جە ئەرەیاونیاو کۊمیتەکەینە ئامان، کە ئا مەژگە ساڵەو ١٩٩٦ینە کۊکوشییش کەرد،  هەڵای زینڎانەکانە بەقورسی ستەم و زۊرڎاری کەرۊ و ئانەی چئەرەیاونییان، "تا شایەنۍ ئا هامڕا بەنرخا بیمۍ، ڕای سەرەکییەو وێبەساعیبزانای جە مدرامانوو ڕابەر ئاپۊی و مدرامانوو زینڎانەکا، پێویسا ئا مدرامانە قەوەتتەر کریۊ. سەروو ئا بنەمێوە ئێمە داوا وەنەو گەلە وەڵاتپارێزنەکەیما، ڕای گردینی دیموکراتیکی کەرمۍ، کە دژوو گۊشەگیری سەروو ڕابەر ئاپۊی و ستەموو دلۍ زینڎانەکا گنا جموجووڵ و گوڕ بە مدرامانی بڎا".

ئەرەیاونایەکەینە ئامان:

"ساڵێوە تەر سەروو دڕندەیی ٢٤وو ئەیلوولوو ١٩٩٦یرە، کە دوژمن زینڎانوو ئامەدینە کەردش ویەرد، وەلۍ پێسە هامڕایاشا ئا کرڎەوێما ویرۍ مەشاوە، کە وەراوەروو ١٠ هامڕایاما کریۍ. پەوکای ئێمە ماچمۍ ٢٤وو ئەیلوولی دلۍ دڵوو گردوو زینڎانییا و هامڕایامانە پێسە وێش و پێسە ئێشۍ قورسی مەنەنۊ. پەوکای بە ڕابەریما ماچمۍ، 'ئێمە گەشمەرڎاما بە دڵوو وێما مسپارمۍ، بە خاکی نا'.

حکومەتی فاشیستوو ئانایۊلی، کە ساڵەو ١٩٩٦ دەسەڵاتش گێرت دەس، گرد مەیدانێوەنە دژوو ڕابەریما و کۊشیای ئێمە هجوومی وەرفراوانش کەرد. مەیدانوو زینڎانیچ بەشش چا هجووما وەرکەوت و جە ٢٤وو ئەیلوولوو١٩٩٦ینە، زینڎانوو ئامەدینە ١٠ هامڕێما بەدڕندانە تیرۊرۍ کریۍ. زانێنۍ کە جگە جە ئیرادەکەیشا شۊڕشگێڵنی حیچ چێوۍ تەرشا نییا، کە وێشاش پەنە پارێزنا، پەوکای هجوومێوە چانەی دڕندانەشا وەراوەرشاوە کەرد. بە ئاسن و داری بە ئاسن پێچیا جەسەو هامڕایاماشا پارچەپارچە کەرد و بە کۊمەڵ تیرۊرۍ کریۍ. ئا کۊکوشییە ڕوخساری جە ئینسانیەت ماڵیارەو دەوڵەتوو تورکیش جارێوە تەر بەڕۊشنی نیشانە داوە. مدرامانوو هامڕایانما دژوو ئا دڕندەییەیچە چا ئاستەنە بۍ، کە بە حەرفی ئاڵتوونەین تارێخوو شۊڕشوو جیهانینە بنویسییۊوە. هامڕێما دژوو وەحشیتەرین و دڕندەتەرین هێزی تارێخوو دنیێنە بە هۊشیاری، بڕوا و ئیرادەوە نوێنەرایەتیی بەها ئینسانییەکاشا کەرد.

وەروو ئانەیچە  ٢٤وو ئەیلوولی تارێخوو مدرامانی شکۊمەندانەو ئێمەن، کە مشۊم بەرڎەوام ورسەنگییۊ و یاڎ کرییۊوە.

