قەدریە دۊغانە، هامسەرۊکەو کۊمەڵە دیموکراتییە عەلەوییەکا ئەرەیاوناش، پڕۊسەو داڎگایی تایبەت بە کۊکوشیی سێواسی زەخموو قوربانییاو کۊکوشییەکەیش کولناوە و جارێوە تەر تووشوو ئێشیش کەرڎۍ.
قەدریە دۊغانە، هامسەرۊکەو کۊمەڵە دیموکراتییە عەلەوییەکا (داڎ) جه‌ختش كەرڎۊ، چەنەپێتەیۊ چا کۊکوشییە کەرا کە مادیماکنە سەروو دەسوو دەوڵەتیوە کریا، تەنیا سەروو شانەو عەلەوییەکاوە نییا و واتش: "تەنیا بەروستەی هامخەمی وەسۍ نییا، مشۊم ئێمە پەی داڎپەروەری پێوەرە کۊشیەیمێ".
یووەم ئاڵقەو زنجیرە کۊکوشییەکا
قەدریە دۊغانە ئەرەیاوناش، مشۊم ئا چێوۍ جە ٢ تەمووزوو ١٩٩٣ سێواسنە ڕووەشا دا، چوارچووەو زنجیرێوە تاریخینە سەرشاوە مردیۊ و واتش: "تاریخوو کۊماری هەمان وەختنە تاریخوو کۊکوشیی عەلەوییەکان".
ئاماژه‌ش پەی ئانەیچە كەرد، ئه‌ڵقه‌و ئەوەڵی جە زنجیره‌و تاریخینە، ئانەن كه جە ساڵەو ١٩٢١ جە كۊچگرینە ڕووەش دا و واتش: تاریخی ١٠٠ ساڵه‌و كۊماروو توركیای پەڕا جە كۊکوشیی عه‌له‌وییه‌كا. ئا زنجیرەنە جه كۊچگریوە ده‌س پەنە کەرۊ و دێرسیمنە به‌رده‌وام بۊ، ئارۊیچنە كۊکوشییەکاو مه‌ڕه‌ش، چۊروم، سێواس، كرخان، مادیماك، گازی و عومرانیهی گێرۊ وێش. ئینسانەکۍ بۊنەو قەدەغەکارییوە مەراسیمی ئایینی وێشا بە شاراوەیی و کەرا، ئی جارە واتشا 'مۊمەکۍ کوشیاوە' و بەبێئەخلاقانە تۊمەتشا وربەست".
دۊغانە ئانەیچش وات، دماو كۊکوشیی سێواسیوە تا ئارۊ تا هیچ هه‌نگامێوە جیددییە پەی سزادای تاوانبارا نه‌نریان و واتش: ئەوەڵۊ پێسە ئانەی به كورده‌كاشا وات، به عه‌له‌وییه‌كایچشا وات: "شمە بییەیتا نییا". كه دیشا خه‌ڵك به‌رده‌وامێنۍ جە ژیوای، ئی جارە ده‌سشا به كوشتەیشا كەرد. وەلۍ هەڵای به ئامانجه‌كه‌یشا نەیاوۍ. دماو كۊكوشییه‌كه‌و سێواسی، ڕێكوزیا و ئەرەمەرزیا عه‌له‌وییه‌كۍ زیاڎتەرۍ بیۍ.
مشۊم ئۊپۊزسیۊن پەشتگیریی وێش زیاڎتەر بكەرۊ
دۊغانە واتیچش، پاڵپەشتیی ئۊپۊزسیۊنی پەی عه‌له‌وییه‌كا پێسە پێویسی نییا و واتش: پڕۊسه‌و داڎگاییكەرده‌كەی جارێوە تەر زەخمۍ قوربانییا و زەرەروەنەکەوتاو كۊكوشییە‌كه‌یش كولنێوە و سەرجەنۊ ئێشش دێوە پەنە. پێناسه‌ی زاڵ لاو سۊسیالیست و چه‌په‌كا‌وه پێسە پێویسی چاره‌سه‌ر نه‌كریان و نەویەریان. هه‌ر شۊنێوەنە با وێشا جا بابەتەیە دوور گێرا. پاسە نیشانە مدا كه پەشتگیرییش کەرا و هامخه‌می بەروازا، وەلۍ ئینه ته‌نیا به چ‌ند ڕووۍ دیاریكریا و سنوورڎار مەنەنۊ. ئێمه ساڵانێوەن پێسە مژیومۍ. ئێمه گلێرگێوە ته‌نیانمۍ. وینمۍ لاو حیزبه سیاسییه‌كای تەریوە و به‌شه‌كای تەروو گلێرگەیۊ كه‌موكوڵیی جیددی هەن.
س.ز
