عوسمان عارف ڕاوەبەروو بەشوو لادای زیاڎەلوای جە شارەوانیی پارێزگاو سلێمانی ئەرەیاوناش:" سەروو ئسپارای سەرۊکوو شارەوانیی سلێمانی بەشڎاریما کەرد جە کۊبییەیۊ ئەنجوومەنوو شارەوانیی سلێمانینە چی کۊبییەیۊنە قەرار دریا بە وەشکەرڎەی لوجنێوە پەی لابەرڎەی تەماموو ئا شۊنا، کە سەروو جاڎەکاوە حەیوان سەرە بڕا ".

 عوسمان عارف ئاشکرایچش کەرد:" لوجنەکە ئارۊوە بە هەماهەنگی چەنی هێزە ئەمنییەکا، دەس بە هەرمانەکاش کەرۊ و ڕاکاری یاسایی پێویس چەنی ئانیشا گیریۊرە وەر، کە سەروو جاڎەکاوە سلێمانینە ئاژەڵ سەرە بڕا، چونکوم هەرمانەکێشا بۊ بایسوو وەڵابییەیۊ نەوەشی و پیسبییەی ژیوگەیو شارەکەی."

ئاماژەیچش دا پانەیە تەرسەو وەڵابییەیۊ نەوەشیی هەنە، بۊنەو فڕەدای ئەوەمەنەو ئاژەڵەکاوە و پابەنڎنەبییەی بە ڕانماییە تەندرووسییەکاوە و واتش:" ئیسەنە پەتاو ونوەربییەی مەنتێقەکەنە وەروەڵینە، تا ئیساتۍ هیچ حاڵەتێوە سلێمانینە تۊمارە نەکریێنە، چێگەوە گەرەکمانە ڕا جە وەڵابییەیۊش گێرمۍ شارەکەنە. "

جە دمایینە ئا ڕاوەبەرەو بەشوو لادای زیاڎەلوای شارەوانیی سلێمانینە واتش: "جە ماوەی ویەرڎەنە هەرکەسێوە بۊنەو سەرەبڕیەی ئاژەڵیوە جادەکانە گیریۍ، بە (کەفالەت) ئازاڎ کریۍ، وەلی ئیسەنە حەوڵی ئانەیە مڎەیمۍ ئانەیە نازمۍ، هەرکەس گیریا وەرنەڎریۊ تا دماو جەژنەو قوربانی.

س.ز