زینڎان پەی تەڤگەرەکەیما قەڵاو مدرامانینە، وەلۍ پەی دەوڵەتوو تورکی فاشیستی یاگێوەنە، کە گەرەکشا حەر نۊعێوە بۊ شۊڕشگێڵنا ناچار بە وێدەسۊدای و چەوسنایۊ کەرۊ، بە ئەشکەنجە ئیرادەیشا ماڕۊ و ملکەچێشا کەرۊ.سیاسەتوو دوژمنی جە ساڵەو ١٩٩٦ سەروو زینڎانی ئانە بۍ، کە شۊرشگێڵن خیانەت جە شکۊ و شناسنامەو وێش کەرۊ و بە دانپۊرەنییەر. یۊ چا یاگا، کە ئی سیاسەتەشە سەرەمڕ چەنە پەیڕەو کریۍ، زینڎانوو ئامەدی بۍ. چی وەختەنە زینڎانوو ئامەدی بی بە شۊنەو وەنەپەرسایۊ و ئەشکەنجەکاو دوژمنی. چی یاگێنە وازێنۍ، کە ئیرادەو شۊڕشگێڵنا مەڕیۊ و جە دۊزوو وێشا ورگێڵنییاو ە و وێشا بڎا دەسۊ. ئا شۊڕشگێڵنۍ کە ئەوەڵ وزیۍ واگەوە بە واتەی 'ئێگە دیاربەکرا، ئۊو حیچ یاگێوە تەری مەشۊ' خێڕامایشا وەنە کریا. پی هەرمانۍ گەرەکشا بۍ تەرسی وزا دلۍ دڵوو خەڵکی و ئیرادەیشا ماڕا. بێگومان ئا یاگۍ پەی ئێمە زینڎانوو ئامەدی بۍ، وەلۍ جیاواز بۍ جە گرد یاگێوە تەری. زینڎانوو ئامەدی قەڵاو مدرامانوو تەڤگەرەکەیما بۍ. یاگۍ مدرامانوو تەڤگەرەکەیما بۍ پێسە: مەزڵوم، فەرهاد، کەمال پیر و ساکینە جانسزۍ. یاگۍ مدرامانی کەرامەتانەو جەنگاوەراو پەکەکە-پاژکی بۍ، کە ئیرادەی قەوەتش دلێنە خولقییا. ئینە یاگۍ محمەد ئاسلان، ڕدڤان بولوت، نیعمەت چەکماک، جەمال چان، ئەحمەد چەلیک، قادر دەمیر، ئەدیپ دیرەکچی، سەبری گوموش، ئەرکان پەریشان و حەقی تەکینی بۍ، کە ٢٤وو ئەیلوولوو ساڵەو ١٩٩٦ینە جگە جە ئیرادەی و ئامانجی و باوڕبەوێبییەی حیچی تەرشا نەبۍ، کە بتاوا وێشاش پەنە بپارێزنا و قارەمانانە وێگێرییشا کەرد.

چا وەختەنە و پەی شەرمەزارکەرڎەی ئا دڕندایەتییە، کە زینڎانوو ئامەدینە وەراوەروو ١٠ هامڕایاماوە کریا، زینڎانوو بایرامپاشاینە هامڕێما وەدات ئایدەمیر و حەمدوڵا شەنگوران هەمان ڕرۊ و هەمان سەعاتنە پێسە واچی وەعدشا بە یۊترینی دابۊ، وێشا کەرد  بە تۊپێوە ئاویرەینە و تێکەڵ بە کارەوانوو گەشمەرڎا بیۍ.  پێسە ژمارەو هامڕایاما، کە دژوو دڕندایەتیی ٢٤وو ئەیلوولی مدراماننە گەشمەرڎۍ بیۍ یاوا ١٢ کەسۍ.

بە بۊنەو ساڵیاڎیشاوە، ئێمە سەرجەموو هامڕایاما بە ڕێز و پەنەزانایۊ یاڎۍ کەرمێوە، وەعد مدەیمێوە، ئامانجی بەدیناماشا بارمۍ دی و هەقەشا کەرمێوە. هەمان مەژگی فاشیستیی ئیساتێچ  زینڎانەکانە ڕوانە ستەم و زۊرڎاری کەرۊ. تا شایسۍ ئا هامڕا بەنرخامان بیمۍ، ڕای سەرەکییەو وێبەساعیبزانای جە مدرامانوو ڕابەر ئاپۊی و زینڎانەکا قەوەتتەرکەرڎەی ئا مدرامانینە. سەروو ئا بنەمۍ ئێمە داوا وەنەو گەلە وەڵاتپارێزنەکەیما، ڕای گردینی دیموکراتیکی کەرمۍ، کە دژوو گۊشەگیریی سەروو ڕابەر ئاپۊی و ستەموو دلۍ زینڎانەکا گناوە جموجووڵ، گوڕ بە مدرامانی بڎا".

س.ز