پژاک جە ١٢یەمین ساڵیاڎوو گەشمەرڎەبییەی فەرماندە "سمکۊ سەرهەڵدان"ینە، یاڎوو ئا گەشمەرڎەیەی و سەرجەموو گەشمەرڎاو ڕاو ئازاڎیی کورڎسانیش بەرز ئرمانا. ھاموەخت داوایچش وەنەو گەنجە ئازایاو کوردی کەرڎە، کە بەشڎاری جە ڕیزەکاو کۊشیای شۊڕشگێڵنانەو گەریلاینە کەرا.
پارتوو ژیوای ئازاڎی کورڎساننە (پژاک)، بە بۊنەو ٣ی ئەیلوولیوە، کە هاموەختوو١٢یەمین ساڵیاڎوو حەماسەی قارەمانانەو قەندیلی و شکستی قورسوو هێزەکاو دەوڵەتوو ئێرانین وەراوەروو هێزەکاو گەریلاینە، هەرپاسە گەشمەرڎەبییەی فەرماندەی دیار و ئازاو ڕیزەکاو گەریلای؛ گەشمەرڎە سمکۊ سەرهەڵدانی ئەرەیاوناێوەش وەڵا کەرڎۊ.
جە ئەرەیاوناکەنە پژاک جگە جە بەرزئرمانای یاڎوو فەرماندە "سمکۊ سەرهەڵدان"ی و سەرجەموو گەشمەرڎاو ڕاو ئازاڎیی کورڎسانی، قەرارش ئەوەخوای کەرڎەنۊ، تا یاوای بە سەرکەوتەی، بە گیان و ئیرادەو گەشمەرڎا، بۍ وچان بەرڎەوامۍ با. هەرپاسە داوایچش وەنەو گەنجاو کورڎسانی کەرڎێنە، ڕاو گەشمەرڎا پەڕ کەرا ڕاویارۍ و بەشڎاری کەرا ڕیزەکاو کۊشیای شۊڕشگێڵنانەینە و گەریلاینە.
تەماموو ئەرەیاوناکەو پژاکی پێسنەن:
فەرماندەی قارەمان، ھامڕاو گەشمەرڎاما، "سمکۊ سەرهەڵدان"، ھێماو کۊشیای پەی ئازاڎیی بۍ. جە ١٢یەمین ساڵیاڎوو گەشمەرڎەبییەی گەشمەرڎە سمکۊینە، یاڎوو ئادی و سەرجەموو ھامڕا گەشمەرڎا و ھامسەنگەراش بەرز مرمانمۍ. گەشمەرڎە سمکۊ بە بەختکەرڎەی گیانیش، ڕاو ئازاڎییش پێسە گەورەتەرین دەستکەوتوو کۊشیای، پەی گەلەکەیما کەرڎۊ، ئارۊیچ جە سایۍ شێوازوو فەرماندەیی گیانبازیی ئادینە، کەشە ئازاڎەکاو کورڎسانی پێسە مەکۊو ئازاڎیی مەنێنێوە.
جمیەروو ئازاڎیی گەلوو کوردی، دمابەدماو هجوومە ئەرەگیرکارییەکاو ڕژیموو ئێرانی ساڵەو ٢٠١١ پەی سەروو قەندیلی، یۊ جە گەورەتەرین داستانە تارێخییەکاو ئا سەرڎەمیشە تۊمار کەرد و بە گردوو قوەیشۊ دوژمنش مردنا. گەلوو کوردی کە سەدێوەن ڕووبەڕوو وەرفراوانتەرین هجووموو جینۊسایدی بیەنۊ، تا ئیساتێچ لاو دوژمناشۊ، بەتایبەت ڕژێمی فاشیستوو ئێرانیوە ڕووبەڕووی کۊکوشی کریۊوە. وەراوەروو ئا خەتە وێرانکارییۍ دوژمناوە، بێگومان، ڕۊڵە ئازا و نەتەرسەکاو گەلەکەیما، پێسە گەشمەرڎە "سمکۊ سەرهەڵدان"ی ورکەوتۍ، داستانی قارەمانانەشا خولقنا و بیۍ بە قەڵغانێوە وەرگێری جە گەلی ستەموەنەکریایشا. بۊنەو ئانەیۊ کەشی سەربەرزوو قەندیلی بی بە مەکۊو وێگێری و کۊشیای گەشمەرڎە سمکۊ سەرهەڵدان، فەرماندەی چەنەئاما و بەتواناش چەنە بۍ، ئیتر گەلەکەما ئاسوودە بی، کە بە بییەی ڕۊڵەی ئازا و نەتەرسی پێسە ئادی، سیاسەتوو کۊکوشی تووشوو شکستی بۊ و ڕاو ئازاڎیی کریۊوە.
