غازی فەیسەڵ یۊ جە فەرماندەکاو پێشمەرگەی مەخمورنە، باسوو حەوڵەکاو پەدەکەی کەرۊ پەی بەحزبیکەرڎەی و "زەردکەرڎەی"حوکمەتی و فاڕایوە ملەملە حزبییەکا پەی بەغڎای و مەنتێقە کێشاوییەکا، داوایچ کەرۊ سنوورێوە پەی کرڎەواو ئا حزبەیە بنریۊرە.
جە وتارێوەنە چێروو نامۍ 'پارتی و فاڕایۊ ملەملەکا' غازی فەیسەڵ یۊ جە لە فەرماندەکاو پێشمەرگەی سنووروو مەخموورینە، کە هاموەخت کادروو یەنەکەین ئاماژەش پانەیە کەرڎەن، کە پەدەکە ملەملە حزبییەکاش هەرێموو كورڎسانیوە فاڕێوە پەی بەغڎای و مەنتێقە کێشاوییە کوردسانییەکا.
حەر چا وتارەنە غازی فەیسەڵ ئانەیچش وستەن ڕووە: " پارتی دیموکراتوو کورڎسانی گردوو کابینە یۊ دماو یوەکاو هەرێموو کورڎسانینە، دایمە ئینا ملەملۍ و دووەبەرەکینە حوەڵۍ مدۊ جیاتیی بارەگا حزبییەکا ئیدارەو دەوڵەتی بەکار بارۊ و پلانە حزبییەکاش ڕاو یەکە ئیدارییەکاوە ئاڕاستە کەرۊ، بەتایبەت جە کابینەو نۊینە ئی هەرمانە قێزەونۍ تۊختەرە کریاوە "
ڕۊشنیچش کەرڎۊ: "بەڵگۍ فرێنۍ سەروو بەحزبیکەرڎەی و(زەرد)کەرڎەی دەوڵەتی لاو پارتی دیموکراتوو کورڎسانیوە، حەر پەی نموونەی ورواستەی ڕسموو سەرکرڎەکاشا و فایلی زەردوو فەرمانگەکا خاستەرین بەڵگێنی و گرد ساڵێوەیچ مانگەو ئابینە پارتی پلانە تێکدەرانەکاش زیادتەرۍ کەرۊ، حەرچندە لاپەلەو تارێخوو پارتی ورڎەیمێوە نیگەرانی و ترازییایە دلیێیەکا زیادتەرۍ با و کرژی و ئاڵۊزیی بەینوو حزبە کورڎسانییەکا بەرەو ورکێشیای ملۊ".
درێژەو وتارەکەیشنە ئا فەرماندە پێشمەرگە نویستەنش: "چەنی قەراروو ورچنییەی ئەنجوومەنوو پارێزگاکاو عێراقی پارتی دەسش کەرڎەن بە ورەتەیۊ دروشما ملوو جەماوەریرە، چندین نموونۍ ڕۊشنۍ هەنۍ کەجیاتیی پەشتیوانی و خەموارڎەی پارتی پەی مەنتێقە کێشاوییە کورڎسانییەکا بەگردی و کەرکووک و مەخموری بەتایبەت دەسشا کەرڎەن بە هەڵمەتێوە تێکدەرانۍ بە نامۍ کورڎایەتیوە کە گوایا پارتی فرە کوردپەروەرێنۍ و لایەنی عەرەبی و تورکمانیچ قبوڵشا نییا بارەگاکاشا باراوە کەرکووک!! شوکور خەڵک هۊشیارا و وەشبەختانە نویسەرۍ و ڕۊشنویرۍ گەلەکەیچما چندین قسۍ و باسۍ ڕەخنەییشا سەروو ئا گەمە سیاسییە کۊنەو ئی دماییەو پارتی کەرڎێنۍ و شەرمەزارێشا کەرڎێنۍ تا ناچارۍ با دەس چا سیناریۊیا ورگێرا، وەلۍ پارتی دیموکراتوو کورڎسانی دیسان گەرەکشانە چەنی کۊنە بەعسییەکا دەس وزا دلۍ دەسوو یۊترینی و قۊرتۍ پەی پێوەرەژیوای پێکئامایەکاو کەرکووکی وەش کەرا".
غازی فەیسەڵ وتارەکەشەنە باسوو کرڎەوەکاو پەدەکەی سنووروو مەخمورینە کەرۊ و نویستەنش: "گرد لێوە مزانا جە گەمە ئویرەینەکاو بەینوو پارتی و داعشەکاو قەرەچوغی، کە چە گەمێوە کۊن و ئاشکران، گەلوو کوردی و ئەرەنیشتاو مەنتێقەکەیما زەرەرمەندۍ ئوەڵینۍ بێنۍ و تەنیا هەرمانگەو چیمەنتۊی و هەرمانەو بیرە نەوتەکا سڵامەتۍ بێنۍ و ئیساتۍ واوەی سنووروو قەزاو مەخموری و ناحیە و دەگایەکا سەرەڕاو دەسەڵاتی فرەیشا چا سنوورنە و بایەخنەدای بە ئاوەدانکەرڎەیۊ دەگایەکا و پەشتگۊشوستەی داواکاریی هیتیارا و خەڵکوو مەنتێقەکەی ڕاو یەکە ئیدارییەکاشاوە ڕاگێری کەرا، جە بیرورکەندەی هیتیاراو مەنتێقەکەینە و داواکاریی هیتیاراو مەنتێقەکەکەیچما کەرا حزبیۍ و پەی بانگەشەو ورچنییەی ئیدارەیشا وزاش خزمەتوو کۊکەرڎەیۊ دەنگدەراشاوە".
پێسە نویسەری واتەن بێجگە چا کرڎەوا "ڕوانە جە دامودەزگاکاو بەحیساب حکومەتوو هەرێمینە پارتی قبووڵوو یەک فایلی مەکەرا، جە پەرسگەو فەرمانگەکاشاوە بلۊ دلۍ فەرمانگە حکومییەکا ئەگەر ڕەنگەش ( زەرد)ە نەبۊ، لەق و ناوچەکێشا بەتەمامەتی دەسشا وستەن دلۍ دامودەزگاکاو دەوڵەتی و ئی هەرمانێشا حەرچندە تازۍ نییەنۍ، وەلۍ سەرڎەموو ئیسەیمانە کاریگەریی فرە خراپش سەروو هەرێمی بەگردی و مەنتیقە و کێشاوییەکا بەتایبەت بۊ".
پەوکای دمادمای وتارەکەیشنە داواش کەرڎێنە پەرلەمانی و حوکومەتوو بەغڎای" سنوورێوە پەی ئا بەحزبیکەرڎەیەو حکومەتی لاو پارتییوە بنریۊرە و حکومەت جیاوازی نەکەرۊ بەینوو پێکئاما و نەتەوە و ڕەنگە جیاوازەکانە و گەلوو عیراقینە بەگردی و هەرێمنە بەتایبەت نەک بەحزبیکەرڎەی فەرمانگەکاو دەوڵەتی و قۊرخکەرڎەی دەسەڵاتی."
س.ز
