پارتوو ژیوای ئازاڎوو کوردستانی (پەژاک) جە ئەرەیاوناێوەنە بارەو ٣٩مین ساڵیادوو هەڵمەتەو ١٥و ئابیوە، ئەرەیاونانش: "هەڵمەتەوی ١٥و ئابی سەرکەوتانە دەسش پەنە کەرد و بە سەرکەوتەییچ یاوا ئاکام".

ئانەیچش وستەن ڕووە، ئا فیشەکە ٣٩ ساڵۍ وەڵۍ ئیسەینە پەی دڵوو دوژمنی فاشیستی تەقیا، ئیساتێنە ڕەوتوو کۊشیایش سەرجەموو بەشەکاو کوردستانینە فاڕان و زیادتەر جە گرد وەختۍ جە ئازاڎیی یەکجارەکی نزیکێش وستێنێوە، هەرپێسە جەختیچش کەرڎەنۊ، کە ئا هەڵمەتۍ بە فەرماندەیی مەعسوم کۊرکمازی کریا، پیلانەو لۊزانیش کە پەی جینۊسایدی جەستەیی و کولتووری کوردی متێبێرە، پووچەڵە کەرڎێنۊ.

دەقوو ئەرەیاوناکەو پارتوو ژیوای ئازاڎوو کوردستانی پێسنەن:  

هەڵمەتەو ١٥و ئابی سەرکەوتانە دەسش پەنە کەرد و بەسەرکەوتەییچ میاوۊ ئاکام

ژیوایۊ گەلوو کوردیی چەوسیاوەی، کە ١٥و ئابینە چێروو فەرماندەیی هامڕا مەعسوم کۊرکماز (عەگید)ینە دژوو فاشیزمی دەسش پەنە کەرد، گەلوو کوردیش بە ڕابەرایەتیی ڕابەر ئاپۊی بەرەو جەژنەو سەرکەوتەی یەکجارەکی بە جۊشوخرۊش یاونان. پارتوو ژیوای ئازاڎوو کوردستانی (پەژاک) ١٥و ئابی، ڕۊو گەریلای گیانبازی و وەڵاتپارێزن و کۊشەروو کوردی وەنەو ڕابەر ئاپۊی و سەرجەموو گەلەکەیما مەبارەک کەرۊ.  

گەریلاکاو جمیەروو ئازاڎیوازیی کوردی ٣٩ ساڵۍ وەڵۍ ئیسەینە و ١٥و ئابوو ١٩٨٤ مەنتێقەو دهێو سەر بە شاروو سێرتیی سەرنیشتوو کوردستانینە، هەڵمەتەی چەکدارییەشا دژوو فاشیزموو تورکی دەس پەنە کەرڎە و کولتووروو کۊشیای گیانبازانە و فیداییانەیشا پەی ڕزگاریی سەرجەموو گەلوو کوردی و گەلە چەوسیاوا پەرە پەنە دا. ئی ڕوە، پێسە ڕۊو ژیوایۊ هەقەتینی و هەڵمەتەی بێهامتۍ و ساعیبداریی یەک سەدە جە کۊشیای گەلەکەیما منریۊرە.  چاوەختەشنە کە دوژمنۍ فاشیستۍ سەرڎەسۍ سەروو چوار بەشاو کوردستانیوە ڕازەو سڕیەیۊ و دلێنەبەرڎەی کوردی و کوردستانیشا دا گۊشۍ دنێیرە و بانگەشەو ئانەی کەرێنۍ، کە کورڎایەتی و کورددۊسییشا نیان قەبرەو بە کۊنکرێت پۊژنانشارە، هەڵمەتەو ١٥و ئابی، گەلەکەماش های کەرڎۊ و وستش سەروو ڕاڕەووو ئازاڎی و ڕزگاری. ١٥و ئابی ستراتیژی، پلان و تاکتیکی هەقەتینوو وەرگێریی ڕەواین دژوو دوژمنی. ئەرەبییەی و ژیوایۊ گەلەکەیماش ئامێتەو سەربەرزیی کەشەنەمەڕیایەکاو زاگرۊسی بی و فاڕیا پەی هەوارگەو هومێدی و ژیوای و جۊشوخرۊشوو ئازاڎیوازا، ئا ڕۍ کە هامڕا عەگیدی و بە ڕابەرایەتیی ڕابەر ئاپۊی کریاوە، ئارۊنە گەلەکەماش جە دلێنەشییەی یەکجارەکی ڕزگار کەرڎەن و هەزاران گەنجۍ ئازۍ و گیانبازۍ بە پێوەسبییەیشا بە ڕیزەکاو کۊشیایۊ کەشەکانە، ڕاو ئازاڎییشا تا قولە بەرزەکاو کۊبانۍ، هەولێر، ئامەدی و وەرکەوتوو کوردستانی پیما. ڕێبازوو کۊشیای ١٥و ئابی، کولتووروو چەنی ژیوای و ئازاڎانەژیوای فێروو گەنجاو کوردی کەرۊ و ئارۊنە دەسکەوتەکێش بیێنۍ بە ئامیانوو ئازاڎیی تەمامەتیی گەلەکەیما، جە چوارچوەو کۊبانێکانە نامێشا دنیانە دەنگش دانۊ و بییەن بە هومێدوو ئازاڎیوازا و جە بەرگوو سەرەورڎای شۊڕشگێڵنیی "ژەنی، ژیوای، ئازاڎی"ینە گەشیانۊ.