گەلوو کوردی، سایۍ بەرکەوتەی جمیەری ئازاڎیوازوو وێشنە، بە سەرمەشقایەتیی پارتوو ژیوای ئازاڎوو کورڎسان (پژاک)ی، ھەرپاسە سایۍ یاونایپەنەی فەرماندە شایستە و فیداکارەکاشنە پێسە گەشمەرڎە سمکۊ سەرهەڵدانی، سەرجەموو وەربەس و سنوورەکاو دوژمنیش ویەرنێنۍ و ئارۊ جە گرد وەختێوە زیاڎتەر جە ئازاڎیی نزیک بییەنۊ. ڕاو گەشمەرڎە سمکۊی ڕاستەرین ڕانە پەی کۊشیای بە نامۍ وەرگێریی ڕەوایۊ وەراوەروو دوژمنا. کۊشیای بێوچانوو گەشمەرڎە سمکۊی و هامڕایاش، کە گیانشا بەخت کەرد، ئیرادەو گەلوو کوردیشا وەرکەوتوو کورڎسانینە قەوەتتەر کەرد و هومێدوو گەلیشا پەی دەسوستەی ئازاڎی و دیموکراسی زیاڎتەر کەرد. سەرڎەمێوەنە کە بۊنەو سیاسەتوو جینۊسایدوو دوژمنیوە، سەرکوت و تۊقنای تەماموو وەرکەوتوو کورڎسانیش گێرتەبێوە، ئەرەمەرزنای پژاکی و بەرکەوتەی فەرماندە سمکۊی بی بە خاڵەو ورچەرخیای جە ژیوایوە کۊشیای ئازاڎیوازینە و حەماسەو قەندیلیچ بی بە قەلاپۊپەو ئا کۊشیایە هەقەتینەیە.
سەیەو ڕەنج و حەوڵەکاو گەشمەرڎە سمکۊینە، ئەندێشەی تازەو گەریلای و گەلی گەش بییۊ، شێوازی تازەو فەرماندەیی پەی سەرکەوتەی یەکجارەکی بناغەش نریارە. پەوکاتەی میراتوو گەشمەرڎە سمکۊی، بە ئاڕاستەو پابەندبییەی بە گەلوو کوردی و ڕابەر ئاپۊیۊ، لجە دەسکەوتەکاو حەماسەو قەندیلین، کە بی بایسوو بەرڎەوامیی جمیەروو ئازاڎی و سەچەمەو هێزی پەی گەلەکەیما. بێگومان چا ڕووەوە فرەو گەنجاو گەلەکەیما بە یاواینەی چانەیە، کە ڕای درووسەو کۊشیای گەشمەرڎە سمکۊکا و شێوازوو فەرماندەیی گیانبازی، کە تاکە گەرەنتیی یاوای گەلوو کوردین بە ئازاڎی، کەشەکێشا پێسە چەق و ناوەندوو کۊشیای ورچنیۍ و ڕاو گەشمەرڎاشا پەڕ کەرڎە ڕاویارۍ. بەدڵنیاییوە گەلێوە پێسە کوردی، تا ئا وەختەساعیبوو ڕۊڵەی ئازا و نەتەرسی چانەی بۊ بێتەرس و بە هومێدێوە فرەوە ڕاو ئازاڎیی بڕۊ.
حەماسەو قەندیلی سایۍ فەرماندەیی گەشمەرڎە سمکۊ سەرهەڵدانینە سەلەمناش، کە ڕژێمی فاشیستی ئێرانی جە هجوومە ئەرەگیرییە تازەکاشنە تووشوو شکستی گەورەتەری بۊوە و شۊڕشوو گەلوو کوردی سایۍ بییەی ڕۊڵەکاشنە پێسە گەشمەرڎە سمکۊی، کە هەرمانە و وەرپەرسبییەی کۊشیای، جەنگ و فەرماندەیی وێشا بە خاستەرین نۊع یاونان یاگۍ، میاوۊ سەرکەوتەی.
"پارتوو ژیوای ئازاڎوو کورڎسانی (پژاک)" جە ۱۲یەمین ساڵیاڎوو گەشمەرڎەبییەیی هامڕای فەرماندە گەشمەرڎە "سمکۊ سەرهەڵدان"ینە، یاڎوو ئادی و سەرجەموو گەشمەرڎاو ڕاو ئازاڎیی گەلوو کوردی بەرز مرمانۊ. بەدڵنیاییوە، حەماسەو قەندیلی داستانوو ژەنە کۊشەراو کوردی و گەشمەرڎاو سەرمەشقا پێسە "گەشمەرڎە بەرفینۍ، گەشمەرڎە عەگید تۊشپای، عەگید مەهابادی، گەشمەرڎە ساریۍ و گەشمەرڎە ئەڤیندارێ" بۍ، کە وەختوو داستانوو قەندیلینە جمیەروو ئازاڎیوازوو ژەناشا یاونا قەلاو وێگێری و هومێدی.. ئێمەیچ قەرارەکەیما ئەوەخوای کەرمێوە، تا یاوای بە سەرکەوتەی گەلەکەیما، بە گیان و ئیرادەو هامڕا گەشمەرڎە سەرمەشقەکاما "سمکۊ، ڕێزان، ڕێناس، هۊرام، ڕۊژدا، زیلان، کاڤندا، عادل، ڕێڤان، ڕوکەن، جەنگاوەر، لەشکر، بروسک" و سەدان گەشمەرڎۍ تەرۍ گیانبازۍ ڕاو ئازاڎی و هەقیقەتوو وەرکەوتوو کورڎسانی بێوچان بەرڎەوامۍ بیمۍ و بیاونمێش بە سەرکەوتەی. هەرپاسە داوا وەنەو گەنجە ئازایاو گەلەکەیما کەرمۍ. دەکەین، کە ڕاو گەشمەرڎە سمکۊی و گەشمەرڎاو گەلەکەیمان پەڕ کەرا ڕاویارۍ و بەیا دلۍ ڕیزەکاو کۊشیای شۊڕشگێڵنانەی و گەریلایۊ".
س.ز
