پژاک دژوو هەوڵێ قەنارەدای زیندانییە سیاسییە کوردا ئەرەیاوناێوەش وەڵا کەردۆ و ماچۆ: "هەڵوێستورگێرتەی دژوو قەنارەدای زیندانییە سیاسییا، هەرمانێوە ویژدانییە و ئەخلاقییە و سیاسییە و دیموکراتیکەنە".
پارتوو ژیوای ئازادوو کوردستانی (پژاک) دژوو هەوڵێ دەوڵەتوو ئێرانی پەی قەنارەدای چوار زیندانییە سیاسییە کوردا ئەرەیاوناێوە نویسیاش وەڵا کەردۆ. جگە جە شەرمەزارکەردەی ئی هەوڵەیە، داوا جە گرد لێوە کەرۆ وەڵێ قەنارەدای زیندانییەکانە، هەڵوێستی جیسدی ورگێرا و ڕا چی کۆکوشییەیە گێرا.
گردوو ئەرەیاونایەکەو پژاکی پێسنەن:
"هەواڵوو ئەگەروو قەنارەدای چوار زیندانییە سیاسییاو کوردی بە نامەکاو (پەژمان فەتحی و موحسن مەزڵوم و وەفا ئازەربار و محەمەد فەرامەرزی) زیندانوو ئەوینوو تارانینە مایێ نیگەرانیی گەلوو وەکەوتوو کوردستانی و ئازادیوازاو ئێرانین. پەی ڕاگێری جە قەنارەدای ئی زیندانییە سیاسییا و تەماموو زیندانییا، پێویسا گردوو گەلەکەیما و ئازادیوازا و چالاکا هەڵمەتێوە جیددییە دەس پەنە کەرانێ و پێ بکەن ڕا وەنەو ئی پڕۆسەیە گێرا.
مشۆم وەڵێ ئانەیەنە ڕووە بدۆ، هەڵوێستێوە ویژدانی و ئەخلاقی و سیاسی و دیموکراتیک دژوو هەوڵەکاو دەوڵەتوو ئێرانی پەی قەنارەدای زیندانییە سیاسییا نیشانە بدریۆ. هامزەمان ئاماروو قەنارەدای بە شێوێوە بێبەزەییانە و تەرسناک ئێرانەنە زیاد بییەن و وەهمەو دەوڵەتوو ئێرانی پەی بۆ فەرامۆشکەردەی دەنگە ناڕازییەکا وەراوەروو ئی هەرمانە نائینسانانێوە تەشەنەش کەردەن. بێگومان کۆماروو سێدارەی بە نەبییەی هەڵوێستوو گەلی و ئازادیوازا،یاراێوی زیاتەر پەی کەردەی ئی هەرمانە نائینسانانا پەیدا کەرۆ. چەنی زیادبییەی قەنارەدای لاو ڕژێمی فاشیستیوە، هەڵوێستێوی ڕادیکاڵوو فرەو چالاکا مایێ هومێدییا. بەتایبەت مانگێرتەی جە واردەی ٦١ زیندانییە سیاسییا تاراننە پەی شەرمەزارکەردەی تەشەنەسانای قەنارەدای، هەرپاسە هەڵوێستوو کەسا پێسە زەینەب جەلالیانێ و نەرگس محەمەدیێ پەی خاوەندارێتی چی مانگێرتەی جە واردەی، بەروزوو هەستیاریی ئی ڕەوشەینە. ئی ڕەوشە ئانەیە جە گەلەکەیما و ئازادیوازا و چالاکا موازۆ، ڕاو هەڵمەتەکاشاوە دژوو تاوانەکاو ئی ئەم ڕژێمەیە دەنگوو وێشا بەروزا. هەڵبەتە بێدەنگی چارەنووسێوە کارەساتبار مارۆ، هەرپاسە یارایێ زیاتەر بەخشۆ بە سیستموو گەندەڵی تا تاوانی زیاتەر پوی پاکتاوکەردەی زیندانیییە سیاسییا کەرۆ.
هاموەخت بنەیانەکاو ئی چوار زیندانیە سیاسییە کوردا وەردەموو زیندانوو ئەوینینە کوێ بیێنێوە، پەوکای پێویسا هەرچی پێویسا کریۆ پەی پارێزنای ئی بنەیانا و پەشیمانکەردەیۆ ڕژێمی جە قەنارەدای زیندانییە سیاسییا.
پارتوو ژیوای ئازادوو کوردستانی (پژاک) لە چوارچوەو شەرمەزارکەردەی تندوو شەپۆلەی نائینسانانێ قەناردەدای لاو سیستموو فاشیستوو ئێرانیوە، داوا جە سەراپاو گەلەکەیما و چالاکا و چینەکاو گلێرگەی و بەشەکاو جڤاکی و جەماوەری کەرۆ، ڕاو هەڵمەتەی چالاکانێ وێشاوە جوابێوی گونجیاو کۆماروو سێدارەی بداوە. بێگومان ئی هەڵوێستاو سیستمی فاشیستییە یاگێ شەرمەزارکەردەینێ، پێویسا بزاندێ تاقیکەرەیۆ ددانگێرتەیوێرەی گەلی بە تاکتیکوو سێدارەی، ئاکامی جیددیش پەیشا بۆ. ئی هەرمان و ڕەفتارە نائینسانانێ لاو گەلاوە مایێ فەرامۆشی و چەنەوەشبییەی نییەنێ. پەوکای دەسوبەرد و وەڵێ قەنارەدای زیندانییە سیاسییاو کوردینە، مشۆم گرد لێوە هەڵوێست ورگێرا و دمایی بە بە تاکتیکی کۆکوشیی قەنارەی بارا. حەر قەنارەداێوە، زەرەێوە قەرەبوونەکریاوەن پەی بییەی و کەرامەت و ئازادیی جڤاکی و گەلا، مشۆم مردنیۆ. وەڵتەرێ پژاک کەمپەینوو "نا پەی قەنارەی، بەڵێ پەی دیموکراسی"یش دەس پەنە کەرد، ئارۆیچ یۆ جە گەورەتەرین هەڵمەتەکا، هەڵمەتەو "نا پەی قەنارەی، بەڵێ پەی دیموکراسی"ینە و مشۆم وافرتەرە کریۆ".