جینۊسایدی جەستەیی و کولتووری کە فاشیستەکۍ لۊزاننە ئیمزاو کۊیلایەتی و چێرچەپۊکیی گەلوو کوردیشا سەرۊ کەرڎەبۍ، جە سایۍ هەڵمەتەو قەڵەمبازیی ١٥و ئابی و سازکەرڎەی سوپاو ئازاڎیوازەو کوردیوە، پووچەڵەکریاوە. کۊشیای چەکداریی ڕەواو گەلوو کوردی بە نامۍ وەرگێری و وێپارێزنای ڕەوایۊ دژوو ڕژێمە فاشیستییەکا، کە بایسوو وەشکەرڎەی کێشەو کوردینۍ، ئەنجامی دماینوو یەک سەدە کۊشیای گەلەکەیما یەکلایی کەراوە. ئا فیشەکە ٣٩ ساڵۍ وەڵی ئیسەینە ڕووەو دڵوو دوژمنی فاشیستی تەقییا، ئارۊنە ڕەوتوو کۊشیای هەرچواربەشوو کوردستانیش فاڕان و گەلەکەماش زیاتەر جە گرد وەختۍ جە ئازاڎیی یەکجارەکی نزیک کەرڎەنۊ.  

جە ١٥و ئابینە پڕۊسەو ژیوایۊ و ورێستەیۊ گەلوو کوردی و ڕزگاری و ئازاڎیی ژەنا هاموەخت ئاما دی و بوارش پەی سازۍ کەرڎۍ و ئەرەمەرزنای سوپاو ژەناش وەش کەرد. یوەم فیشەکوو هەڵمەتەکۍ، چێروو فەرماندەیی عەگیدی و بە سەرمەشقایەتیی ڕابەر ئاپۊی کەسایەتیی چەوسیاوەو کوردی و کەسایەتیی ژەنۍ کۊیلەکریێش کەرد بە ئامانج. جە سایۍ چڵاکیایرەی و هایبییەیۊو ژەناو کوردی و گەلەکەیماوە، سیاسەتی سەد ساڵەو دوژمنی سەروو بنەماو کۊکوشیی کولتووری تووشوو مەڕیای و شکستی قورسی بی. ئا شکسە گەورەو دوژمنە فاشیستەکا، بی مایۍ ئانەیە گەورەتەرین پیلانگێڵنیی میاننەتەوەیی دژوو ڕابەر ئاپۊی کریۊ و گیریۊ. بەدڵنیاییوە هەڵمەتەو ١٥و ئابی سەرکەوتانە دەسش پەنە کەرد و بەسەرکەوتەییچ یاوا ئاکام. شێوەو کۊشیای شکۊمەندانەو گەریلای ئارۊنە بییەن بە نموونە پەی ئازاڎیوازا و دیموکراسیوازا مەنتێقەکەنە و جیهاننە و جمیەروو ئازاڎی وەراوەروو سیاسەتەکاو پاکتاوی و جینۊسایدی کولتووری و جەستەیینە زیادتەر جە جارا پتەو و قەوەت کەرڎەن.

پارتوو ژیوای ئازاڎوو کوردستانی (پەژاک) جگە جە مەبارەکبایی بە بۊنەو ٣٩مین ساڵەو ژیوایۊ و ورێستەیۊ ١٥و ئابیوە جە ڕابەر ئاپۊت، بنەیانەو گەشمەرڎا، هێزەکاو گەریلای و سەرجەموو گەلەکەیما، سەروو بنەماو شۊڕشوو ژەنی، ژیوا، ئازاڎی پەی کۊشیای دژوو فاشیزمی، خوڵکەو ئازاڎیوازا و دیموکراسیوازاو ئێرانی و وەرکەوتوو کوردستانی کەرۊ، داوا جە سەرجەموو گەنجاو کوردی کەرمۍ پەی وێبەساعیبزانای جە ونەو گەشمەرڎا و یاوناییاگۍ کۊشیای ئازاڎیوازی بەیا ڕیزوو گەریلایۊ کەشە ئازاڎەکانە.

بەدڵنیاییەوە ڕا و خەتەو هەڵمەتەو ١٥و ئابی، مانیفیستۊو خەتەی یەرەمەو ڕابەر ئاپۊی و کۊشیای گیانبازانەو گەلوو کوردین. گەل و کۊشیاێوە، کە بە پاکی و ڕاسواچانە، گیانبازانە و فیداییانە مەیا سەروو ئا ڕەوتەیە، بێگومان ئا ڕوە مۍ کە ئاهەنگوو شکۊمەندیی سەرکەوتەی و ئازاڎیی گێڵنا. ئانە کە پێسە میراتی دۊڵەمەند و پەڕاوپەڕوو هەڵمەتەو ١٥و ئابی جیا مەنەن پەیما، ئارۊمانە تۊشەو  ڕۍ و چراوەو ڕۊشنۊکەرڎەی ڕاو کۊشیای گەلەکەیمانە تا مەنزڵگەو ئازاڎی. ئی کۊشیایە تا دلێنەبەرڎەی فاشیزمی و ئارڎەیدیی ئازاڎیی گەلەکەیما بەرڎەوام بۊ.

پارتوو ژیوای ئازاڎوو کوردستانی (پەژاک)

س.ز