی ناڕازی پانیشتو کوردستانی.

هەزاران کوردێ بەشەکێ تەرێ کوردستانی مووچەشان پەی بڕیانەوە

جە ئی چوارچێوەنە ئاژانشەکەمان فوڕات نیوز (ANF)ی  پەیجۆری و شۆنیەرەلوایش کەردەن و جە میانشەنە ئاشکرا بییەن: "هەزاران کوردێ بەشەکێ تەرێ کودستانی، جە پانیشتو کوردستانی بە ناقانونی مەرزیێنێرە، خانەنشینێ کریێنێ، یان دلێ هێزەکانو پێشمەرگەی سەر بە (پەدەکە)ی و هێزەکێ ڕۆژی و زێرەڤانی-یەنە ئەرکدارێ کریێنێ و مووچەوەرێنێ و هامکات سەدانیچشان کە مەردێنێ بەشەهیدێ سەنگەری و پلە باڵێ جەقەڵەم دریێنی و مووچە و ئیمتیازی بەرز بە خانەوەدەکانشان دریان".

فرێوە جە ئا کەسانە چەکدارێ بەکرێکیرێ دوژمنی بیێنێ 

 هەرپاسە بەرکەوتەن: "فرێوە جە ئا کەسانە وەڵەتەر یان جە ئیسەنە چەکدارێ بەکرێکیرێ ڕژێمەکێ (تورکیا و ئێران)ی بیێنێ و دەسێشان سورێنێ بە هونەو ڕۆڵەکێ کوردی. بەشێو جە ئانیشان جە کۆمەڵکوشی هەکاری، سەرکوت و کوشتوبڕو کۆمەڵە و دیموکراتی و خەڵکی جە ڕۆژهەڵاتو کوردستانی، هامکات جە سەرکوتکەردەی خەڵکی ناڕازی جە پانیشتو کوردستانی، بەشدارێ بیێنێ".

چەنڎین سەرۆک هۆزێ و عەشیرەتێ و سەرۆک جاشێ مووچە و دیواخانانەشان هەن

دیسان جە پەیجۆرەکەنە ئاشکرا بییەن: "چەنڎین سەرۆک هۆزێ و عەشیرەتێ و سەرۆک جاشێ باکور و ڕۆژهەڵات و ڕۆژاڤاو کوردستانی کە جە کۆمەڵکوشی هەکاری و جە کوشتوبڕ و ملمالانێ و جەنگەکانە دژ بە کوردێ باکور، ڕۆژهەڵات و ڕۆژاڤای پەشتیوانی پەدەکە-ی بیێنێ، سەرەڕاو ئانەیە پەدەکە مووچە و خانەنشینیش گەورەش پەی بڕیێنێوە، دیواخانانە و نەسریەی تایبەتشان هەن و جە ئیسەنە ئەرەنیشتێ شارێ و ناوچەکێ باکور، ڕۆژهەڵات و ڕۆژاڤایەنێ و دلێ خەڵکینە بە بەدنامی نامبانگشان لوان و وەڵاوبییەنەوە و  بە فەرمی پیێ و بەکرێگیریێ ڕژێمە ئەرەگێرەکانو کوردستانیەنێ".

دەیان هەراز کەسێ شناسنامێ و ڕەگەزنامێ ئێراقیشان پەی دروستێ کریێنێ

هاموەخت پەدەکە پەی دەیان هەراز کوردێ بەشەکێ تەرێ کوردستانی، شناسنامێ و ڕەگەزنامێ ئێراقیش دروستێ کەردێنێ و جە هۆروچنایەکانەو جە ململانێکانو باشورو کوردستانیەنە پەی پارێزنای دەسەڵاتی و کورسیەکەیش بەکارشان ماوەرۆنە و دژبەری خەڵکی ناڕازی باشوریشان پنە مەکەرۆنە و جە وێنیشاندایێ و ناڕەزایەتیەکانە پەی سەرکوتکەردەی خەڵکی سودشان چەنە هۆرمەگێرۆنە و هەرکەس فەرمانەکێ پەدەکە-ی بەگا نەئاوەرۆنە، شناسنامە و ڕەگەزنامەکەش چنە مەسانانێوە". 

جە باکورەوە ٣٠٠ جاشێ تورکیای ڕەوانێ پانیشتو کوردستانی کریێنێ

جە لایێ تەرەوە جە نوتەرین زانیاریەنە کە جە کەسانێوی باوەڕپنەکریێ و سەربەوێ هۆرگیریان "جە ناوچەکێ چەلێ سەر بە جۆلەمێرگی و ئەلکێ سەر بە شڕنەخ-ی زیاتەر جە ٣٠٠ جاشێ تورکیای جە ئا دوە ناوچەوە ڕەوانێ پانیشتو کوردستانی کریێنێ و جە ئاگە کریێنێ بە پێشمەرگێ پەدەکە-ی و هەم مووچە جە حکومەتو هەرێمی و هەم جە ڕژێمو تورکیای هۆرمەگێرانێ و دژ بە گەریلای و جمیەرو ئازادی بە ڕابەرایەتی پەکەکە-ی و خەڵکی ناڕازی باشوری بەکارێماوریانێ".

٣٠٠ جاشەکە بەشدارێ ئۆپەراسیۆنەکان مەبانێ

هەر بەپاو زانیاریەکەی، "ئا ٣٠٠ چەکدارە جاشێ، ٦ مانگێن ئینێ باشورەنە و بەشدارێنێ جە ئۆپەراسیۆنەکانو تورکیای و پەدەکە-ی دژ بە گەریلا کە جە هەرێمەکێ پارێزنای مەدیای دەستشان پنەکەردێنی".

هامکات زانیان کە "بنەماڵە جاشێو بەنامێ (فروز بەیئۆغلۆ) ئینا پەشتو جاشایەتییەکەیەوە و ئاخانەوادە بە هەماهەنگی چەنی تورکیای و پەدەکە-ی چەکدارە جاشەکێ پەروەردێ سەربازی مەکەرانێ و دماتەر ڕەوانێ باشورو کوردستانیشان مەکەرانێ".

خەڵکی مووچەش نییەن و پەدەکە دارایی باشوریش وستەن خزمەتو جاشەکان

تەخشان و پەخشان و تاڵان کەردەی سامان و دارایی پانیشتو کوردستانی جەلاو پەدەکە-یەوە و داییش بە کوردە بەکرێگیریاکانو بەشەکێ تەرێ کوردستانی جە وەختێوەنە مەکریۆن، کە ئا بەشەو وڵاتی ڕووبەروو قەیرانی دارایی و نەبییەی مووچەی بییەنەوە و خەڵکی باروگوزەرانیێوی فرە خراپ بەسەر مەبەرانێ و حکومەت بێباکانە مامەڵە چەنی بارودۆخەکەی مەکەرۆنە و هەوڵ پەی چارەسەریش نمەڎۆنە و ئانەیچە ناڕەزایەتی گەلیش ونەکەوتەنەوە و چەنڎین ڕوێن جە ناوچێ و شارە جیا جیاکانە وێنیشاندایێ جەماوەریێ هەنێ و ئەگەر هەن بارودۆخەکە بتەقۆنەوە و باشور ڕووبەڕووی چارەنویسی نادیاری ببۆنەوە.